Japredikávo jajeroviave Jehováre
1. Mbaʼe mbaʼépa jahupyty japredikávo?
1 Ñande ningo jajapose Jehová oguerohorývante, upévare ñasẽ meme japredika. Ha heta mbaʼe porã jahupyty ‘ñamoherakuãvo Ñandejára Ñeʼẽ’, pór ehémplo jajeroviave Hese ha javyʼave jajapóvo la Biblia heʼíva (2 Tim. 4:2 BNP; Isa. 48:17, 18). Mbaʼéichapa ikatu jajeroviave Jehováre ha javyʼave japredikávo?
2. Mbaʼéicha rupípa imbareteve ñande jerovia japredikávo?
2 Ñanemombarete ha heta mbaʼe porã jahupyty. Japredikávo jajesareko porãve umi mbaʼe oguerútavare Ñandejára Rréino ha ñamboykeve ñane provlemakuéra (2 Cor. 4:18). Ha ñamboʼévo ñande rapichakuérape la Biblia heʼíva, jajeroviave umi mbaʼe porã Ñandejára oprometévare, ha ñamombaʼeve Ñandejára Ñeʼẽme oĩva (Isa. 65:13, 14). Avei ñaipytyvõvo chupekuéra oikuaave hag̃ua Ñandejárape ha ani hag̃ua ojeheʼa ko múndore, ñande voi ñañemombareteve (Juan 17:14, 16; Rom. 12:2).
3. Mbaʼépepa ñanepytyvõ avei japredikávo?
3 Japredikávo ñanepytyvõ avei ñamoheñói hag̃ua umi mbaʼe porã oúva Ñandejáragui. Pór ehémplo, ñaneumildeve ñañehaʼãramo jajapo ikatúva guive ñaipytyvõ hag̃ua ñande rapichakuérape (1 Cor. 9:19-23). Ha ñañemongetáramo umi ‘ikaneʼõ ha ikangývandi ku ovecha herekuaʼỹvaicha’, jaiporiahuvereko ha ñaipytyvõséta katuete chupekuéra (Mat. 9:36). Ha ndahaʼéi upéva añónte, ñambohovaikuaávo umi nañanerenduséivape térã oñemoĩvape ñanderehe, ñaaguantavéta avei. Ha javyʼave ningo ñañehaʼãvo ñande rapichakuéra rehehápe (Hech. 20:35).
4. Mbaʼérepa ndéve g̃uarã iñimportánte pe predikasión?
4 Ajépa hetaite mbaʼe porã jahupyty japredikávo! Péicha ningo ñanembareteve ha ñamombaʼeguasu Jehovápe. Haʼe ovendesíta katuete umi oñehaʼã memévape ‘omoherakuã hekopete pe marandu porã’ (Hech. 20:24).