Emokyreʼỹkena umi inaktívope

Káda áño heta ermáno inaktívo oho Konmemorasionhápe. Haʼekuéra ningo ñepyrũrã oservi porã vaʼekue Jehovápe, péro upéi ohechaukaháicha pe folléto Eñemoag̃ui jeýna Jehováre, heta mbaʼére ikatu oime ou ikangy ha noñemoag̃uivéi hese (Heb 12:1). Upéicharõ jepe, umi inaktívo ivaliosoiterei gueteri Jehovápe g̃uarã, pórke haʼe omeʼẽ vaʼekue avei Itaʼýra Jesús rekove hesehapekuéra (Hch 20:28; 1Pe 1:18, 19). ¿Mbaʼéichapa ikatu ñaipytyvõ chupekuéra oñemboja jey hag̃ua kongregasiónpe?

Peteĩ pastór ohekaháicha umi ovecha oñemombyry vaʼekuépe pe ijovecha atýgui, upéicha avei umi ansiáno oñehaʼã oñemongeta umi ermáno inaktívo ndive ha oipytyvõ chupekuéra (Lu 15:4-7). Upéva ohechauka Jehová ohayhu ha oñeinteresaha hesekuéra (Jer 23:3, 4). Péro ndahaʼéi ningo umi ansiáno añónte la ikatúva oipytyvõ koʼã ermánope, síno enterovéva ikatu jajapo upéva. Jehová ningo oguerohoryetereíta ñanembaʼeporãramo koʼã ermánondi ha jajapóramo opa ikatúva jahechauka hag̃ua jahayhuha chupekuéra. Katuete ovaléta la péna umi mbaʼe jajapóva (Pr 19:17; Hch 20:35). Upévare, epensamína peteĩ ermáno térã ermána ikatúvare eipytyvõ ha eñehaʼã pyaʼe voi ejapo upéva.

EHECHA PE VIDEÓ “ÑAMOKYREʼỸKENA UMI INAKTÍVOPE” HA UPÉI EKONTESTA KOʼÃ PREGÚNTA:

• ¿Mbaʼépa ojapo vaʼekue Abbey oikuaárõ guare peteĩ ermána inaktívape?

• ¿Mbaʼérepa ñañeʼẽ raẽ vaʼerã ansianokuérandi oimérõ ñaipytyvõse hína peteĩ inaktívope?

• ¿Mbaʼéichapa ojeprepara Abbey oho mboyve ovisita jey Láurape?

• ¿Mbaʼéichapa Abbey ohechauka noñentregaiha, ipasiensiaha ha oporohayhuha oipytyvõrõ guare Láurape?

• ¿Mbaʼépa ñaaprende pe ehémplo Jesús omoĩ vaʼekuégui Lucas 15:8-10-pe?

• ¿Mbaʼépa ojehupyty enterovéva oñehaʼã haguére oipytyvõ Láurape?