Ñadefendépa Ñandejára Ñeʼẽ?
1 Hetáramo jepe nomombaʼéiva la Biblia, umi kristiáno añetéva odefende Ñandejára Ñeʼẽ. Haʼekuéra oikuaa porã haʼeha “Ñandejára remimoĩuka”. Ohecha hikuái Ñandejára Ñeʼẽ Jesucristo ohechaháicha, haʼe oñemboʼevaʼekue Jehovápe: “Ne ñeʼẽ niko añetegua” (2 Tim. 3:16; Juan 17:17). Mbaʼéichapa ikatu ñadefende mbarete Ñandejára Ñeʼẽ?
2 Ñanemanduʼákena umi téystore. Jesús ostudia meme vaʼekue Ñandejára Ñeʼẽ, upéicha rupi oiporu meme vaʼekue oporomboʼe hag̃ua (Luc. 4:16-21; 24:44-46). Mbaʼépa ikatu jajapo opyta hag̃ua ñane akãme umi téysto? Upearã jalee meme vaʼerã Ñandejára Ñeʼẽ ha jajepyʼamongeta umi téysto ñanemokyreʼỹvare térã ikatúva jaiporu predikasiónpe. Jastudia jave rreunionrã jahekavaʼerã umi téysto ha ñapensa mbaʼéichapa ikatu ñakomenta hese. Rreunionhápe katu jahekavaʼerã umi téysto ojeleéva. Jaikuaáramo heta téysto ikatúta “ñamboʼe hekoitépe pe ñeʼẽ añetegua” (2 Tim. 2:15, BNP).
3 Jaiporuvaʼerã Ñandejára Ñeʼẽ. Jaiporuvaʼerã la Biblia japredika jave. Ikatútaramo peteĩ téysto jepe jaleevaʼerã umi ñanerendúvape. Oñeporandúramo ñandéve peteĩ mbaʼére térã ndojegueroviáiramo pe jaʼéva, jaiporuvaʼerã Ñandejára Ñeʼẽ ñambohovái hag̃ua. Pe ogajára hembiapoitereíramo ikatu jaʼe chupe: “Aha mboyve, aleesemi ndéve sapyʼaite peteĩ téysto”. Ikatútaramo jahechaukavaʼerã voi chupe moõitépa jaleeñaína.
4 Peteĩ puvlikadór ohechauka rire peteĩ karaípe la Biblia nomboʼeiha Trinidad, pe karai heʼi: “Heta áñoma aháva iglésiape ha ndaikuaáiva la Biblia nomboʼeiha upéva”. Upe rire ostudia la Biblia. Jesús heʼivaʼekue ijovechakuéra ohendutaha iñeʼẽ (Juan 10:16, 27). Iporãiteve jaleéramo Ñandejára Ñeʼẽ voi ñande rapichápe, ohecha hag̃ua añeteguaha pe ñamboʼéva. Jajapóramo upéicha, ñadefendeñaína Ñandejára Ñeʼẽ.