Peteĩ tembiapo ijojahaʼỹva! Ojejapóta 20 de octubre guive 16 de noviembre peve
1 Lunes 20 de octubre guive oparupiete ko yvy ape ári ojejapóta peteĩ tembiapo ijojahaʼỹva. Cuatro semána aja oñemeʼẽta pe tratádo pyahu Ndépa reñeporandúmava koʼã mbaʼe? Ko tembiapo rupive ñaipytyvõse ñande rapichakuérape ostudia hag̃ua la Biblia (Juan 17:17).
2 Ko tratádo pyahu ombohovái porã koʼã porandu: Ojepyʼapýpa Ñandejára ñanderehe? Opánepa ñorairõ ha jehasa asy? Mbaʼépa oiko ñandehegui ñamano rire? Ikatúnepa jahecha jey umi jahayhúva omanovaʼekuépe? Mbaʼeichagua ñemboʼépa ohendu Ñandejára? Ha mbaʼépa jajapovaʼerã javyʼa hag̃ua? Koʼã porandu ndaikatúi ombohovái porã heta rrelihión heʼíva ijehe kristianoha. Avei umi ndojeroviáiva Ñandejárare oñeporandu jepi koʼã mbaʼe, ha ndoikuaái la Biblia ombohovái porãha. Upévare jaikuaa oĩtaha hetaiterei omombaʼéva ko tratádo pyahu.
3 Ñamog̃uahẽkena enterovépe. Ñañehaʼãmbaitevaʼerã ñamog̃uahẽ ko tratádo káda ógape oĩva ñande territóriope. Tuicháramo ñande território umi ansiáno heʼikuaa ikatumaha ojeheja pe tratádo ndaipóriramo jepe óga jára. Emeʼẽkena avei ne vesíno, ne pariénte, nde travahohápe ha eskuélape. Emeʼẽ avei umi oñemongeta pyʼỹivape nendive. Ikatúpa rejapo nde precursorado auxiliar octubre térã noviémbrepe? Ikatu avei reñeʼẽ umi ansiáno ndive, oĩramo ne família térã peteĩ ostudiáva nendive ikatúmava oiko chugui puvlikadór ojevautisaʼỹva.
4 Mbaʼépa ikatu jaʼe. Ikatu hag̃uáicha ñamog̃uahẽ hetavépe ko tratádo ñañeʼẽ mbykymínte vaʼerã. Ikatu jaiporu peteĩ porandu oĩva pe tratádo apére ha upéi jahechauka chupe mbaʼéichapa ombohovái upe porandu. Péicha jahechakuaáta mbaʼéichapa opyta porãvéta ñande territóriope. Oĩramo oikuaasevéva, ñaanotavaʼerã héra ha moõpa oiko jaha jey hag̃uáicha javisita. Fín de semána aja ikatu ñameʼẽ pe tratádo ñaikuaveʼẽvo umi rrevísta. Ko tembiapo ojejapóta 16 de noviembre peve. Upe rire ñaikuaveʼẽta lívro Mbaʼépa omboʼe la Biblia? ha umi tratádo hembýva ikatúta jaiporu umi ótro tratádo jaiporuháicha.
5 Ñañepyrũ hag̃ua jastudia la Biblia ñande rapichándi. Ko tratádo pyahu ñanepytyvõta ñañepyrũ hag̃ua jastudia la Biblia ñande rapichándi. Mbaʼéichapa ikatu jajapo upéva? Jaha jeývo javisita peteĩ tapichápe ikatu ñaporandu mbaʼe pártepa ogustave térã oipytyvõraʼe chupe. Upe rire jahechauka pe última párte heʼíva mbaʼéichapa ikatu ostudia la Biblia ha jaheja chupe lívro Mbaʼépa omboʼe la Biblia? Ikatúramo, ñahesaʼỹijokuaa hendive peteĩ térã mokõi párrafo oñeʼẽvéva pe téma oiporavovaʼekuére.
6 Jehová ningo oipota jaheka umi omombaʼeguasútava chupe “añetehápe ha haʼe oipotaháicha” (Juan 4:23). Ñande ningo jaipota umichagua oikuaa Ñandejárape. Upévare, jajapókena ikatuháicha ko tembiapo ijojahaʼỹva!