¿Mbaʼe mbaʼépa ojapóta Ñandejára Rréino?

MBAʼE MBAʼÉPA OJAPÓMA ÑANDEJÁRA RRÉINO

Pe ótro artíkulope jahecha kuri umi mbaʼe Jesús heʼi vaʼekue haʼetaha peteĩ señál ohechaukáva Ñandejára Rréino oñepyrũmaha ogoverna yvágape, ha oikomaha chugui Rréi.

Año 1914 guive ko múndope ivaive ohóvo la situasión. ¿Mbaʼérepa? La Biblia omombeʼu ñandéve mbaʼépa primeroite ojapo Jesús oiko rire chugui Rréi. Haʼe omosẽ Satanás ha idemoniokuérape yvágagui, ha omombo chupekuéra opyta hag̃ua ko yvy ape ári. Ha upéva haʼe peteĩva umi rrasón (Apocalipsis 12:7, 9).

Ko múndope ivaivéramo jepe ohóvo la situasión, Jesús haʼéva pe Rréi Ñandejára Rréinope, oipytyvõma hetaiterei persónape ko múndo tuichakuére. Ipoguýpe, opárupi oñemboʼe hína la héntepe la Biblia heʼíva, ha hetaiterei oĩ oaprendéva mbaʼéichapa ikatu káda día osegi umi konsého oĩva pype (Isaías 2:2-4). Hetaiterei hénte oaprendéma mbaʼépa ojapo vaʼerã osẽ porã hag̃ua itravahohápe, ovyʼa hag̃ua ifamiliakuérandi, ha ohecha hag̃ua hendaitépe umi mbaʼerepy. Péicha haʼekuéra oaprende heta mbaʼe ideprovéchova chupekuéra koʼág̃ama voi, ha avei ojepreparáma hína ikatu hag̃uáicha oiko Ñandejára Rréino poguýpe.

MBAʼE MBAʼÉPA OJAPÓTA ÑANDEJÁRA RRÉINO

Jesús ningo ogovernáma hína pe yvágape, péro ko yvy ape ári oĩ gueteri umi yvypóra goviérno. Upévare, Ñandejára omandáma Jesúspe mbaʼépa ojapo vaʼerã: “Tereho eike ne enemigokuéra apytépe ha ereko chupekuéra nde poguýpe” (Salmo 110:2). Koʼẽrõitéma Jesús ohundietéta entéro umi oñemoĩvape hese. Ha upe rire umi iñeʼẽrendúva Ñandejárape, ikatútama oiko pyʼaguapýpe.

¿Mbaʼe mbaʼépa ojapóta Ñandejára Rréino upe tiémpope?

• Ohundietéta umi rrelihión japu. Koʼãva ningo hetaiterei tiémporema ombotavy ha ombosufri la héntepe, péro upéva opátama. La Bíbliape oñembojoja voi umi rrelihión japu peteĩ prostitútare. Ha heta hénte tuichaiterei oñemondýita oñehundi vove umíva (Apocalipsis 17:15, 16).

• Ohundietéta yvyporakuéra goviérno. Ñandejára Rréino oipeʼáta pára siémpre entéro umi goviérno umáno (Apocalipsis 19:15, 17, 18).

• Ohundietéta umi hénte añáme. Oĩ hénte ojaposéva voi ivaíva ha noñemoĩséiva Ñandejára poguýpe, ¿mbaʼépa oikóta chuguikuéra? La Biblia heʼi: “Umi hénte iñañáva katu oñehundíta” (Proverbios 2:22).

• Ohundíta Satanás ha idemoniokuérape. Satanás ha idemoniokuéra ndaikatumoʼãvéima “ombotavy umi tetãnguérape” (Apocalipsis 20:3).

Oikopa vove koʼã mbaʼe, ¿mbaʼépa ohupytýta umi oñemoĩva Ñandejára Rréino poguýpe?

MBAʼÉPA OJAPÓTA ÑANDEJÁRA RRÉINO ÑANDEREHEHÁPE

Jesús ogovernávo yvágagui, ojapóta heta mbaʼe umi goviérno ndaikatúiva ojapo. Jesúspe oipytyvõta 144.000 persóna ojeporavo vaʼekue yvyporakuéra apytégui, ha haʼekuéra haʼéta avei rréi haʼéicha (Apocalipsis 5:9, 10; 14:1, 3). Jesús oñenkargáta oñekumpli hag̃ua Ñandejára rembipota ko yvýpe g̃uarã. Ha, ¿mbaʼe mbaʼépa ojapóta upéicharõ Ñandejára Rréino yvyporakuéra rehehápe?

• Opáta mbaʼasy ha ñemano. “Ni peteĩ oikóva ko yvy ape ári ndeʼimoʼãvéima: ‘Cherasy hína’”, ha “ndaiporimoʼãvéima omanóva” (Isaías 33:24; Apocalipsis 21:4).

• Oĩta segurida ha entéronte oikóta trankílo. ‘Ne familiakuéra oikóta pyʼaguapýpe’ ha “oguapýta iparrál máta guýpe ha hiʼígo máta guýpe, avave nomongyhyjemoʼãi chupekuéra” (Isaías 54:13; Miqueas 4:4).

• Entéronte ikatúta ombaʼapo umi mbaʼe ojapo porãvape ñanderehe. “Umi che aiporavo vaʼekue ipyʼaite guive odisfrutáta itravahokuégui. Ndoikomoʼãi reiete ombaʼapo pohýi” (Isaías 65:22, 23).

• Ko yvy oprodusi porãta, opáta umi desástre naturál ha kontaminasión. “Pe ñu ha pe yvy isékova ovyʼáta, pe desiérto ovyʼaitereíta, henyhẽta yvoty porã porãgui” (Isaías 35:1).

• Oñemboʼéta la héntepe mbaʼépa ojapo vaʼerã oiko hag̃ua pára siémpre. “Umi hénte oikove hag̃ua pára siémpre tekotevẽ ndekuaa ndéve, nde hína Ñandejára teete ha peteĩetéva. Oikuaa vaʼerã avei Jesucrístope, upe nde rembou vaʼekue” (Juan 17:3).

Ñandejára oipotaiterei nde avei rehupyty koʼã vendisión (Isaías 48:18). Upévare pe ótro artíkulope jahecháta mbaʼépa rejapokuaa rehecha hag̃ua oñekumplívo koʼã promésa porãite.