Pyʼaguapy umi tapicha ojepyʼapývape g̃uarã
1 Ko ñane tiémpope ningo tekotevẽtereive ñambopyʼaguapy ñande rapichápe. Upévare, ñañehaʼã jajapo Jesús ojapohaguéicha ha ‘ñambopyʼaguapy umi ojepyʼapývape’ (Isa. 61:1).
2 Mbaʼéichapa ikatu ñaporombopyʼaguapy. Ikatu hag̃uáicha ñambopyʼaguapy añete ñande rapichakuérape, ohechakuaavaʼerã hikuái tekotevẽha ha iporãha pe marandu jaguerahavañaína. Nañañeʼẽtereirivaʼerã umi mbaʼe vai oikóvare, ni umi rrelihión japu ojapóvare. Iporãvetahína ñañeʼẽ la Biblia heʼívare ha umi mbaʼe porãita Ñandejára oprometévare. Upéva ndeʼiseihína nañañeʼẽmoʼãiha pe Armagedón rehe. Ñande ningo ‘ñamyerakuãvaʼerã Ñandejára ára ou porãtava opavavépe’ ha ‘upe ára Ñandejára omyengoviataha hembiapo vaikue umi ñanderehe ijaʼeʼỹvape’. Nañañeʼẽséiningo pe Armagedón rehe añónte. Ñamombeʼuse avei pe marandu porã Ñandejára goviérno rehegua (Isa. 61:2; Eze. 3:18; Mat. 24:14).
3 Japredika jave ogaha rupi. Pyʼỹinte ningo jajuhu ñande rapicha oñembyasyvahína hasykatúgui, omanógui chugui ihénte, ohasa asy térã imboriahuetereígui. Upévare, japredika jave jahechaukavaʼerã jaiporiahuverekoha chupekuéra. Jesús ningo upéicha vaʼekue. Haʼe ohechárõ guare peteĩ viúda oñembyasyetereíva, “oiporiahuvereko” chupe (Luc. 7:13; Rom. 12:15). Jaleéramo jepe ñande rapichápe peteĩ térã mokõi téysto oñeʼẽva umi mbaʼe oipyʼapývare chupe, ‘ñahendukuaavaʼerã’ avei ha jaheja tomombeʼu mbaʼéichapa oñeñandu (Sant. 1:19). Jajapóramo upéicha, jaikuaa porãvéta mbaʼéichapa ñambopyʼaguapýta chupe.
4 Opyta porãve jave ñandéve ikatu jaʼe: “Aleeseténingo ndéve peteĩ téysto katuete nemokyreʼỹtava”. Jaikekuaavaʼerã umi héntepe ha ndajakorrehirivaʼerã chupekuéra opa ojavyhápe. Ñande ningo ñamokyreʼỹ ha ñambopyʼaguapyseñaína chupekuéra Ñandejára Ñeʼẽ rupive ha upéicha hetiaʼe jey hag̃ua hikuái. Pe lívro Razonamiento a partir de las Escrituras, “Estímulo” heʼihápe, páhina 144 guive 148 peve omombeʼu ñandéve mbaʼéichapa ikatu jajapo. Ikatu avei ñameʼẽ chupekuéra pe tratádo Konsuélo umi ikangy ha ndovyʼaietereívape g̃uarã ha ñahesaʼỹijo hendivekuéra.
5 Jahechákena mbaʼéicha javépa ikatu ñaporombopyʼaguapy. Oĩpa ñane hénte, ñane vesíno, ñane irũ ñambaʼapohapegua térã eskuelapegua ojepyʼapyvahína? Mbaʼére piko ndajahái javisitami ha jagueraha la Biblia ñamokyreʼỹ hag̃ua chupe? Jaikuaáramo mbaʼépa oipyʼapy chupe, ikatúma voi ñapensañaína mbaʼépa jaʼéta. Oĩ ermáno oskrivíva kárta térã ohenóiva teléfonope upeichagua hapichápe. Jahayhu añetéramo ñande rapichápe jaiporiahuverekóta ha ñambopyʼaguapýta chupe Ñandejára Ñeʼẽ rupive (Luc. 10:25-37).
6 Hiʼãningo ñandéve ñambopyʼaguapy umi ojepyʼapývape, ñamombarete umi ikangývape, ha umi nohaʼarõvéimavape mbaʼeve iporãva katu ñamombeʼuse mbaʼépa ñaneraʼarõ tenonderã gotyo. Opavave ñande rapicha ningo oikotevẽ koʼã mbaʼére. Upévare vyʼápe ñamombeʼuvaʼerã ñande rapichakuéra ipyʼaporãvape umi mbaʼe porã Ñandejára omeʼẽtava ñandéve ha upéicha ñambopyʼaguapy chupekuéra. Aníkena ñanderesarái tekotevẽtereiha ñambopyʼaguapy umi ojepyʼapývape.