Mbohapy mbaʼe ñanepytyvõtava ñaporomboʼe porãve hag̃ua
1. ¿Mbaʼérepa ñañehaʼãvaʼerã akóinte ñaporomboʼe porãve?
1 Ñande ningo ñasẽ jave japredika, jajapo rrevisíta ha estúdio vívliko, ñamboʼe ñande rapichakuérape umi mbaʼe iñimportánteva oĩva la Bíbliape. Ha ñamyesakãvo “Ñandejára Ñeʼẽ” ñaipytyvõ chupekuéra “iñarandu ha ojesalva” hag̃ua (2 Tim. 3:15). ¡Ajépa tuichaite mbaʼe upéva! Upévare ñañehaʼãvaʼerã akóinte ñaporomboʼe porãve. Jahechamína mbohapy mbaʼe ñanepytyvõtava upearã.
2. ¿Mbaʼéichapa ikatu ñaporomboʼe oñentende hag̃uáicha?
2 Ñaporomboʼékena oñentende hag̃uáicha. Ñañeʼẽ jave peteĩ mbaʼe jaikuaa porãvare, ikatu ñanderesarái ñande rapichakuéra ndoikuaaiha upe jaʼéva ha ijetuʼutaha chupekuéra ontende hag̃ua. Upévare, jajapo jave estúdio vívliko ndovaléi ñahesaʼỹijo hetaiterei informasión ñane estudiántendi ha jahesareapa chupe. Upéva rangue iporãvéta ñamyesakãramo umi mbaʼe iñimportantevéva. Ñanemanduʼavaʼerã ñaporomboʼe porã hag̃ua natekotevẽiha ñañeʼẽterei (Pro. 10:19). Avei jaiporavovaʼerã umi téysto jaleétava, ha ñamyesakã pe párte oipytyvõtava pe estudiántepe ontende porãve hag̃ua pe téma ñahesaʼỹijóva. Jesús ningo omboʼevaʼekue pe Sermón del Móntepe umi mbaʼe hypyʼũva oñentende hag̃uáicha ha ndoikoi ojereterei ojapo hag̃ua upéva (Mat., kap. 5-7).
3. ¿Mbaʼérepa ideprovécho umi ehémplo, ha mbaʼeichaguápa ikatu ñanepytyvõ ñaporomboʼe porãve hag̃ua?
3 Jaiporúkena ehémplo. Jesús oiporúmi vaʼekue umi ehémplo mbyky ha ndahasýiva oñentende hag̃ua (Mat. 7:3-5; 18:2-4). Natekotevẽi ningo ñandevaleterei ñaporomboʼe hag̃ua umi ehémplo rupive. Ikatu jaiporu umi omopensáva ñande rapichápe, opokóva ikorasõre ha oipytyvõva chupe imanduʼa hag̃ua. Avei jadivuhakuaa peteĩ kuatiáre ñamyesakãve hag̃ua pe ñamboʼeséva. Jajepreparáramo katuete jaikuaáta mbaʼeichagua ehémplopa ikatu jaiporu.
4. ¿Mbaʼéichapa jaiporuvaʼerã umi porandu?
4 Jaiporu porãkena umi porandu. Umi porandu oipytyvõ pe estudiántepe opensa hag̃ua. Upévare, ñaporandu jave chupe peteĩ mbaʼe tekotevẽ ñanepasiénsia ha ñahaʼarõ ombohovái ñandéve. Péro jajapuráramo ha ñande jeýnte ñambohovaipa, ndajaikuaamoʼãi ontendépa upe ñamboʼéva chupe. Ha ojavýramo ndajajapuraivaʼerã jakorrehi hag̃ua chupe, iporãvéta jajapóramo ótro porandu hesakãve hag̃ua pe ñamboʼeséva (Mat. 17:24-27). Jaikuaa ningo ñande apytépe ndaiporiha mboʼehára iperféktova. Upévare la Biblia ñanemokyreʼỹ akóinte ñañatende hag̃ua mbaʼéichapa ñaporomboʼe, péicha ñanepytyvõta ñandéve ha avei umi ñanerendúvape (1 Tim. 4:16).