Pe Estúdio de Lívro tuicha ñanepytyvõ
1. Mbaʼéichapa ñanepytyvõ umi cinco rreunión ojejapóva káda semána?
1 Umi cinco rreunión ojejapóva káda semána ndahaʼéi peteĩchapáva. Upéicharõ jepe, enterove rehe ñaikotevẽ, ‘ñanepytyvõgui jajoayhu ha jajapo hag̃ua iporãva’ (Heb. 10:24, 25). Mbaʼéichapa ñanepytyvõ pe Estúdio de Lívro?
2. Mbaʼéichapa ñanepytyvõ ñañembyatýramo mbovymínte?
2 Jaservi porãve Ñandejárape. Estúdio de Lívrope mbovyve ermáno oñembyaty jepi, ndahaʼéi ambue rreunión ojejapoháicha. Upéicha rupi jaikuaa porãvéta ñane ermanokuérape, ha ñanepytyvõta jaservi porãve hag̃ua Ñandejárape (Pro. 18:24). Ñañehaʼãmapa jaikuaa porãve enterovépe? Ikatu jaʼe chupekuéra osẽ hag̃ua opredika ñanendive. Avei, ko estúdio de lívro oipytyvõta umi omoakãvape oikuaa porãve hag̃ua mbaʼéichapa oĩ enterove ohóva ko atýpe ha upéicha oipytyvõ peteĩteĩme (Pro. 27:23).
3. Mbaʼérepa ikatu oñekomenta hetave ha ndahasyive avei umi estudiántepe oho hag̃ua estúdio de lívrope?
3 Jaʼémapa ñane estudiántepe oho hag̃ua ñanendive estúdio de lívrope? Umi okyhyjéva oho hag̃ua umi rreunión tuichávape ikatu oñeñandu porãve ohóramo peteĩ michĩmívapente, ha upéva iporãvétantema ojejapóramo ogahápe. Upéicharõ umi imitãva ha ohoramóvape ndahasyivéta okomenta hag̃ua. Avei, mbovymínte oñeĩgui, ikatu hetave ñakomenta ha upéicha ñamombaʼeguasu Ñandejárape (Sal. 111:1).
4. Mbaʼépepa ñanepytyvõ avei pe estúdio de lívro?
4 Umi estúdio de lívro ojejapo jepi opyta porãvetahápe enterovépe. Ndajaháiramo jepe hiʼag̃uivehápe ñande rógagui, ikatuhína hiʼag̃uive ñandéve Salón del Réinogui. Upe estúdio de lívro ojejapohápe avei ikatu ñañembyaty jepi ñasẽ mboyve japredika.
5. Mbaʼéichapa pe estúdio de lívro omoakãva ñanepytyvõta ñandekatupyryve hag̃ua predikasiónpe?
5 Ñanepytyvõ japredika hag̃ua. Pe estúdio de lívro omoakãva oipytyvõse enterovépe osẽ meme hag̃ua opredika vyʼapópe. Upévare, oñehaʼãmbaite osẽ upe atýpe ohóva ndive ha oipytyvõ chupekuéra ikatupyryve hag̃ua predikasiónpe. Pór ehémplo, hasýramo ñandéve jajapo hag̃ua rrevisíta, ikatu ñañeʼẽ hendive. Ikatu ñanemondo peteĩ ermáno ikatupyryvéva ndive japredika hag̃ua. Avei, jajesarekóramo mbaʼéichapa pe ermáno omoakã estúdio de lívro, ñandekatupyryvéta jajapo hag̃ua estúdio (1 Cor. 4:17).
6. Mbaʼérepa ñañehaʼãmbaitevaʼerã jaha pe estúdio de lívrope?
6 Ajépa tuichaite ñanepytyvõ ko ñande estúdio de lívro. Ko mbaʼe porãite Jehová omeʼẽva ñandéve ñanepytyvõ jajepytaso mbarete hag̃ua Ijykére koʼã ára ijetuʼuetévape (Sal. 26:12).