Jaikekuaákena ñaporomboʼe jave
1. Mbaʼépa jajapovaʼerã ñaporomboʼe hag̃ua hekoitépe?
1 Apóstol Pablo ningo ikatupyryvaʼekue ‘oporomboʼe hag̃ua hekoitépe pe ñeʼẽ añetegua’. Haʼe oikekuaavaʼekue hapichakuérape, ndahaʼéi ku heʼínteva de memória umi téysto (2 Tim. 2:15, BNP). Ñande avei ñaporomboʼe hag̃ua hekoitépe tekotevẽ ñahaʼanga chupe. Mbaʼépa jajapovaʼerã jaikekuaa hag̃ua ñande rapichakuérape ñaporomboʼe jave? Jahechamína mbohapy mbaʼe (Hech. 28:23).
2. Mbaʼépa ikatu jajapo umi ñanerendúva omombaʼe hag̃ua Ñandejára Ñeʼẽ?
2 Jaiporúkena la Biblia. Primero, jaiporuvaʼerã la Biblia umi ñanerendúva omombaʼe hag̃ua heʼíva ipype. Jajeroviáramo Ñandejára Ñeʼẽre ñamokyreʼỹta umi ñanerendúvape ojapysaka porãve hag̃ua umi téystore (Heb. 4:12). Pór ehémplo ikatu jaʼe: “Chéve tuichaiterei chepytyvõ aikuaa rire mbaʼépa Ñandejára opensa ko mbaʼére. Emañamína mbaʼépa heʼi Iñeʼẽ”. Ñañehaʼãmbaitékena jalee chupekuéra la Biblia ohechakuaa hag̃ua ndahaʼeiha ñandejehegui reínte ñañeʼẽva.
3. Mbaʼépa iporã jajapo jaleepa rire peteĩ téysto?
3 Segundo, ñamyesakãvaʼerã umi téysto jaleepa rire. Heta héntepe ijetuʼu ontende hag̃ua ohendúvo primera vés peteĩ téysto la Bíbliagui. Upévare tekotevẽ ñamyesakã mbaʼéichapa oho upe téysto pe téma ñañeʼẽvare (Luc. 24:26, 27). Iporãta avei jaʼe jeýramo umi párte iñimportantevéva ha ñaporandúramo umi mbaʼe jahechavaʼekue, upéicha japilláta oimépa ñanentende (Pro. 20:5; Hech. 8:30).
4. Mbaʼépa jajapovaʼerã jaikekuaa hag̃ua ñande rapichápe ñaporomboʼe jave?
4 Jaiporúkena la Biblia ñamopensa hag̃ua ñande rapichápe. Tercero, jaiporuvaʼerã la Biblia ikatu hag̃uáicha umi ñanerendúva ontende umi mbaʼe jaʼéva ha upéicha opoko ikorasõre. Jahechaukavaʼerã mbaʼéichapa upe téysto ikatu oipytyvõ chupe. Oleéramo la Bíbliagui voi ikatu ohechakuaa mbaʼérepa iñimportánte okambia opensa lája (Hech. 17:2-4; 19:8). Pór ehémplo, jaleepa rire Salmo 83:18 ikatu jaʼe: “Jaikuaa porãve hag̃ua ñande rapichápe tekotevẽ jaikuaa raẽ héra, ajépa? Ndépa mbaʼe repensa, ikatúnepa reñemboʼe porãve Ñandejárape reiporúramo héra?”. Pe ogajára ohechakuaáramo mbaʼépepa ideprovéchota chupe upe téysto omombaʼevéta Ñandejára Ñeʼẽ. Upévare jaikekuaákena ñande rapichápe ñaporomboʼe jave, upéicha umi ipyʼaporãva oñemoag̃uisevéta Ñandejára oikovévare omombaʼeguasu hag̃ua chupe (Jer. 10:10).