Ñamombaʼevaʼerã Jehová omeʼẽva ñandéve jajapo hag̃ua
1 Ymaite guive, Jehová omeʼẽ opaichagua mbaʼe porã isiervokuérape ojapo hag̃ua, tahaʼe imitã térã itujávape, kuimbaʼe térã kuñávape, imboriahu térã oĩ porãvape (Luc. 1:41, 42; Hech. 7:46; Fili. 1:29). Upéichapa avei koʼág̃a rupi? Mbaʼeichagua mbaʼe porãpa omeʼẽ ñandéve Jehová jajapo hag̃ua?
2 Umi mbaʼe porã omeʼẽva ñandéve jajapo hag̃ua. Tuichaiterei mbaʼe ñandéve g̃uarã Jehová ñanerekomboʼe (Mat. 13:11, 15). Umi rreunionhápe katu ikatu voi ñakomenta ha upéicha ñamombaʼeguasu chupe (Sal. 35:18). Jahechakuaáramo koʼã mbaʼe, ñamombaʼéta oñemeʼẽ jave ñandéve ñakomenta térã jajapo hag̃ua oimeraẽ ótro tembiapo. Koʼã mbaʼe jajapovaʼerã kyreʼỹme ha iporãve hag̃uáicha. Ñaipytyvõpa jepi oñemopotĩ hag̃ua Salón del Reino ha oñeñangareko hag̃ua hese? Upéva avei peteĩ mbaʼe porã Jehová omeʼẽva ñandéve jajapo hag̃ua.
3 Hetaiterei ñande rapicha ndoikuaái oñehendúpa chupekuéra oñemboʼe jave. Ñande katu jaikuaa porã ñanerenduha pe Iñimportantevéva opavavégui (Pro. 15:29). Jehovaite voi ñanerendu ñañemboʼe jave chupe (1 Ped. 3:12). Haʼe arakaʼeve ndeʼíri mboy vésentepa ikatu ñañemboʼe chupe. Oheja katu ñandéve ñañemboʼe chupe ‘opa árape’ (Efe. 6:18).
4 ‘Ñamoirũ Ñandejárape hembiapópe.’ Upéva peteĩ mbaʼe ijojahaʼỹva omeʼẽva ñandéve Ñandejára jajapo hag̃ua, ha ñamoirũñaína chupe ñamoherakuãvo pe marandu porã (1 Cor. 3:9). Ko tembiapo ñanemokyreʼỹ ha ñanembovyʼaiterei (Juan 4:34). Ikatúramo jepe Jehová oiporu oimeraẽ mbaʼe omosarambi hag̃ua pe marandu, imbaʼeporãgui oheja ñandéve jajapo upéva (Luc. 19:39, 40). Ha ndahaʼéi opavavépe Jehová ohejáva opredika. Upearã jajapo raẽ vaʼerã heta mbaʼe Haʼe ojeruréva ñandehegui (Isa. 52:11). Upévare, ñamombaʼépa ko tembiapo ha ñamotenondépa jajapo hag̃ua káda semána?
5 Ñande ningo jaiko porãve Jehová omeʼẽ rupi ñandéve umi mbaʼe porã jajapo hag̃ua (Pro. 10:22). Aníkena ñaimoʼã vyroreiha koʼã mbaʼe! Jahechaukavaʼerã añetehápe ñamombaʼeha. Upéicharõ ñande Ru yvagapegua ñandeguerohorýta, chugui niko ou ‘opa mbaʼe porã ha hekopeguáva’ (Sant. 1: 17).