Jaiporu porãkena ñande literatúra oñenohẽva la Bíbliagui
1, 2. Mbaʼépa heʼi heta tapicha ñande literatúrare, ha mbaʼépa ikatu ñañeporandu?
1 “Che alee pene puvlikasionkuéra 1965 guive. Alee vove aheka umi téysto vívliko oñemeʼẽva ha ahechakuaa opaite mbaʼe oĩva pende livrokuérape oĩha la Bíbliape heʼiháicha. Che aikuaasetémi umi mbaʼe añeteguáva Ñandejára ha Jesucrístogui, ha ikatu haʼe peẽme che pyʼaite guive ajuhuhaʼaína umíva pende livrokuéra ha la Biblia rupive”. Upéicha ohai peteĩ kuimbaʼe ha omondo ikárta pe oñemotenondehápe Testigo de Jehová rembiapo. Pe kuimbaʼe ojerure avei ikártape peteĩ estúdio vívliko.
2 Pe kuimbaʼéicha avei, hetaiterei tapicha oparupigua omombaʼe umi puvlikasión omosarambíva pe “tembiguái jeroviaha ha iñarandúva” (Mat. 24:45). Káda año hetaiterei lívro ojejapo oipytyvõva umi tapicha ipyʼaporãvape ‘oikuaa porã hag̃ua pe añetegua’ (1 Tim. 2:4). Mbaʼéichapa ikatu jaiporu porã ñande literatúra oñenohẽva la Bíbliagui?
3. Mbaʼépa ikatu jajapo ani hag̃ua oñehundi ñande literatúra?
3 Ani oñehundireítei. Ohasávo pe tiémpo, ikatu ijaty ñandehegui heta literatúra ndajaiporúiva. Mbaʼépa ikatu jajapo ani hag̃ua oñehundi ñandehegui umi puvlikasión iñimportantetereíva? Ñanohẽ vove literatúra japredika hag̃ua, ñañatende porã vaʼerã mboýpa jagueraháta. Ñanohẽ heta rangue, jaguerahakuaánte peteĩ térã mokõi lívro, ha ñaguenohẽ jey umíva ñameʼẽmba rire. Upéicha jajapóramo, ndahetamoʼãi ñandehegui ñande rógape umi puvlikasión. Ijatýramo ñande rógape heta rrevísta, jajerure saʼive vaʼerã avei.
4. Mbaʼépa ikatu ojapo peteĩ kongregasión hembýramo chupe literatúra?
4 Oĩramo hetaiterei pe kongregasiónpe. Peteĩ kongregasiónpe hetaitereíramo peteĩ puvlikasión, pe oñangarekóva literatúrare ikatu oporandu umi kongregasión hiʼag̃uivévape ndaikatúipa oiporu hikuái umi lívro hembýva. Peteĩ puvlikadór ikatu oikuaveʼẽ ihentekuéra ndahaʼéiva Testígope, iñestudiantekuérape térã ótrope umi puvlikasión itujavéva. Umi ouramóva rreunionhápe avei ikatu oipota umi puvlikasión itujavéva oĩmba hag̃ua ivivliotéka.
5. Mbaʼéichapa ikatu jahechauka ñamombaʼeha ñande literatúra?
5 Ñande literatúra ojejapo oñepytyvõ hag̃ua umi ipyʼaporãvape oikuaave hag̃ua umi mbaʼe porãita Jehová ojapótavagui, ha jaipota umi lívro ojeporu upearã. Jesús nohundíri pe tembiʼu hembyvaʼekue omongaru rire umi henteita. Upéicha avei jaiporu porãse ikatuha peve umi puvlikasión vívlika oñemboúva ñandéve (Juan 6:11-13). Umi puvlikasiónpe oĩ peteĩ mensáhe ikatúva omeʼẽ jeikove opaʼỹva, ha ndopokomoʼãi ñande rapichakuéra korasõre opytáramo ñande rógape téra ñande kartérape. Upévare, ñanohẽtavo literatúra japredika hag̃ua ñañehaʼãvaʼerã jaikuaa mboýpa ikatúta jaiporu ha jaiporu porã vaʼerã umíva oipytyvõ hag̃uáicha ñande rapichakuérape (Fili. 4:5).