Mbaʼéichapa ñambohovaikuaa oĩramo ombaʼeporandúva ñandéve?
1. Mbaʼépa ohechauka ñandéve Jesús ehémplo?
1 Ajépa ñanemopirĩmba ñanemanduʼávo mbaʼéichapa Jesús ombohovaikuaavaʼekue oĩrõ ombaʼeporandúva chupe! Haʼe ningo peteĩ ehémplo porã ohechaukáva ñandéve mbaʼéichapa ñambohovaivaʼerã ñande rapichakuéra ombaʼeporandúramo ñandéve (1 Ped. 2:21).
2. Jesús ojapo haguéicha, mbaʼéichapa japilláta ñande rapicha oikuaaséva?
2 Ñaporohendukuaavaʼerã. Umi hénte ombaʼeporandu jave Jesúspe haʼe opensáma mbaʼéicha rupípa oñeporandu chupe upéva. Ñande avei jajapovaʼerã upéicha, ha tekotevẽramo ñaporandukuaa ñande rapichápe ambue mbaʼe jaikuaa hag̃ua opensáva. Sapyʼánte oñeporandu jepi ñandéve: “Peẽ piko pejerovia Jesúsre?”. Upéicha jave oiméne oikuaasehína mbaʼérepa ndajafestehái Navidad. Jaikuaa porãramo ñande rapicha oikuaaséva ndahasymoʼãi ñambohovái porã hag̃ua chupe (Luc. 10:25-37).
3. Mbaʼéichapa jatopa pyaʼevéta umi téysto ñambohovái hag̃ua ñande rapichápe?
3 Jaiporúkena Ñandejára Ñeʼẽ. Oñeporandu jave ñandéve peteĩ mbaʼe jaleevaʼerã chupe Bíbliagui voi (2 Tim. 3:16, 17; Heb. 4:12). Ha jatopa pyaʼeve hag̃ua umi téysto tuicha ñanepytyvõta lívro Razonamiento ha pe párte heʼihápe “Temas bíblicos para consideración” oĩva Traducción del Nuevo Mundo de las Santas Escrituras-pe. Péro sapyʼánte oĩ hénte ndojeroviáiva la Bíbliare, upéicharamo jepe ñatanteakuaa ha jalee chupe michĩmi jepe. Péicha ñaipytyvõñaína chupekuéra ohechakuaa hag̃ua mbaʼeichaitépa ideprovécho la Biblia heʼíva. Ñahaʼangáramo Jesúspe ñambohovaikuaáta tory ha hekoitépe ombaʼeporandúvape ñandéve, ha ñane ñeʼẽ katu ojoguáta “óro ojeguáva plátape” (Pro. 25:11).
4. Mbaʼépa jajapokuaa pe ogajára ñandejururekárõ?
4 Ñambohovaivaʼerãpa katuete? Ndajaikuaaporãiramo mbaʼéichapa ñambohováita ikuentavénte jaʼe: “Ndaikuaái, tahekavéna informasión ha upe rire ajúta ambohovái porã hag̃ua ndéve”. Péicha pe ogajára ohechakuaáta ñamboʼe porãseha chupe ha oipotáta jaha jey hendápe. Péro jahechakuaáramo pe ogajára ñanerendu guaʼunteha ha ñandejurureka oiko vaiségui reínte, iporãvéta jaháramo upégui ha jaiporu ñane tiémpo ñaipytyvõ hag̃ua umi ipyʼaporãvape (Luc. 20:1-8; Mat. 7:6).
5. Jesús ojapo haguéicha, mbaʼépa ñaikotevẽ ñambohovaikuaa hag̃ua oñembaʼeporandúramo ñandéve?
5 Jesús oikuaa porã vaʼekue oikotevẽha Jehováre oikuaauka hag̃ua pe marandu porã ha ombohovaikuaa hag̃ua oñeporandu jave chupe (Juan 18:37). Aje piko iporãite iñehémplo ñambohovaikuaa hag̃ua umi ipyʼaporãvape, ha péicha “ohupyty hag̃ua [hikuái] jeikove opaveʼỹva”! (Hech. 13:48.)