Diferénte fórma de predikasión

JESÚS ikyreʼỹeterei vaʼekue opredika hag̃ua umi notísia porã ha péicha omoĩ isegidorkuérape ehémplo iporãva. Haʼe nohaʼarõi umi hénte ou hendápe, síno haʼe voi oho hendapekuéra. Haʼe opredika ha omboʼe umi héntepe hogapekuéra ha avei ijatyhápe heta persóna (Mat. 9:35; 13:36; Luc. 8:1). Jesús oñeʼẽ umi héntendi peteĩteĩ, omboʼe umi idisípulope oĩrõ guare haʼekuéra añónte, ha avei oporomboʼe oĩrõ guare heta hénte (Mar. 4:10-13; 6:35-44; Juan 3:2-21). Jesús oaprovecha umi oportunida orekóva omokyreʼỹ hag̃ua umi héntepe ha omeʼẽ hag̃ua chupekuéra esperánsa (Luc. 4:16-19). Tekotevẽramo jepe opytuʼu, Jesús ndohejái ohasa rei ni peteĩ oportunida opredika hag̃ua (Mar. 6:30-34; Juan 4:4-34). Umi apóstol ohechávo Jesúspe osegi avei iñehémplo. Ha ñande jaleévo umi 4 lívro bíblico oñeʼẽva Jesús rehe, ñanekyreʼỹ avei jasegi hag̃ua iñehémplo (Mat. 4:19, 20; Luc. 5:27, 28; Juan 1:43-45).

² Ohasáma ningo haimete 2 mil áño Jesús omoñepyrũ hague pe predikasión, ha koʼág̃a oĩ diferénte fórma ikatúva jaipuru japredika hag̃ua ñande rapichápe. Jahechamína umíva.

PREDIKASIÓN OGAHÁRUPI

³ Ñande ningo testígo de Jehová ha upévare jaikuaa iñimportantetereiha japredika umi notísia porã ogahárupi. Ymaiterei guivéma umi hénte ñandekuaa japredika haguére upéicha. Ojepredika rupi ogahárupi oñemog̃uahẽma pe mensáhe hetaiterei héntepe ohasaʼỹre heta tiémpo. Péicha jahecha ojehupytyha hetaiterei mbaʼe porã ko fórma de predikasión rupive (Mat. 11:19; 24:14). Japredika rupi ogahárupi jahechauka jahayhuha Jehovápe ha ñande rapichakuérape (Mat. 22:34-40).

⁴ Pe predikasión ogahárupi ndahaʼéi peteĩ fórma pyahu omoñepyrũva umi testígo de Jehová. Apóstol Pablo omombeʼu vaʼekue haʼe omboʼe hague umi héntepe hogakuérape. Haʼe heʼi vaʼekue umi ansiáno Efesoguápe: ‘Peẽ peikuaa porã mbaʼéichapa aiko vaʼekue pende apytépe aju ypy guive Asia distrítope. Avei peẽ peikuaa che ndakyhyjéi hague haʼe hag̃ua peẽme entéro mbaʼe ideprovéchotava peẽme, ha pomboʼe hague ogahárupi’. Péicha ha hetave hendáicha apóstol Pablo ‘opredika hekoitépe umi judío ha griégope, ikatu hag̃uáicha oñarrepenti hikuái, oadora Ñandejárape ha ojerovia ñande Ruvicha Jesús rehe’ (Hech. 20:18, 20, 21). Upe tiémpope umi emperadór rrománo omokyreʼỹ vaʼekue la héntepe oadora hag̃ua umi taʼangápe, upévare umi hénte omombaʼe umi dioskuérape. Jahechakuaa upéicharõ mbaʼérepa tekotevẽterei raʼe umi hénte oikuaa ‘Ñandejára ojapo vaʼekuépe ko múndo ha entéro mbaʼe oĩva pype’, haʼe hína upe opárupi heʼíva “enterove yvypórape oñarrepenti vaʼerãha” (Hech. 17:22-31).

⁵ Koʼág̃arupi koʼýte tekotevẽ og̃uahẽ umi notísia porã umi héntepe, pórke koʼẽrõitéma oñehundíta ko múndo aña. Upéva ñanemomýi ñañehaʼã hag̃ua jajapo hetave mbaʼe ko tembiapópe. Japredikávo ogahárupi jatopa umi hénte añetehápe oikuaasévape pe añetegua, ha ndaipóri ótra fórma de predikasión iporãvéva upévagui. Pe predikasión ogahárupi ideprovécho vaʼekue Jesús ha umi apóstol tiémpope, ha koʼag̃aite peve upéicha (Mar. 13:10).

⁶ ¿Reaprovechapaitépa entéro oportunida repredika hag̃ua ogahárupi? Oiméramo rejapo upéva Jehová katuete ndeguerohorýta (Ezeq. 9:11; Hech. 20:35). Sapyʼánte ikatu ijetuʼu lénto ndéve repredika hag̃ua ogahárupi. Ikatu oime ereko algúna diskapasida, térã umi hénte nde territoriopegua nohenduséi pe mensáhe. Ikatu pe goviérno oproivi pe predikasión upe lugárpe, térã neotĩ ha ijetuʼu ndéve reñemongeta hag̃ua peteĩ extráño ndive. Oiméramo koʼã mbaʼére rekyhyje lénto resẽ hag̃ua repredika ogahárupi, ani reheja upéva nedesanima (Éx. 4:10-12). Umi mbaʼe ijetuʼúva nde rehasáva ohasa avei umi ermáno oĩva ko múndo tuichakuére.

⁷ Jesús opromete vaʼekue idisipulokuérape: “Che aĩta penendive káda día, og̃uahẽ meve pe fin” (Mat. 28:20). Ko promésa ñanemombarete jasegi hag̃ua ñaipytyvõ umi héntepe oiko hag̃ua chuguikuéra Jesús segidór. Ñande ñañeñandu apóstol Pablo oñeñandu haguéicha, haʼe heʼi: “Che chembarete ambohovái hag̃ua entéro mbaʼe Ñandejára omeʼẽgui chéve podér” (Filip. 4:13). Jaaprovechapaitékena umi oportunida oĩva ñasẽ hag̃ua japredika ogahárupi pe kongregasión ndive. Japredikávo ñane ermanokuéra ndive ñañomokyreʼỹ ha ñañopytyvõta. Ikatu avei ñañemboʼe ha jajerure Jehovápe tañanepytyvõ oimehaichagua situasión jahasávape, péicha ikatúta japredika kyreʼỹ (1 Juan 5:14).

⁸ Repredikávo umi notísia porã ikatúta ‘redefende ne esperánsa’ (1 Ped. 3:15). Rehechakuaáta rehóvo mbaʼeichaitépa idiferénte umi hénte orekóva esperánsa Ñandejára Rréinore ha umi ndorekóiva esperánsa (Is. 65:13, 14). Revyʼaitereíta ikatu haguére rekumpli Jesús omanda vaʼekue idisipulokuérape heʼírõ guare “peẽ pehesape vaʼerã umi hénte renondépe”. Ha ikatu voi rereko pe priviléhio reipytyvõvo nde rapichápe oikuaa hag̃ua Jehovápe ha oikuaa hag̃ua pe añetegua omeʼẽva jeikove opaveʼỹva (Mat. 5:16; Juan 17:3; 1 Tim. 4:16).

⁹ Umi kongregasión omoĩ enkuéntro ñasẽ hag̃ua japredika ogahárupi éntre semána ha fin de semanakue. Umi território ijetuʼuhápe ojetopa umi héntepe hógape de diakue, umi kongregasión omoĩ jepi enkuéntro kaʼarupytũ. Umi héntepe sapyʼánte opyta porãve orresivi visíta hógape kaʼaruete.

JAHEKA UMI OMERESÉVAPE OHENDU PE MENSÁHE

¹⁰ Jesús heʼi vaʼekue idisipulokuérape: “Peheka petopa peve mávapa omerese ohendu pe mensáhe” (Mat. 10:11). Jesús ndahaʼéi ogahárupinte ohekáva umi hénte ipyʼaporãvape, síno haʼe oaprovecha vaʼekue entéro oportunida opredika hag̃ua oikohárupi informálmente (Luc. 8:1; Juan 4:7-15). Umi apóstol opredika vaʼekue avei umi héntepe heta lugárpe (Hech. 17:17; 28:16, 23, 30, 31).

¹¹ Upéicha avei koʼág̃a ñande ñamog̃uahẽse enterovépe umi notísia porã oñeʼẽva Ñandejára Rréinore. Upearã jasegi vaʼerã Jesús ha umi apóstol ehémplo ha jareko vaʼerã enkuénta umi hénte oiko lája ko tiémpope ha mbaʼépa oikotevẽ hikuái (1 Cor. 7:31). Por ehémplo, heta puvlikadór oreko experiénsia iporãva opredikávo umi negosiohárupi. Heta lugárpe ojepredika porã umi kállere, párkepe, estasionamiéntorupi, térã oĩháme heta hénte. Oĩ kongregasión oipurúva mesa, exividór térã karríto opredika hag̃ua iterritóriope. Avei pe sukursál oorganisa jepi predikasión púvlika metropolitána umi siuda oĩháme heta hénte ha oñeinvita ermáno heta kongregasionpegua opartisipa hag̃ua. Péicha rupi ojepredika heta hénte ndajatopáivape ogahárupi.

¹² Japredika jave umi lugár oĩhárupi heta hénte, ikatu jaheja peteĩ puvlikasión umi hénte oikuaasevévape la Biblia omboʼéva. Resegi hag̃ua reipytyvõ upe persónape, ikatu remeʼẽ chupe nde réra ha ne número ha rejapo hendive arréglo reho hag̃ua revisita chupe, ikatu avei remokyreʼỹ chupe oike hag̃ua ñane páhina de Internétpe, térã remeʼẽ chupe pe Salón hiʼag̃uivéva direksión. Ikatu rehecha igustoitereiha jajapo hetave mbaʼe Jehová servísiope japredikávo oĩháme heta hénte.

¹³ Jajapo hag̃ua Jesucristo omanda vaʼekue ndahaʼéi ñamombeʼúnte vaʼerã umi notísia porã. Reipytyvõséramo umi héntepe oasepta hag̃ua pe añetegua tekotevẽ revisita jey jey umi oikuaasevévape la Biblia omboʼéva. Péicha ikatúta oprogresa ha oiko chuguikuéra kristiáno ojerovia mbaretéva.

JAJAPO RREVISÍTA

¹⁴ Jesús heʼi vaʼekue isegidorkuérape: “Oikóta pendehegui che testígo [...] umi lugár mombyryvehápe jepe ko yvy ape ári” (Hech. 1:8). Péro avei heʼi vaʼekue: “Tapeho pemboʼe umi hénte entéro paisguápe oiko hag̃ua chuguikuéra che disípulo, [...] pemboʼe chupekuéra ojapo hag̃ua entéro mbaʼe amanda vaʼekue peẽme” (Mat. 28:19, 20). Jajapóramo rrevisíta katuete javyʼaitereíta. Umi hénte ohendu porã vaʼekue ovyʼáta ñanderecha jeývo. Reñeʼẽ jeývo umi ohendu porã vaʼekuépe, ojeroviavéta hikuái Ñandejárare ha reipytyvõta chupekuéra ohechakuaa hag̃ua oikotevẽha hese (Mat. 5:3). Rejeprepara porãramo ha reho peteĩ óra opyta porãvape pe ogajárape ikatu hína remoñepyrũ peteĩ estúdio bíblico. Añetehápe jajapo rrevisíta pórke ñamoñepyrũse peteĩ estúdio bíblico. Péicha jarregáta pe semílla ha ndahaʼemoʼãi ñañotỹnteva (1 Cor. 3:6).

¹⁵ Algúnope ijetuʼueterei ojapo hag̃ua rrevisíta. Ikatu oime ifásilma ndéve repredika mbykymi hag̃ua ha revyʼa voi rejapóvo upéva. Ikatu oime repensa haguénte rejapo vaʼerãha rrevisíta, rekyhyjéma voi ha rechuchupa. Péro rejeprepara porãrõ ndepyʼaguasuvéta. Eñehaʼãkena esegi umi suherénsia oñemeʼẽva pe rreunión éntre semanaguápe. Ikatu avei rejerure nemoirũ hag̃ua peteĩ puvlikadór iñexperiensiavévape.

JAJAPO ESTÚDIO BÍBLICO

¹⁶ Umi apóstol tiémpope, peteĩ karai oikéva umi judío rrelihiónpe olee vaʼekue Ñandejára Ñeʼẽ, ha upérõ Felipe oporandu chupe: “¿Nde piko rentendepa hína upe releéva?”. Pe karai orresponde: “¿Ha mbaʼéicha piko antendéta ndaipóriramo avave omyesakã vaʼerã chéve?”. Lívro de Hechos kapítulo 8 omombeʼu Felipe oipuru hague peteĩ téxto bíblico pe karai oleéva hína oñepyrũ hag̃ua oñemongeta hendive, ha péicha “omombeʼu chupe umi notísia porã oñeʼẽva Jesús rehe” (Hech. 8:26-36). Ndajaikuaái ningo mboy tiémpopa Felipe ohasa pe karai ndive, péro omyesakã rupi chupe umi notísia porã, pe karai opyta ojerovia Jesús rehe ha ojevautisase oiko hag̃ua chugui Jesús disípulo.

¹⁷ Heta hénte koʼág̃a ndoikuaái la Biblia omboʼéva. Upévare tekotevẽ jaha javisita chupekuéra heta vése ostudia porã hag̃ua la Biblia, ikatu voi semánare, mésere, un áño térã hetave tiémpore. Ha upe rire ae ojerovia mbaretéta hikuái ha ikatúta ojevautisa. Nepasiénsiaramo ha mborayhúpe reipytyvõramo umi hénte ipyʼaporãvape, katuete rerresivíta heta vendisión. Jesús heʼi vaʼekue voi: “Javyʼaiteve ñameʼẽvo, ñandéve oñemeʼẽ rangue” (Hech. 20:35).

¹⁸ Oime vaʼerã katuete rejapose peteĩ estúdio bíblico. Upearã reipuru vaʼerã peteĩva umi puvlikasión ojejapóva ñambostudia hag̃ua la héntepe. Resegíramo umi instruksión oñemeʼẽva pe rreunión éntre semanaguápe ha rembaʼapóramo umi ermáno oporomboʼekuaáva ndive, ikatúta rejapo umi estúdio oprogresáva ha reipytyvõta ne estudiántepe oiko hag̃ua chugui Jesús disípulo.

¹⁹ Oimérõ ijetuʼu hína ndéve remoñepyrũ peteĩ estúdio bíblico, ikatu reñeʼẽ peteĩ ansiáno ndive térã peteĩ ermáno ikatupyrývandi. Avei ikatu nepytyvõ umi demostrasión ha suherénsia oñemeʼẽva ñane rreunión héravape Mbaʼéichapa Jaiko ha Japredika vaʼerã. Rejerovia vaʼerã Jehováre ha ejerure chupe tanepytyvõ rejapo hag̃ua peteĩ estúdio bíblico (1 Juan 3:22). Ikatu oime restudia peteĩ nde rogayguándi, péro eñehaʼãmbaitékena ereko ótro estúdio bíblico. Revyʼavéta Jehová servísiope rejapóramo estúdio bíblico.

EIPYTYVÕ NE ESTUDIÁNTEPE OIKUAA PORÃVE HAG̃UA JEHOVA ORGANISASIÓN

²⁰ Ñaipytyvõvo umi héntepe oikuaa hag̃ua Jehovápe ha oiko hag̃ua chuguikuéra Jesús disípulo, haʼekuéra oike avei Jehová organisasiónpe. Iñimportanteterei ñaipytyvõ umi estudiántepe oikuaave ha oapoja hag̃ua Jehová organisasión, péicha ikatúta oprogresa ha ojerovia mbareteve hikuái. Upearã ikatu jaipuru umi vidéo oñeʼẽva pe organisasiónre ha pe folléto hérava ¿Mávapa umi ojapóva Jehová volunta koʼág̃arupi? Avei tuicha ideprovéchota chupekuéra pe informasión oĩva ko lívrope kapítulo 4-pe.

²¹ Reñepyrũre restudia, remyesakã vaʼerã ne estudiántepe Jehová oipuruha peteĩ organisasión ojepredika hag̃ua ko múndo tuichakuére. Rehechauka vaʼerã ne estudiántepe ideprovechoitereiha umi puvlikasión ojejapóva ñantende porãve hag̃ua la Biblia. Ikatu reexplika chupe mbaʼéichapa ojejapo ha ojerreparti umi puvlikasión ha oĩha ko yvy tuichakuére voluntário ombaʼapóva upearã. Ikatu avei reinvita ne estudiántepe oho hag̃ua nendive rreunionhápe Salón del Réinope, ha reexplika chupe mbaʼéichapa ojejapo umi rreunión. Ikatu avei representa chupe ermanokuérape ha avei reipytyvõkuaa chupe oikuaa hag̃ua hetave Testígope umi asambleahápe. Koʼãichagua okasiónpe pe estudiánte ohecháta ijeheguiete ñanediferenteha umi kristiáno guaʼúgui, pórke Jehová puévlo ojoayhu (Juan 13:35). Amáske pe estudiánte oikuaa ha omombaʼe Jehová organisasión, péva oipytyvõta chupe oñemoag̃uive hag̃ua Jehováre.

JAIPURÚKENA UMI PUVLIKASIÓN BÍBLICA

²² Pe primer síglope umi kristiáno kyreʼỹme opredika vaʼekue umi notísia porã. Haʼekuéra okopia Ñandejára Ñeʼẽ imbaʼerã ha oipuru hag̃ua kongregasiónpe. Umi kristiáno omokyreʼỹ vaʼekue ótrope ostudia hag̃ua Ñandejára Ñeʼẽ. Umi kópia ojapóva hikuái ningo saʼieterei vaʼekue, upévare umi hénte omombaʼeterei vaʼekue umíva (Col. 4:16; 2 Tim. 2:15; 3:14-17; 4:13; 1 Ped. 1:1). Koʼág̃arupi umi testígo de Jehová oipuru umi imprénta modérna oimprimi hag̃ua hetaiterei Biblia ha puvlikasión ojepurúva ojestudia hag̃ua la Biblia. Por ehémplo tratádo, folléto, lívro ha rrevísta ojejapóva hetaiterei idiómape.

²³ Repredikávo umi notísia porã umi héntepe, reñehaʼã vaʼerã avei reipuru umi puvlikasión ojapóva Jehová organisasión. Ndéve ningo hetáma nepytyvõ umi puvlikasión ojapóva umi testígo de Jehová, upéva nemomýi vaʼerã rekompartise hag̃ua avei umi informasión ótrondi (Heb. 13:15, 16).

²⁴ Koʼág̃arupi heta hetave hénte oipuru pe Internet oheka hag̃ua informasión. Upévare ndahaʼéi umi puvlikasión bíblicante jarekóva jaikuaauka hag̃ua umi notísia porã, síno ideprovechoiterei ñande sítio ofisiál jw.org. Umi hénte oĩva ko múndo tuichakuére ikatu olee térã ohendu umi gravasión tahaʼe de la Biblia térã ótra puvlikasión hetaiterei idiómape. Umi persóna okyhyje léntova oñeʼẽ hag̃ua ñanendive térã umi oikóva umi lugár ijetuʼuhápe oñeg̃uahẽ hag̃ua ojepredika, ikatu oikuaa umi mbaʼe jagueroviáva oipurúvo ñande sítio jw.org hogaitépe voi.

²⁵ Upévare ñande siémpre ñamombeʼu ótrope jarekoha pe páhina jw.org. Peteĩ ogajára oikuaaséramo umi mbaʼe jagueroviáva ikatu jaipuru ñane teléfono térã távlet jaike hag̃ua pe sítio jw.org-pe jahechauka hag̃ua chupe la rrespuésta. Jatopáramo peteĩ persóna oñeʼẽva ótro idióma térã lenguaje de señas ikatu jahechauka chupe pe páhina de Internet oheka hag̃ua la Biblia ha ótra puvlikasión iñidiomaitépe. Heta puvlikadór oipuru umi vidéo oĩva ko páhinape oñepyrũ hag̃ua oñeʼẽ la Bíbliare la héntendi.

PREDIKASIÓN INFORMÁL

²⁶ Jesús heʼi vaʼekue umi ohendúvape imensáhe: “Peẽ ningo pe lus oĩva ko múndope. [...] Pehesape vaʼerã umi hénte renondépe, ikatu hag̃uáicha haʼekuéra ohecha umi mbaʼe porã pejapóva ha ombotuicha pende Ru oĩva yvágape” (Mat. 5:14-16). Enterovéva umi hénte ohechakuaa vaʼekue umi disípulo osegiha Jesús ehémplo ha ojapoha Ñandejára oipotáva. Jesús heʼi vaʼekue ijehe: “Che hína pe lus ohesapéva ko múndo”. Jesús omoĩ ehémplo porã ohejávo “pe lus oporomoingovéva” ohesape ikatu hag̃uáicha enterovéva ohendúva chupe oñevenefisia (Juan 8:12).

²⁷ Apóstol Pablo oheja vaʼekue ñandéve peteĩ ehémplo iporãva (1 Cor. 4:16; 11:1). Oĩrõ guare Aténaspe opredika vaʼekue káda día umi otopávare pe merkádope (Hech. 17:17). Umi kristiáno Filiposgua osegi avei iñehémplo. Upévare Pablo heʼi haʼekuéra ‘ipotĩha oikóramo jepe ko henerasión aña apytépe, ndojapóiva iporãva’, ha ‘ijapytepekuéra ohesapeha hikuái peteĩ mbaʼerendýicha ko múndope’ (Filip. 2:15). Koʼág̃a avei ñane ñeʼẽ ha ñane kondúkta rupive jaheja pe añetegua oñeʼẽva pe Rréinore omimbi ha jaaprovecha entéro oportunida ñañeʼẽ hag̃ua umi notísia porãre. Añetehápe umi hénte ohecharamo mbaʼéichapa ñaneonrrádo ha jajeporta porã, ha ohechakuaa ñanediferenteha ko múndogui. Péro ñañeʼẽvo chupekuéra umi notísia porãre ontendéta hikuái mbaʼéicha rupípa ñanediferénte umi ótro héntegui.

²⁸ Heta testígo de Jehová oñeʼẽ umi notísia porãre itravahohápe, eskuélape, koléhiope, kolektívope térã oimeha lugár oikohárupi. Javiaha jave mombyry ikatu jaaprovecha japredika hag̃ua umi oviahávape avei. Káda uno jaaprovecha vaʼerã umi oportunida japredika hag̃ua umi héntepe, por ehémplo ñañemongetahágui peteĩ mbaʼére, ñambohape ñañeʼẽ hag̃ua chupekuéra la Bíbliare.

²⁹ Japredika hag̃ua kyreʼỹme ñanemanduʼa vaʼerã péicha ñamombaʼeguasuha hína ñande Apoharépe ha ñambotuichaha héra. Avei ikatúta ñaipytyvõ umi ipyʼaporãvape oikuaa hag̃ua Jehovápe, péicha haʼekuéra ikatúta oservi Jehovápe ha orekóta esperánsa oikovévo opa árare ojeroviágui Jesucristo rehe. Jehová oguerohoryeterei umi mbaʼe jajapóva japredika hag̃ua entérope, ha ohecha peteĩ servísio sagrádoramo (Heb. 12:28; Apoc. 7:9, 10).

PE KONGREGASIÓN TERRITÓRIO

³⁰ Jehová oipota umi notísia porã oñeʼẽva Irréinore oñemog̃uahẽ oparupiete ko múndope, tahaʼe siuda térã kampañaháre. Upearã pe sukursál oasigna jepi peteĩ território umi kongregasiónpe ha avei umi ermáno oikóvape umi lugár mombyryvehápe (1 Cor. 14:40). Ñandejára odirihi vaʼekue avei péicha ojejapo hag̃ua pe primer síglope (2 Cor. 10:13; Gál. 2:9). Koʼã ára pahápe pyaʼeterei okakuaa pe organisasión, ha heta mbaʼe porã ojehupyty pe território opredikáva pe kongregasión oñeorganisa porãramo.

³¹ Pe superintendénte de servísio oorganisa mbaʼéichapa oñembaʼapóta umi território. Peteĩ siérvo ministeriál ikatu oasigna umi território. Oĩ território de grúpo ha território personál. Umi kongregasión orekóvape saʼi território, oñemeʼẽ káda superintendénte de grúpope unos kuánto território ikatu hag̃uáicha igrúpo opredika upépe. Péro umi kongregasión orekóvape heta território umi puvlikadór ikatu oreko peteĩ território personál.

³² Peteĩ puvlikadór orekóramo território personál ikatu oho opredika upépe ndojejapói jave enkuéntro, térã ndopytaporãirõ chupe oho hag̃ua pe grúpondi. Por ehémplo algúno oreko iterritório itraváho ypýrupi opredika hag̃ua odura aja pe páusa oñemeʼẽva ojekaru hag̃ua térã opoi rire. Oĩ família ojeruréva iterritoriorã ag̃uimi hógagui opredika hag̃ua kaʼarupytũ. Umi puvlikadór orekóramo território personál ikatu oipuru porãve pe tiémpo omboykéva opredika hag̃ua. Umichagua território ikatu avei ojepredika en grúpo. Reipotáramo território personál ikatu rejerure pe ermáno oñenkargávape umi territóriore.

³³ Pe superintendénte de grúpo térã pe puvlikadór orekóva ikárgope peteĩ território oñehaʼã vaʼerã oñeʼẽ peteĩ persónandi jepe káda óga oĩvape pe territóriope. Ojejapo jave umi arréglo ojekuvri hag̃ua pe território, ojesegi vaʼerã la heʼíva umi léi de proteksión de dáto. Ndohasái vaʼerã 4 mése ojekuvri hag̃ua pe território oguerekóva ikárgope pe superintendénte de grúpo térã pe puvlikadór. Oñekompleta rire pe território oñemombeʼu vaʼerã pe ermáno enkargádope. Pe superintendénte de grúpo térã pe puvlikadór ikatu ontrega pe território pe ermáno enkargádope térã ikatúnte oñepyrũ jey opredika upe território.

³⁴ Entéro puvlikadór ombaʼapo porãrõ oñondivepa, pe território ikatúta ojekuvripaite. Péicha umi grúpo térã puvlikadór ndoikomoʼãi og̃uahẽ joʼa el mísmo territóriope, péva oikórõ ikatu umi ogajára ipochy. Jarekóramo enkuénta koʼã mbaʼe jahechauka hína ñamombaʼeha ñane ermanokuérape ha umi héntepe.

ÑAMBAʼAPO OÑONDIVEPA JAPREDIKA HAG̃UA UMI OÑEʼẼVAPE ÓTRO IDIÓMA

³⁵ Enterovéva tekotevẽ oikuaa Jehovápe, Itaʼýrape ha ontende mbaʼépa hína Ñandejára Rréino (Apoc. 14:6, 7). Ñande ñaipytyvõse umi héntepe, tahaʼe haʼéva iñidióma ojerovia hag̃ua Jehováre ha ojesalva hag̃ua hikuái. Péicha avei ikatúta ikondúkta porã hikuái osegívo Cristo ehémplo (Rom. 10:12, 13; Col. 3:10, 11). ¿Mbaʼépa ijetuʼu jepi umi território oĩhápe oñeʼẽva diferénte idióma? ¿Mbaʼépa ikatu ojejapo oñemog̃uahẽ hag̃ua umi notísia porã umi héntepe pe idióma ontendevévape? (Rom. 10:14).

³⁶ Oñeasigna hag̃ua peteĩ kongregasiónpe umi território ojereko enkuénta pe idióma. Umi lugár oñeñeʼẽhápe diferénte idióma opredika umi puvlikadór diferénte kongregasiongua. Péicha jave iporãve káda kongregasión opredika umi persóna oñeʼẽvape pe idióma ikongregasionpegua. Péicha ojejapóta avei oĩ jave káda áño umi kampáña espesiál de invitasión. Péro ojepredika jave oĩhápe heta hénte térã informálmente, umi puvlikadór ikatu oñeʼẽ oimeraẽvandi tahaʼe haʼéva idiómape.

³⁷ Heta vése umi kongregasión oñeñeʼẽhápe ótro idióma ndaikatúi okuvri umi território mombyrýva chuguikuéra. Upéicha jave umi superintendénte de servísio umi kongregasionpegua oñeʼẽ vaʼerã oñondive ojapo hag̃ua umi arréglo opyta porãvétava ojepredika hag̃ua umi territóriope. Péicha ndojeikomoʼãi oñeg̃uahẽ joʼapa umi ógape ha avei entéro persóna oguerekóta oportunida ohendúvo pe mensáhe (Prov. 15:22).

³⁸ ¿Mbaʼépa jajapo vaʼerã oñatendéramo ñanderehe peteĩ persóna oñeʼẽva ótro idiómape? Ani ñapensa outanteha voi peteĩ puvlikadór oñeʼẽva iñidióma opredika hag̃ua chupe. Oĩ ermáno oaprendéva peteĩ presentasión isensíllova peteĩ idióma otopávape jepi iterritóriope. Ikatu jahechauka pe persónape mbaʼéichapa ikatu olee ha omboguejy puvlikasión iñidiómape ñane páhina de Internétgui jw.org, térã jajeofrese ñande voi jagueru hag̃ua chupe peteĩ puvlikasión iñidiómape.

³⁹ Pe persóna añetehápe oikuaasevéramo la Biblia omboʼéva, ñañehaʼãmbaite vaʼerã jatopa peteĩ ermáno oñeʼẽvape iñidiómape oipytyvõ hag̃ua chupe. Ikatu avei ñamombeʼu chupe moõpa upe sónarupi ojejapo umi rreunión iñidiómape. Pe persóna oipotáramo peteĩ ermáno oñeʼẽva iñidiómape oipytyvõ chupe, ikatu jahechauka pe persónape mbaʼéichapa ñande sítio jw.org rupive ikatu ojerure upéva omoingévo idatokuéra. Upe rire pe sukursál oñehaʼãmbaitéta otopa hag̃ua peteĩ grúpo, peteĩ kongregasión térã peteĩ ermáno hiʼag̃uíva chugui ha ikatúva oipytyvõ pe persónape.

⁴⁰ Jasegi vaʼerã javisita upe persónape haʼe heʼi peve ñandéve oñekomunikamaha hendive peteĩ ermáno oñeʼẽva iñidiómape. Sapyʼánte pe sukursál oavisáta umi ansiánope ndojetopái hague ni peteĩ ermáno oñeʼẽva upe idiómape. Oikóramo upéva, ñande ñañehaʼãmbaite vaʼerã jasegi ñaipytyvõ pe persónape. Ikatúramo jastudia vaʼerã la Biblia hendive, ha upearã jaipurukuaa peteĩ puvlikasión oĩva iñidiómape. Jaipuru porãramo umi divúho térã fóto oĩva pe puvlikasiónpe ha jajeruréramo chupe tolee umi téxto, haʼe ontendétama ohóvo algúna kósa oĩva la Bíbliape. Oĩramo peteĩva ifamíliape oñeʼẽva umi mokõi idiómape, haʼe ikatu otradusi umi mbaʼe ojeʼéva.

⁴¹ Ñaipytyvõ hag̃ua umichagua persónape oñemoag̃uive hag̃ua Ñandejára organisasiónre, ñainvita vaʼerã chupe umi rreunionrã nontendepáiramo jepe la ojeʼéva upépe. Ojelee vove umi téxto ikatu ñaipytyvõ chupe oheka hag̃ua ibíbliape oimérõ oĩ iñidiómape. Pe persóna oĩ haguérente voi umi ermáno ndive ikyreʼỹvéta ha oipytyvõta chupe oprogresa hag̃ua.

⁴² Pregrúpo: Haʼe hína peteĩ grúpo michĩva de puvlikadór opredikáva peteĩ idióma diferénte upe oñeñeʼẽvagui ikongregasiónpe, ndaipóriramo jepe ansiáno ni siérvo ministeriál ikatúva ojapo umi rreunión káda semána upe idiómape. Pe sukursál ikatu oaprova ojejapo hag̃ua peteĩ pregrúpo ha onombráta peteĩ kongregasión anfitrióna, térã oñenkargátava pe pregrúpore. Upearã oñekumpli vaʼerã koʼã rrekisíto:

1. 1) Pe territóriope oĩ vaʼerã unos kuánto oñeʼẽva peteĩ idióma diferénte upe oñeñeʼẽvagui pe kongregasiónpe.

2. 2) Oĩ vaʼerã unos kuánto puvlikadór oñeʼẽkuaáva upe idióma térã oaprendeséva hína.

3. 3) Pe kuérpo de ansiáno oĩ vaʼerã dispuésto oorganisa hag̃ua pe predikasión upe idiómape.

Pe kuérpo de ansiáno orekoséramo peteĩ pregrúpo, oñeʼẽ vaʼerã pe superintendénte de sirkuíto ndive. Haʼe ikatu oikuaa hína oĩha ótra kongregasión opredikaséva avei umi hénte oñeʼẽvape upe idiómape, ha ikatu omeʼẽ informasión oipytyvõtava ojekuaa hag̃ua mbaʼe kongregasiónpepa opyta porãvéta oreko hag̃ua pe pregrúpo. Ojekuaa vove mbaʼe kongregasiónpepa opyta porãve oreko ikárgope pe pregrúpo, umi ansiáno oskrivíta pe sukursálpe ha ojeruréta oĩ hag̃ua ofisiálmente peteĩ pregrúpo oñeʼẽva ótro idiómape ikongregasión kárgope.

⁴³ Grúpo: Pe sukursál ikatu oaprova ojejapo hag̃ua peteĩ grúpo odependéva peteĩ kongregasiónre oñekumplíramo koʼã rrekisíto:

1. 1) Pe territóriope oĩ vaʼerã unos kuánto oñeʼẽva upe idióma ha oñeinteresáva pe mensáhere, ha ojekuaa vaʼerã pe grúpo ikatuha oprogresa.

2. 2) Oĩ vaʼerã algúno puvlikadór oñeʼẽkuaáva upe idióma térã oaprendéva hína.

3. 3) Oĩ vaʼerã peteĩ ansiáno térã siérvo ministeriál ikatútava odirihi peteĩ rreunión jepe káda semána upe idiómape, térã peteĩ párte jepe, por ehémplo pe diskúrso púvliko térã pe Ñemañaha Ñehesaʼỹijo.

Oñekumplíramo rrasonávlemente koʼã rrekisíto, pe kuérpo de ansiáno oskrivíta pe sukursálpe omeʼẽ hag̃ua umi detálle tekotevẽva pe grúpore. Haʼekuéra ojeruréta oĩ hag̃ua ofisiálmente peteĩ grúpo oñeʼẽva ótro idiómape ikongregasión kárgope. Pe ansiáno oñenkargátava upe grúpore oñehenóita “superintendénte de grúpo”, ha oĩramo peteĩ siérvo ministeriál kárgope oñehenóita “siérvo de grúpo”.

⁴⁴ Ojeaprova vove oĩ hag̃ua peteĩ grúpo, pe kuérpo de ansiáno upe kongregasiongua odesidíta mbaʼe párte umi rreuniónguipa ojejapovéta avei, ha mboy vésepa ojejapóta umi rreunión káda mes. Ikatu avei oñeorganisa pe grúpope g̃uarã umi aty predikasionrã. Enterove oĩva pe grúpope ombaʼapóta pe kuérpo de ansiáno poguýpe. Umi ansiáno ijekilivrádota omeʼẽvo instruksión ha kyreʼỹme oñatendéta umi mbaʼe oikotevẽvare pe grúpo. Pe superintendénte de sirkuíto ovisita vove pe kongregasión anfitriónape, ombaʼapóta avei pe grúpondi. Haʼe omondóta pe sukursálpe peteĩ infórme omombeʼuhápe mbaʼéichapa oho hese pe grúpo ha mbaʼépa oikotevẽ hikuái. Kon el tiémpo ikatu hína pe grúpogui oiko peteĩ kongregasión. Jehová ovyʼaitereíta enterovete ermáno osegíramo umi instruksión omeʼẽva iñorganisasión (1 Cor. 1:10; 3:5, 6).

PREDIKASIÓN DE GRÚPO

⁴⁵ Enterove kristiáno oñemeʼẽmava Jehovápe oreko pe rresponsavilida omombeʼúvo umi héntepe umi notísia porã. Oĩ heta fórma ikatúva jajapo upéva, péro ajépa javyʼaite jaha jave japredika ñane ermanokuérandi (Luc. 10:1). Upévare umi kongregasión ojapo arréglo ojepredika hag̃ua éntre semána ha fin de semanakue. Avei umi grúpo ikatu opredika feriádo jave, pórke heta ermáno ilívre ha ndohói itravahohápe. Pe komite de servísio de la kongregasión oorganisa vaʼerã umi aty predikasionrã. Koʼã aty ojejapo vaʼerã peteĩ óra ha lugár opyta porãvehápe enterovépe tahaʼe de diakue térã kaʼarupytũ.

⁴⁶ Japredika jave en grúpo ñambaʼapo oñondivepa ha ñanepytyvõ “ñañomokyreʼỹ” hag̃ua (Rom. 1:12). Umi puvlikadór pyahu ikatu opredika umi ikatupyryvévandi, péicha oaprendéta chuguikuéra. Oĩ lugár tekotevẽhápe mokõi térã mbohapy puvlikadór osẽ oñondive ipeligróso rupi pe sóna. Oiméramo rejapóta aktivida neaño, lomímonte ikatu reho pe aty ojejapóvape predikasión mboyve, péva omokyreʼỹta enterovépe. Pórke jaikuaáramo ótro ermáno opredikaha avei upérupi ñanemombareteve jasegi hag̃ua. Umi prekursór ha puvlikadór noñeñandúi vaʼerã ovligádo ohóvo káda aty predikasionrã ojejapóvape pe kongregasiónpe, koʼýte oĩramo káda día. Péro ikatúramo, iporãta ohóramo hikuái unos kuánto vése a la semána pe aty ojejapóvape predikasionrã.

⁴⁷ Jasegíkena Jesús ha ijapostolkuéra ehémplo. Ikatu ñaĩ segúro Jehová ñanevendesitaha ñañehaʼã haguére jajapo ikatúva guive japredika hag̃ua umi notísia porã enterovépe (Luc. 9:57-62).