Jahechauka jajepyʼapyha ñande rapicháre: japredika rupive opaichaguápe
1 Apóstol Juan ohecha visiónpe peteĩ ánhel ovevéva yvágare ha ogueraháva marandu opaʼỹva omombeʼu hag̃ua opavave yvypórape “opa tetãme, tahaʼe haʼéva ñemoñare, toñeʼẽ oñeʼẽva ha opaichagua tavayguápe” (Rev. 14:6). Jajapópa pe ánhel ojapoháicha ha japredikápa japoroporavoʼỹre? Jahechakuaaʼỹre ikatu oime ndajahayhuiñaína opavavépe. Pe ñapensáva ñande rapicháre ojekuaáta ñane predikasiónpe. Upévare, japredika jave jahechaukavaʼerã jajepyʼapyha opaichagua tapicháre.
2 Ehecha mbaʼeichagua tapichápa oĩ nde territóriope. Oĩpa umi ovavaʼekue tetã ambuégui? Heta vése ikatu nañapenái umichaguáre. Ñande voi ñañehaʼãvaʼerã jaheka ha jaikuaave chupekuéra. Mbaʼépa ogusta térã ndogustái ha mbaʼépa oipyʼapy chupekuéra? Mbaʼépa oikotevẽ hikuái?, téra mbaʼéguipa okyhyje? Reikuaávo koʼã mbaʼe, reiporuvaʼerã upéva repredika hag̃ua chupekuéra (1 Cor. 9:19-23). Apóstol Pablo ojapohaguéicha, jahechakuaavaʼerã avei tekotevẽtereiha ñamombeʼu pe marandu porã opavavépe ñande territóriope. Marãve ndoikói tetã ambueyguáramo, oñeʼẽramo ótro ñeʼẽme ha iñarandu térã iplátaramo (Rom. 1:14, nóta, NM).
3 Mbaʼéichapa ikatu japredika peteĩ oñeʼẽvape ambue ñeʼẽme? Upearã ikatu jaiporu folléto Notísia Porã opavave Tapichakuérape g̃uarã. Oĩramo nde territóriope heta tapicha oñeʼẽva ambue ñeʼẽme, katuete reguerahavaʼerã tratádo ha folléto umi ñeʼẽme (ehecha Nuestro Ministerio del Reino julio 2003-peguare, páh. 4, párr. 2, 3). Oĩ katu umi ermáno oñehaʼãva oaprende mbaʼéichapa omomaiteíta téra opredikáta mbykymínte jepe ambue ñeʼẽme. Heta tapicha oguerohory ñañehaʼãramo ñañeʼẽ chupekuéra iñeʼẽme, mbykymínteramo jepe. Upéva ikatu omomýi chupekuéra ohenduse hag̃ua pe marandu porã.
4 Jajapo Jehová ojapoháicha. Ñañehaʼãvo japredika opaichagua tapichápe, jajapoñaína Jehová ojapoháicha. Haʼe ndoporoporavói ha “oipota opavave osẽ jejopy vaígui ha oikuaa pe añetegua” (1 Timoteo 2:3, 4).