Mbaʼéichapa ñaipytyvõta umi ohóvape Conmemoracionhápe?
1. Mbaʼe ijojahaʼỹvapa oñemombeʼúta ág̃a 22 de marzo de 2008?
1 Ág̃a 22 de marzo de 2008, hetaiterei tapichápe oñemombeʼúta peteĩ mbaʼe ijojahaʼỹva. Umi ohóvape Conmemoracionhápe oñemombeʼúta ñanderayhuetereígui Jehová omeʼẽhague Itaʼýra ñandesalva hag̃ua (Juan 3:16). Oñeñeʼẽta avei Ñandejára Rréino rehe ha mbaʼéichapa Jehová ojapóta hembipota ko Yvy ape ári pe Rréino rupive (Mat. 6:9, 10). Upéicha avei, og̃uahẽvo hikuái ohecháta mbaʼéichapa ojoayhu ha oiko porã oñondive Ñandejára siervokuéra (Sal. 133:1).
2. Mbaʼéichapa ikatu ñaipytyvõ umi estudiánte ohóvape Conmemoracionhápe?
2 Ñane estudiantekuéra. Ohóta avei hína umi ostudiaramóva ñanendive, upévare iporãta ñapresentáramo ermanokuérape. Iporãta avei ñamombeʼu umi ñane estudiántepe mbaʼéichapa ojejapo ñane rreunión ha jahechauka chupekuéra Salón ryepy. Avei, pe diskursánte omokyreʼỹtahína umi estudiántepe osegi hag̃ua oikuaave Ñandejárape. Ha ñande ikatu ñamokyreʼỹve chupekuéra upe rire.
3. Mbaʼépa jajapóta ñamokyreʼỹ hag̃ua umi aréma ndohovéivape rreunionhápe ha ndopredikavéivape?
3 Umi aréma ndohovéiva rreunionhápe ha ndopredikavéiva. Ohóta avei Conmemoracionhápe umi puvlikadór aréma ndohovéiva rreunionhápe ha ndopredikavéiva. Upévare, ñañembojamíkena ág̃a hendapekuéra ha jaguerohorymi chupekuéra. Péro ñanembaʼerechakuaákena, ani ñambaʼeporandueterei térã ñamotĩ chupekuéra. Ansianokuéra ovisitavaʼerã umi ermánope Conmemoración rire. Haʼekuéra oguerohoryvaʼerã umi ermánope ohohaguére ha oinvitavaʼerã chupekuéra oho jey hag̃ua rreunionhápe.
4. Mbaʼépa ikatu jajapo ñaipytyvõ hag̃ua umi ohoramóvape Conmemoracionhápe?
4 Umi ohoramóva. Ikatu avei ohohína Conmemoracionhápe umi ñanekonosído, ñane hentekuéra ha umi ñainvitavaʼekue. Ha oĩramo umi ndajaikuaáiva, ñañeʼẽ ha ñanderoryvaʼerã hendivekuéra. Ikatu ningo koʼág̃a ramónte ohohína hikuái rreunionhápe. Ñañemongetakuévo ikatu heʼi ñandéve moõpa oiko ha mbaʼéichapa ikatu jatopa hesekuéra. Upéicharõ ikatúta jaha hógape térã ñahenói chupekuéra Conmemoración riremíntema voi. Ha péicha ñaipytyvõta chupekuéra oikuaaseve hag̃ua Ñandejárape ha ostudia hag̃ua la Biblia.
5. Mbaʼépa ikatu jaʼe ñamoñepyrũ hag̃ua peteĩ estúdio?
5 Jaha jey vove hendapekuéra, pe diskúrso Conmemoraciohápe guare voi ikatu jaiporu ñañeʼẽ hag̃ua pe lívro Mbaʼépa omboʼe la Biblia? rehe. Pe diskursánte ningo oñeʼẽtahína térã oleéta Isaías 65:21-23. Ikatu ñanemanduʼa upévare ñande rapichápe ha jaʼe chupe: “Tahechaukamína ndéve hetave mbaʼe porã ñaneraʼarõha Jesús omanohaguére ñanderehehápe”. Upe rire ñahesaʼỹijo hendive oĩva páhina 4 ha 5-pe. Ikatu avei jaʼe: “Heta ningo oĩ oñeporandúva arakaʼépa oñekumplíta upe profesía”. Upe rire ñahesaʼỹijo hendive pe kapítulo 9 párrafo 1 guive 3 peve. Térã ikatúnte ñanemanduʼa chupe pe diskursánte heʼivaʼekuére, jahechauka pe lívro ha ñamombeʼu mbaʼéichapa ojestudia.
6. Mbaʼe mbaʼépa ikatúta jajapo ág̃a Conmemoración jave?
6 Enterovékena ñaipytyvõ ág̃a umi estudiántepe, umi aréma ndopredikavéi ha ndohovéiva rreunionhápe, ha avei umi ohoramóvape Conmemoracionhápe (Luc. 22:19). Jehová ningo katuete ñanepytyvõta ñañehaʼãramo jaservi porãve chupe.