Ñanemanduʼákena umi ndopredikavéiva ha ndohovéivare rreunionhápe
1. Mbaʼépa jajapovaʼerã ñamokyreʼỹ hag̃ua umi ndohovéivape rreunionhápe?
1 Jaikuaápa peteĩ ñane ermáno aréma ndopredikavéiva ha ndohovéiva rreunionhápe? Japredika jave ikatu jatopa peteĩ ermáno aréma ndohovéiva rreunionhápe, ha upéicha oñemomombyry Ñandejáragui. Péro ñanemanduʼavaʼerã haʼe ñane ermanoha gueteri. Jahechaukavaʼerã jahayhuha chupe ha ñaipytyvõ oñembyaty jey hag̃ua ñanendive, ha upéicha oñemboja jey pe ñane “ánga rehe oñangarekóva rendápe” (1 Ped. 2:25, BNP).
2. Mbaʼéichapa ikatu ñamokyreʼỹ umi ndohovéivape rreunionhápe?
2 Jahechauka jajepyʼapyha hesekuéra. Umi ndohovéiva rreunionhápe ohechakuaáta ñanemanduʼaha hesekuéra ñahenói térã javisitáramo chupekuéra. Mbaʼépa ikatu jaʼe? Ñamokyreʼỹta chupekuéra jaʼéramo: chemanduʼa kuri nderehe. Avei ñañeʼẽvaʼerã umi mbaʼe iporãva ha oporomokyreʼỹvare (Fili. 4:8). Ikatu ñamombeʼu chupekuéra ñandegustaitereihague peteĩ téma oñemeʼẽvaʼekue rreunionhápe. Ikatu avei ñainvita chupekuéra rreunionrã térã ñande aty guasuhápe, ha jaʼe chupekuéra oho hag̃ua ñanendive térã oguapy hag̃ua ñande ykére.
3. Mbaʼéichapa oñepytyvõraʼe peteĩ ermánape?
3 Ojepredika jave ojetopa peteĩ ermánare, ojapómava veinte áño nosẽveihague opredika ha ndohoveihague rreunionhápe. Ndostudiaséi jeýramo jepe la Biblia, peteĩ ermána ogueraha meme chupe umi rrevísta osẽ pyahúva. Ovisita jeývo chupe peteĩ asambléa de distríto rire, pe ermána omombeʼu chupe umi mbaʼe iñimportantevéva oñemeʼẽvaʼekue upe aty guasúpe. Upéva omokyreʼỹ chupe mbeguekatúpe oho jey hag̃ua rreunionhápe.
4. Mbaʼéichapa jatratavaʼerã peteĩ ndohoveivaʼekue rreunionhápe oñepyrũramo oho jey?
4 Oñembyaty jey vove ñanendive. Mbaʼéichapa jatratavaʼerã umi aréma ndohovéiva rreunionhápe ha oñepyrũramo oho jey? Jahechami mbaʼéichapa Jesús otratavaʼekue hemimboʼekuérape, oheja reírõ guare chupe hikuái. Mborayhúpe ohenói chupekuéra “che ermanokuéra”. Avei ohechauka ojeroviaha hesekuéra ohejávo chupekuéra ojapo hag̃ua peteĩ tembiapo iñimportánteva (Mat. 28:10, 18, 19, BNP). Upe riremínte oñepyrũma omombeʼu “meme” hikuái pe marandu porã opavavépe (Hech. 5:42, BNP).
5. Emombeʼu mbaʼéicha javépa ñañeʼẽ raẽ vaʼerã ansianokuéra ndive.
5 Jastudia mboyve peteĩ ndohovéiva ndive rreunionhápe térã jaʼe mboyve chupe ñanemoĩrũ hag̃ua predikasiónpe, ñañeʼẽ raẽ vaʼerã umi ansiánondi. Japredikaha rupi jajuhúramo peteĩ nosẽvéiva opredika térã ndohovéiva rreunionhápe, ñamombeʼuvaʼerã umi ansiánope ikatu hag̃uáicha oipytyvõ chupe.
6. Mbaʼéichapa ñañeñandúta ñaipytyvõramo umi nosẽvéivape opredika ha ndohovéivape rreunionhápe?
6 La Biblia ohechauka porã Ñandejárare ojeroviáva añoite ipaha peve, oikovetaha (Mat. 24:13). Upévare, ñaipytyvõkena umi nosẽvéivape opredika ha ndohovéivape hína rreunionhápe. Jahayhúramo chupekuéra Jehová ñanderayhuháicha ha jajepyʼapy añetéramo hesekuéra, ñanembovyʼáta jahechávo ou jey hikuái rreunionhápe ha osẽ jeývo opredika ñanendive (Luc. 15:4-10).