Ñambopyʼaguapýkena umi ihénte manóvape
1. Mbaʼérepa tekotevẽ ñambopyʼaguapy umi ihénte manóvape?
1 Ñambyasyetereíningo omanóramo ñandehegui peteĩ jahayhúva, ha koʼýte ombyasyvéne umi ndoikuaáiva mbaʼépa ohaʼarõ umi omanovaʼekuépe (1 Tes. 4:13). Heta oĩ oñeporandúva koʼã mbaʼe: Mbaʼére piko omano? Moõ piko oho? Ahecha jeýne piko chupe?”. Umi mbaʼe ñahesaʼỹijótava umi párrafo oúvape ikatu ñanepytyvõ ñambopyʼaguapy hag̃ua umi tapicha ihénte térã iñamígo omanovaʼekuépe chugui (Isa. 61:2).
2. Ñañeʼẽ arétapa peteĩ ñande rapichándi heʼíramo ñandéve omanoramoiteha chugui ihénte?
2 Japredika jave ogaha rupi. Ñamoĩ chupe peteĩ óga jára heʼiha ñandéve omanoramoiteha chugui ihénte. Jahechakuaápa hese hasẽsenteha voi? Oĩjoápa iparientekuéra upépe? Upéicharõ mbykymínte ñañemongetavaʼerã hendive (Ecl. 3:1, 7). Ikatu jaʼe chupe ñambyasyetereiha hendive ha ñameʼẽ chupe peteĩ tratádo, rrevísta térã folléto oñeʼẽva upévare ha upe rire jaháma upégui. Upe rireve ág̃a ikatu jaha jey ñamombeʼu hag̃ua chupe mbaʼépa heʼi la Biblia ohaʼarõha umi omanovaʼekuépe.
3. Opyta porãtaramo ñandéve, mbaʼe téystopa ikatu jahechauka peteĩ ihénte manóvape?
3 Ikatu avei jahechakuaa opyta porãtaha ñandéve ñañeʼẽmie hag̃ua ñande rapicha ihénte manóva ndive. Ndahaʼéiningo jaʼétava chupe oĩ vaiha umi mbaʼe ogueroviáva. Ikatu jahechauka chupe Ñandejára omoingove jeytaha umi omanovaʼekuépe (Juan 5:28, 29). Ikatu avei jahechauka chupe mbaʼépa heʼi la Biblia oikoha umi omanovaʼekuégui (Ecl. 9:5, 10). Térã jalee chupe la Bíbliape mbaʼéichapa oñemoingove jey vaʼekue umi omanovaʼekuépe. Katuete ningo upéva omokyreʼỹetereíta chupe (Juan 11:39-44). Jahechaukakuaa avei mbaʼéichapa Job ojeroviavaʼekue Jehová omoingove jeytaha chupe (Job 14:14, 15). Ñasẽ mboyve upégui ikatu ñaikuaveʼẽ chupe folléto Omano vove peteĩ jahayhúva, ¿Qué nos sucede cuando morimos?, térã ambue folléto ha tratádo. Ikatu voi katu jaheja chupe lívro Mbaʼépa añetehápe omboʼe la Biblia?, jahechauka chupe oĩva páhina 6-pe ha jaʼe jaha jeytaha ñahesaʼỹijo porã hag̃ua hendive upe párte.
4. Mbaʼépa ikatu avei jajapo ñambopyʼaguapy hag̃ua ñande rapichakuérape?
4 Ambue hendápe. Salón del Reino-pe ojejapótaramo pe diskúrso oĩ jave omanóva, ñapensavaʼerã oĩtapahína ñande rapicha ndahaʼéiva testígo. Umívape ikatu ñaikuaveʼẽ ñane puvlikasión ombopyʼaguapýtava chupekuéra. Heta vése umi funerária jára oagradese ojehejahaguére chupekuéra umi puvlikasión omeʼẽ hag̃ua umi ihénte manóvape. Diáriope ningo oñemoĩ jepi avei umi omanovaʼekue réra ha ihentekuéra direksión. Umívape opyta porã ñandéve jahai hag̃ua peteĩ kárta ñambopyʼaguapymi hag̃ua chupekuéra. Peteĩ ermáno omondo kárta ha heta tratádo peteĩ karai hembireko manóvape ha itajýrape g̃uarã avei. Ha peteĩ árape upe karai og̃uahẽ oúvo itajýrandi ko ermáno rógape ha heʼi chupe: “Peẽ piko pemondóraʼe oréve ko kárta? Pórke aikuaaseve la Biblia heʼíva”. Ko karai ha itajýra ostudia koʼág̃a la Biblia ha oho meme hikuái rreunionhápe.
5. Mbaʼérepa iporã ñañatende ha jahecha mbaʼéichapa ikatu ñambopyʼaguapy umi ihénte manóvape?
5 Eclesiastés 7:2 heʼi: ‘Iporãve ojeho omanovahápe, vyʼahápe jehopeguágui’. Jaikuaáningo umi ihénte manóva ohendu porãveha ñañeʼẽ jave chupekuéra la Biblia heʼívare. Upévare, ñañatendevaʼerã ha jahecha mbaʼéichapa ikatu ñambopyʼaguapy umi oñembyasyvapehína omanohaguére chugui peteĩ ohayhúva.