Ñamombaʼékena ñane puvlikasionkuéra
1. Mbaʼépa ñanemboʼe Jesús ehémplo?
1 Peteĩ jey Jesús omongaru hetaiterei héntepe ha upéi ombyatykapaite umi tembiʼu hembýva (Mat. 14:19-21). Péicha ohechauka omombaʼeha Jehová omeʼẽva. Upéva ningo peteĩ ehémplo neporãva ñandéve g̃uarã. Jesús ojapo haguéicha, ñande avei ñamombaʼevaʼerã opa mbaʼe Jehová omeʼẽva ñandéve hembiguái jeroviaha rupive. Upévare ‘jaagradesevaʼerã chupe’ (Col. 3:15, ÑÑB; Mat. 24:45-47; Luc. 12:42).
2. Mbaʼépa ikatu jajapo ijatýramo ñandehegui umi rrevísta?
2 Rrevistakuéra. Sapyʼánte ningo ijaty ñande rógape heta rrevísta, mbaʼépa ikatu jajapo upéicha jave? Jahechavaʼerã hembýpa ñandéve káda més ha oiméramo upéicha katu jajerure saʼivénte. Ha mbaʼépa jajapokuaa umi rrevísta ijatýmavagui ñande rógape? Jaikuaaháicha umíva ikatúnte avei oipytyvõ ñande rapichápe, upévare jarerurekuaa peteĩ ansiánope tohechauka ñandéve mbaʼéichapa ikatu ñaikuaveʼẽ.
3, 4. Mbaʼe mbaʼépa iporã jajapo jajerure mboyve puvlikasión Salónpe?
3 Ambue puvlikasionkuéra. Káda més ningo oñekuaveʼẽ jepi diferénte puvlikasión, upévare iporã jahecha raẽ noiméipa jaguerekoñaína ñande rógape upe oñekuaveʼẽtava. Ha oiméramo ndajaguerekói ikatu jajerure Salónpe. Péro natekotevẽi ningo jagueraha una vetépe hetaiterei, káda semánante jajerurekuaa ofaltáramo ñandéve.
4 Umi puvlikasión ñamboykéva ñande jaiporu hag̃ua jajerurevaʼerã jaiporútavante. Iporã ñamoĩ hese ñande réra ha ñane kongregasión réra okañýramo g̃uarã ñandehegui. Jaguerekóramo CD-ROM Watchtower Library ha ñañongatúramo umi rrevísta jaiporúmava, natekotevẽmoʼãi jajerure umi tómo La Atalaya ha ¡Despertad!.
5. Mávapepa jahejavaʼerã ñane puvlikasionkuéra ha mbaʼépa ñanemanduʼavaʼerã?
5 Mbaʼérepa ñamombaʼevaʼerã. Ñasẽ jave japredika katuete jaheja lívro, folléto térã rrevísta umi ñanerendu porãvape. Ha jaʼe jepi chupekuéra ikatuha omeʼẽ kontrivusión. Upéicharamo jepe ñanemanduʼavaʼerã ñandehegui oñehaʼarõveha ñameʼẽ ñane kontrivusión.
6. Mbaʼérepa ñamombaʼevaʼerã ñane puvlikasionkuéra?
6 Jahecha haguéicha Jesús omongaruvaʼekue heta héntepe, péro chupe g̃uarã ningo iñimportanteve oikuaauka chupekuéra Ñandejára rembipota. Upévare heʼi: “Ndahaʼéi tembiʼu añónte oikotevẽva yvypóra oikove hag̃ua, opa ñeʼẽ [Ñandejára] jurúgui osẽva avei” (Mat. 4:4). Ñane puvlikasiónpe oĩ heta mbaʼe iñimportantetereíva oñeguenohẽva la Bíbliagui ha ikatúva ñanepytyvõ jaikove hag̃ua opa ára peve (Juan 17:3). Upévare ñamombaʼe ha jaiporu porãkena ñane puvlikasionkuéra!