Umi mbaʼe jaikuaaséva

◼ Mbaʼéichapa ñañemondevaʼerã jaha hag̃ua umi lugár ojeporuhápe oñemombaʼeguasu hag̃ua Jehovápe?

Oparupiete ojekuaa umi Salón del Reino, Centro de Convenciones, ha Betel ojeporuha Jehovápe ojeservi hag̃ua. Koʼã lugár ningo isensíllo, ipotĩ ha iporã, ndahaʼéi ko mundopeguáicha. Upévare umi ohóvare ovisita koʼã lugár ojekuaavaʼerã ojapoha Jehová rembipota.

Ñande ningo ‘jahechauka opa mbaʼépe Ñandejára rembiguaiha’, ha upearã ñañemondevaʼerã avei hekopete (2 Cor. 6:​3, 4). Oñehaʼarõ avei jajeporta porã umichahápe. Ñane ñemonde rehe ojekuaavaʼerã jaserviha Jehovápe. Koʼýte jaháramo javisita Betel.

Pe lívro Organizados para hacer la voluntad de Jehová, heʼi iñimportanteha ñanepotĩ, ñañemondevaʼerãha hekopete ñasẽ jave japredika ha jaha jave rreunionhápe. Upe rire páhina 139, párrafo 1-pe heʼi: “Ñanemanduʼavaʼerã Betel heʼiseha ‘Ñandejára Róga’. Upéicharõ, jaha jave upépe ñañemonde ha jajeportavaʼerã jaharamoguáicha Salónpe ñamombaʼeguasu hag̃ua Ñandejárape”. Koʼápe heʼiháicha ojapovaʼerã entéro puvlikadór ohóva ohecha hag̃ua Betel, tahaʼe jepe ag̃uígui ohóva. Péicha ohechaukáta omombaʼe ha orrespetaha upe lugár (Sal. 29:2).

Ñane ñemondére ojekuaavaʼerã ‘ñamombaʼeha Ñandejárape’ (1 Tim. 2:10). Ñañemondéramo hekopete ikatu hína omomýi ñande rapichakuérape omombaʼeguasu hag̃ua Jehovápe. Ñambyasýramo jepe, oĩ jepi ermáno ha ermána ohóva Betélpe ao vai, chaʼĩ, mbyky térã hesakãva reheve. Peteĩ kristiáno ningo noñemondeivaʼerã péicha mamove hendápe. Opa mbaʼe jajapóvape ningo ‘ñamombaʼeguasuse Ñandejárape’. Upéicha avei ojekuaáta ñanderehe jaserviha Jehovápe (Rom. 12:2; 1 Cor. 10:31).

Upévare, jahátaramo javisita peteĩ Betel, tahaʼe jepe ñane vakasión jave, ñañeporandumivaʼerã: “Añemondépa hekopete amombaʼe rupi pe lugár ahaseha? Ojekuaápa cherehe amombaʼeha Ñandejárape? Oñemañambátapa cherehe térã ambopochýtapa che rapichápe añemondehaguére péicha?”. Opa mbaʼépe ha oimehápe, jahechauka ñane ñemondére ‘mbaʼeichaitépa iporã Ñandejára ñanemboʼéva’ (Tito 2:10).