Jajeprepara porãkena javisita jey hag̃ua umi oikuaasevévape
1. Mbaʼeichaitépa heʼi Jesús oñemyerakuãtaha pe marandu porã?
1 Jesús oprepara porã vaʼekue idisipulokuérape opredika hag̃ua “pe marandu porã Ñandejára Rréino rehegua” (Mat. 4:23; 9:35). Opredikáramo jepe Palestina rupinte, oho mboyve yvágape Jesús heʼi pe marandu porã oñemyerakuãtaha oparupiete. Haʼe heʼi idisipulokuérape: “Tapeho aipóramo opa tetã rupi ha pejapo chupekuéra che remimboʼéramo” (Mat. 28:19, 20).
2. Mbaʼépa jajapovaʼerã oiko hag̃ua ñande rapichágui Jesús remimboʼe?
2 Oiko hag̃ua ñande rapichágui Jesús remimboʼe, javisita jey vaʼerã chupekuéra. Upéicha ñamboʼéta chupekuéra ojapo hag̃ua Jesucristo heʼíva. Upévare tekotevẽ jajeprepara porã javisita jey hag̃ua umi oikuaasevévape.
3. Ñag̃uahẽ ñepyrũme voi, mbaʼépa ikatu jajapo jaha jey hag̃ua javisita umi ñane rendúvape?
3 Mbaʼéichapa jajapóta. Heta ermáno og̃uahẽ ñepyrũme voi, oñemongetapa rire pe óga járandi, oporandu peteĩ mbaʼe ha heʼi ombohovaitaha ótro oúvape. Oho jeývo, ohechauka chupe mbaʼépa heʼi pe lívro Mbaʼépa omboʼe la Biblia?, ha upéicha oñepyrũ ostudia hendive.
4. Tekotevẽ piko ñahaʼarõ osẽ raẽ rrevísta pyahu jaha jey hag̃ua ñande rapicha rendápe?
4 Ñande rrevísta osẽ káda més, péro upéva ndeʼiséi ñahaʼarõvaʼerãha un més jaha jey hag̃ua ñande rapicha rendápe. Ikatúnte ñahesaʼỹijo hendive peteĩ rrevísta orekómava voi, péicha oikuaaseve hag̃ua Jehovápe ohóvo.
5. Mbaʼérepa iporã jaikuaa raẽ mbaʼépa jajapóta?
5 Mbaʼépa jajapovaʼerã. Jaha mboyve javisita jey peteĩ tapichápe, ñamboykevaʼerã tiémpo jahecha hag̃ua umi mbaʼe ñaanotavaʼekue ha upéicha jaikuaátama mbaʼépa jajapóta. Pór ehémplo ñahesaʼỹijótapa hendive pe puvlikasión ohejavaʼekue, térãpa jaraháta chupe ótra puvlikasión. Oimérõ jaʼéraʼe ñambohovaitaha chupe peteĩ porandu, jajepreparavaʼerã upearã. Ha ñañehaʼãkena jaiporu la Biblia ñambohovái hag̃ua.
6. Mbaʼerãpa jaha javisita jey umi oikuaasevévape?
6 Mbaʼépepa ñag̃uahẽse. Ñande ningo jaha javisita jey umi oikuaasevévape ñamoñepyrũségui peteĩ estúdio vívliko. Peteĩ karai heʼi ndostudiaseiha oñekuaveʼẽrõ guare chupe peteĩ estúdio vívliko. Upéicharõ jepe pe ermáno oho jey hendápe ogueraha hag̃ua chupe rrevísta pyahu. Ha heʼi pe karaípe: “Ore ningo la Biblia rupive rombohovái hína ore rapichakuérape peteĩ porandu, ha ag̃uahẽ avei nerendápe”. Oheja pe karai oñeʼẽ ha ohendu chupe. Upéi olee chupe peteĩ téysto ha ohesaʼỹijoʼimi hendive peteĩ puvlikasión. Upéicha oñepyrũma ostudia hikuái.
7. Emombeʼu mbaʼéichapa rejeprepara porã rupi reñepyrũma peteĩ estúdio vívliko.
7 Añetehápe ningo iporã ñamboyke tiémpo jajeprepara hag̃ua. Jajapóramo upéicha vyʼápe javisitáta ñande rapichakuérape, ha avei ikatúta ñaipytyvõ umi ipyʼaporãvape oguata hag̃ua Jehová rapére (Hech. 13:48).