Jehová ‘omokyreʼỹ umi ikaneʼõvape’
1 Opavave ñanekaneʼõ sapyʼánte ñambaʼapoitereígui térã umi provléma jahasávare, ñaime rupi ‘ára ipohýivape’ (2 Tim. 3:1, BNP). Mbaʼéichapa ikatu ñanekyreʼỹve japredika meme hag̃ua ñande rapichakuérape? Jajerovia rupi Jehováre. Haʼe niko “ipuʼaka mbarete” (Isa. 40:26). Oikuaa avei ñane remikotevẽ ha ñanepytyvõse (1Ped. 5:7).
2 Umi mbaʼe porã omeʼẽva ñandéve Jehová. Oiporuhaguéicha Jehová ijespíritu sánto ojapo hag̃ua opa mbaʼe oĩva ko múndope, oiporu avei ijespíritu ñanemombarete ha ‘ñanemokyreʼỹ jey’ hag̃ua ñanekaneʼõ jave (Isa. 40:31). Ñañeporanduvaʼerã: “Arakaʼépa añemboʼeraʼe Jehovápe ajerure hag̃ua chupe ijespíritu sánto, ajapo hag̃ua hembipota?” (Luc. 11:11-13).
3 Jalee meméramo Ñandejára Ñeʼẽ ha jajepyʼamongeta hese, ha ñahesaʼỹijo meméramo umi puvlikasión oúva pe tembiguái jeroviaha ha iñarandúvagui, jajoguáta peteĩ “yvyra mátape oñeñotỹva y rembeʼýpe, hiʼáva hiʼárape, ha ndahoguekúiriva” (Sal. 1:2, 3).
4 Jehová oiporu avei isiervokuérape ñanemokyreʼỹ hag̃ua (Col. 4:10, 11). Ñañemongetávo hendivekuéra, ñahendúvo umi komentário ha diskúrso porã omeʼẽva rreunionhápe, tuichaiterei ñanemokyreʼỹ (Hech. 15:32). Koʼýte umi ansianokuéra ñanepytyvõ ha ñanemokyreʼỹ (Isa. 32:1, 2).
5 Predikasión. Ñanekaneʼõramo jepe, japredikavaʼerã. Jajapo meméramo upéva nañanekaneʼõmoʼãi, ñanemokyreʼỹvéta uvei (Mat. 11:28-30). Ñamombeʼúramo pe marandu porã ñanepytyvõta ñamotenonde hag̃ua Jehová Goviérno ha ani hag̃ua ñanderesarái umi mbaʼe porãita ñaneraʼarõvagui, umíva apytépe pe jeikove opaʼỹva.
6 Heta mbaʼe gueteri oĩ jajapovaʼerã Jehová ohundi mboyve ko múndo aña. Heta mbaʼe oĩ ñanemokyreʼỹva japredika meme hag̃ua, ‘Ñandejára voi omeʼẽgui ñandéve pe puʼaka’ (1Ped. 4:11, JMP). Haʼe ñanepytyvõ rupi ikatúta jajapopa pe tembiapo omeʼẽvaʼekue ñandéve. Upearã Jehová “omokyreʼỹ ikaneʼõvape” (Isa. 40:29).