Ñañehaʼãvaʼerã jastudia la Biblia umi ñande rrevísta ohejavaʼekue ndive
1. Maʼerãpa ñaikuaveʼẽ ñande rrevísta?
1 Japredika jave sabadokue ñaikuaveʼẽ jepi ñande rrevísta Ñemañaha ha ¡Despertad! Péicha ñaipytyvõ ñepyrũ ñaína ñande rapichápe oguata hag̃ua Ñandejára rapére. Koʼág̃a jahechamíta mbaʼéichapa ikatu ñaikuaveʼẽ pe lívro Mbaʼépa omboʼe la Biblia? jaha jeývo pe óga jára rendápe ñañepyrũ hag̃ua jastudia hendive. Koʼã mbaʼe ikatu ñakambia opyta porãvetaháicha ñandéve ha ñande territóriope. Ikatu avei ñaikuaveʼẽ osẽ porãháicha jepi voi ñandéve.
2. Mbaʼéichapa ikatu jastudia ñepyrũ ñande rapicha ndive jaiporúvo pe lívro Mbaʼépa omboʼe la Biblia?
2 Jaiporúkena umi mbaʼe heʼíva iñepyrũmbýpe. Jaha jeývo ikatu jaʼe: “Umi rrevísta ahejavaʼekue ndéve oñeʼẽ la Bíbliare. Emañamína koʼápe mbaʼérepa tekotevẽte jalee”. Jalee hendive Isaías 48:17, 18; Juan 17:3, térã ambue téysto opyta porãtava. Upe rire ikatu ñaikuaveʼẽ pe lívro Mbaʼépa omboʼe la Biblia?, ha ñameʼẽ chupe.
◼ Upe rire jaʼe: “La Biblia heʼi ñandéve ñaneraʼarõha heta mbaʼe porã”. Jahechauka chupe umi páhina 4 ha 5, ha ñaporandu: “Mbaʼépa nde reipotave oiko koʼã mbaʼe apytégui?”. Ha jahecha pe kapítulo oñeʼẽva haʼe oipotávare oiko ha oñemongetasevéramo ñahesaʼỹijo mbykymi hendive peteĩ térã mokõi párrafo.
◼ Ikatu avei jaʼe: “Ñandejára Ñeʼẽ omombeʼu ñandéve heta mbaʼe jaikuaaséva”. Jahechauka páhina 6-pe heʼíva ha jaʼe chupe oñeporandúmavapa umi mbaʼe heʼíva upépe. Jahecha pe kapítulo ombohováiva upe porandu ha ñahesaʼỹijo mbykymi peteĩ térã mokõi párrafo.
◼ Ikatu avei jalee chupe oĩva pe Índisepe ha ñaporandu chupe mavaitévapa oikuaaseve. Upéi jahecha upe kapítulo ha ñamombeʼu mbykymi chupe mbaʼéichapa ikatu jastudia hendive la Biblia.
3. Mbaʼéichapa ikatu jastudia ñepyrũ ñande rapichándi jahejáramo chupe rrevísta oñeʼẽva a) umi mbaʼe vaieta oikóvare ko múndope? b) famíliare? c) ikatuha jajerovia la Bíbliare?
3 Japyta ñañeʼẽ jey hag̃uáicha peteĩ mbaʼére ñande rapichándi. Ikatu avei ñañeʼẽ ñepyrũme voi pe óga jára ndive jahecháma mbaʼérepa ñañeʼẽta jaha jeývape. Ohejávo ñandehegui umi rrevísta, ñaporandu peteĩ mbaʼe ha jaʼe chupe jaha jeývape ñañeʼẽtaha upévare. Jaʼevaʼerã chupe mbaʼe día ha mbaʼe órapa jaha jeýta ha jajapo upéicha (Mat. 5:37). Jaha jeýpe, ñamomanduʼa chupe mbaʼérepa ñañeʼẽraʼe. Upéi jaiporu pe lívro Mbaʼépa omboʼe la Biblia? jalee ha ñahesaʼỹijo hag̃ua sapyʼami peteĩ térã mokõi párrafo oñeʼẽva upévare. Ñameʼẽ chupe peteĩ lívro olee hag̃ua avei ñanendive. Koʼág̃a jahechamíta mbaʼépa ikatu ñaporandu chupekuéra:
◼ Jahejáramo pe óga járape peteĩ rrevísta oñeʼẽva umi mbaʼe vaieta oikóvare ko múndope, ikatu jaʼe: “Ndépa reikuaa mbaʼépa Ñandejára okambiáta ko Yvy ape ári? Ág̃a aju jeýpe ikatu jahecha mbaʼépa heʼi la Biblia upévare”. Jaha jeývo hendápe, ikatu jahecha hendive umi páhina 4 ha 5-pe heʼíva. Térã ikatu ñaporandu chupe: “Ñandejára voípa oipota oiko hetaite mbaʼe vai?”. Jaha jeývo, ikatu jahecha hendive kapítulo 1 ha umi párrafo 7 ha 8.
◼ Jahejáramo pe óga járape peteĩ rrevísta oñeʼẽva famíliare, ikatu ñaporandu chupe: “Mbaʼépa ikatu jajapo jaiko hag̃ua vyʼápe ñande rogapýpe?”. Jaha jeývape ñahesaʼỹijo hendive kapítulo 14 ha párrafo 4.
◼ Ha pe rrevísta heʼíramo ikatuha jajerovia la Bíbliare, jaha jey hag̃ua ñaporandukuaa chupe: Ndépa ere la Biblia heʼíva ojoavyha umi sientífiko heʼíva ndive?”. Ág̃a jaha jeývape ñahesaʼỹijo hendive kapítulo 2 párrafo 8.
4. Mbaʼépa jajapovaʼerã pe óga jára ndohejáiramo ilivrorã?
4 Ñaporanduvaʼerã peteĩ mbaʼe ikatu hag̃uáicha jaha jeývape ñañeʼẽ upévare. Jastudia meméramo ñande rapichándi, ñahesaʼỹijokuaáma hendive pe lívro oñepyrũ guive ág̃a opa peve. Ha pe óga jára ndohejáiramo ilivrorã? Ikatu jasegi jagueraha chupe umi rrevísta ha ñañemongeta jepi hendive Ñandejára Ñeʼẽ rehe. Ñañemongeta pyʼỹiramo hendive, ág̃ante ostudiaséne la Biblia.
5. Mbaʼépa jajapovaʼerã oĩramo ohejáva ñande rrevísta?
5 Umi rrevísta Ñemañaha ha ¡Despertad! ikatu omomýi ñande rapichakuérape oikuaase hag̃ua mbaʼépa añetehápe omboʼe la Biblia. Upévare ñañehaʼãmbaitékena jastudia ñepyrũ la Biblia umi ñande rrevísta ohejavaʼekue ndive. Péicha jajapoñaína Jesús heʼivaʼekue. Haʼe oipotavaʼekue ñamboʼe ñande rapichápe oiko hag̃ua hemimboʼéramo (Mat. 28:19, 20).