Peteĩ tembiapo iñimportánteva Ñandejára servísiope: umi Salón del Reino ñemopuʼã
1. Mbaʼe mbaʼépa ojehupytýma ha mbaʼépa tekotevẽ gueteri?
1 Paraguáipe oñemopuʼã 15 Salón del Reino ha oñembopyahu 19 umi cinco áño ohasavaʼekuépe. Jaagradeseterei umi ermáno ombaʼapoitereíva pe Grupo de Construcción de Salones del Reino-pe ha opavave umi oipytyvõvape chupekuéra. Oñembaʼapo hetámarõ jepe, oĩ gueteri heta Salón del Reino oñemopuʼãvaʼerã. Upéicharõ, mbaʼéichapa ikatu ñaipytyvõ ko tembiapópe, iñimportánteva Ñandejára servísiope? (Rev. 7:15.)
2. Mbaʼéichapa ikatu ñaipytyvõ oñemopuʼã jave umi Salón del Reino?
2 Jahechauka ñaipytyvõseha. Oiméramo rejevautisáma, ikatu remyenyhẽ pe Solicitud para el programa de voluntarios de construcción de Salones del Reino ha péicha ikatúta reipytyvõ pe Grupo de Construcción de Salones del Reino-pe (Sal. 110:3). Umi oñekuaveʼẽva oĩvaʼerã oporopytyvõ hag̃uáicha ha ombaʼaposevaʼerã hapichakuérandi (Sal. 133:1). Nerembaʼapóiramo gueteri óga ñemopuʼãme, ikatúnte avei tuicha reipytyvõ oñembaʼapo porã hag̃ua. Avei upéva ikatu nembokatupyry amo gotyove reipytyvõve hag̃ua.
3. Mbaʼéichapa avei ikatu jahechauka ñaipytyvõha ko tembiapópe, iñimportánteva Ñandejára servísiope?
3 Oiméramo ndaikatúi reñekuaveʼẽ rembaʼapo hag̃ua, remokyreʼỹkuaa umi ikatúvape oho. Ikatu repyta reñatende umi ohóva rembiapóre pe kongregasiónpe. Oho mboyve umi ermáno ombaʼapótava, ansianokuéra ojapomavaʼerã pe oñekotevẽva ani hag̃ua pe kongregasión opyta ikangy. Jehová oguerohoryeterei ñambaʼapóramo oñondivepa ñamotenonde hag̃ua Irréino (Heb. 13:16).
4. Mbaʼéichapa ikatu ñamombarete umi Salón del Reino omopuʼãvape?
4 Ñaporomokyreʼỹvaʼerã. Oñemopuʼã hag̃ua umi Salón del Reino heta oñembaʼapo ha ojeporu heta tiémpo. Upévare umi ermáno ohóva ombaʼapo sapyʼánte ndaikatúi oho ikongregasiónpe umi rreunionhápe. Upévare, ija vove ñandéve, ñamombaʼe ha ñamokyreʼỹvaʼerã umi ermáno oñekuaveʼẽvape, heta ombaʼapóva “koʼã tembiapo [oñekotevẽva, NM]” rehehápe (Hech. 6:3; Rom. 14:19).
5. Mbaʼéichapa ojekuaa umi ombaʼapóva ojapoha hendápe porã opa mbaʼe?
5 Jajapókena hendápe porã opa mbaʼe. Pe mbaʼe iñimportantevéva jajapovaʼerã haʼehína japredika Ñandejára Rréinogui (Mar. 13:10). Upévare pe Grupo de Construcción ojapo ikatúva guive oprepara hag̃ua hembiapokuéra ani hag̃ua umi ombaʼapóva ofaltaiterei ikongregasiónpe. Upéicha avei umi ombaʼapóva oñehaʼã ojapo hendápe porã opa mbaʼe ikatu hag̃uáicha okumplipa hembiapokuéra. Ha ojepyʼapy oĩ hag̃ua umi oñatende porãtava hembiapokuérare kongregasiónpe noĩri jave hikuái.
6. Mbaʼépa ojehupyty kongregasiónpe opavave ombaʼapóramo pe adorasión añetegua rehehápe?
6 Pe apóstol Pablo heʼi umi oĩva kongregasiónpe ombaʼapoha oñondivepa ikatu hag̃uáicha “okakuaapa ohóvo ha opuʼã porã mborayhúpe” (Efe. 4:16, VP). Upévare, jahayhúgui Jehovápe ha pe adorasión añetegua, ñanekyreʼỹ ñaipytyvõ meme hag̃ua predikasiónpe ha oñemopuʼã hag̃ua umi Salón del Reino.