Ñaporomboʼékena oñentende porã hag̃uáicha
1. Mbaʼéichapa ñamboʼevaʼerã ñande rapichápe?
1 Umi mbaʼe ñamboʼéva ñande rapichápe ndahasyivaʼerã oñentende hag̃ua. Pór ehémplo Jesús oĩrõ guare ko yvy ape ári oporomboʼevaʼekue oñentende hag̃uáicha. Ha ñande ñaporomboʼe porãve hag̃ua tekotevẽ ñahaʼanga chupe (2 Tim. 4:2; Juan 13:13).
2. Mbaʼépa ñanemboʼe Jesús ehémplo? Ha mbaʼépa jahupytýta upéicha jajapo haguére?
2 Ndahasyivaʼerã oñentende hag̃ua. Jesús oñemoñeʼẽrõ guare sérro ári guive omboʼevaʼekue heta mbaʼe hypyʼũva, upéicharamo jepe ndahasýi oñentende hag̃ua (Mat., kap. 5-7). Umi hénte “ijurujaipa” ohendúvo mbaʼeichaitépa haʼe oporomboʼekuaa. Ha umi ofisiál ohórõ guare ojagarra hag̃uáicha chupe heʼi: “Ndaipóri niko avave oñeʼẽva ko kuimbaʼe oñeʼẽháicha” (Mat. 7:28, 29, ÑÑB; Juan 7:46). Upéva ñanemboʼe natekotevẽiha jaiporu ñeʼẽ hasýva oñentende hag̃ua térã ehémplo puku ha nahesakãporãiva. Upéicharõmante avei ñande rapichakuéra ontende ha oñemoag̃uisevéta Ñandejárare.
3. Mbaʼépa ndajajapoivaʼerã oĩramo ojapysaka porãva ñanderehe?
3 Natekotevẽi ñañeʼẽterei. Jesús ohecha raẽ mbaʼeichagua héntepa ohendu chupe ha upe rire ae oporomboʼe (Juan 16:12). Upéicha avei japredika jave ñane hentekuérape, mitãme térã ambue oikuaasevévape, ñañatendevaʼerã mbaʼépa oikotevẽ ha anítei jadesahusia chupekuéra. Natekotevẽi ningo ñamombeʼupaite ñande rapichápe jaikuaamíva guive ojapysaka porã haguérente ñanderehe. Oiméramo añete ipyʼaporã oñehaʼãta oikuaave ohóvo Jehovápe (Juan 17:3; 1 Cor. 3:6).
4. Mbaʼépa ñanemanduʼavaʼerã jajapo jave estúdio?
4 Ani jajereterei. Jesús ndahaʼéi ku heʼíva una vetépe hetaiterei mbaʼe ha ohesareapáva hapichakuérape. Upéva rangue heʼi hesakuaitépe upe omboʼeséva. Pór ehémplo omombeʼúrõ guare ‘opavave omanóva oikove jeytaha’, noñepyrũi omyesakã mbaʼépa oikóta chuguikuéra upe rire. Haʼe ohechakuaa natekotevẽiha gueteri heʼipa chupekuéra umi mbaʼe (Juan 5:28, 29). Ha ñande avei, jajapo jave estúdio ñanemanduʼavaʼerã natekotevẽiha ñañeʼẽterei umi mbaʼe noirĩva pe lívro térã follétope. Upéva rangue jaʼevaʼerã hesakuaitépe ñamboʼeséva.
5. Mbaʼérepa ñaporomboʼevaʼerã oñentende porã hag̃uáicha?
5 Aje piko jaagradesete Jehovápe ñanemboʼe haguére opa mbaʼe ñantende porã hag̃uáicha! (Mat. 11:25.) Ñande avei jajapovaʼerã upéicha ha katuete hetave oĩta oikuaáva Ñandejárape.