Arakaʼépa javisita jey vaʼerã umi ohendu porã vaʼekuépe?
1. Mbaʼépa jajapovaʼerã oiko hag̃ua umi héntegui Jesús remimboʼe?
1 Ñande ningo ñaipytyvõvaʼerã umi héntepe oiko hag̃ua chuguikuéra Jesús remimboʼe, ha upévare javisita jey umi oikuaasevévape la Biblia omboʼéva (Mat. 28:19, 20). Arakaʼépa javisita jey vaʼerã chupekuéra? Opyta porãveha óra ñandéve ha avei ñande rapichápe. Péro ndajahejaivaʼerã ohasa hetaiterei tiémpo. Jahechamína mbaʼérepa.
2, 3. Mbaʼérepa ndajahejaivaʼerã ohasa heta tiémpo jaha jey hag̃ua javisita umi ñanerendu porã vaʼekuépe?
2 Ani ñahaʼarõiterei jaha jey hag̃ua. Pe ‘marandu porã Ñandejára rreinoregua’ iñasãi oparupiete ha ko múndo aña katu oñehundi potaitéma (Mat. 24:14, NM; 1 Ped. 4:7). Upéicharamo jepe ikatuhína ojesalva umi ohendu porãva pe marandu. Péro upearã tekotevẽterei ‘ñamyerakuã Ñandejára Ñeʼẽ’, upéva ndeʼiséi japredikantevaʼerãha síno avei pyaʼe javisita jey umi oikuaasevévape (2 Cor. 6:1, 2; 2 Tim. 4:2, ÑÑB).
3 Japredikávo umi héntepe haʼete ñañotỹva semílla ikorasõmekuéra. Upévare akóinte jarregavaʼerã ikatu hag̃uáicha heñói. Péro ani ñanderesarái Satanás ndoguapymoʼãiha ohaʼarõ otyarõ raẽ pe semílla oipeʼa hag̃ua (Mar. 4:14, 15). Umi oikuaasevéva Jehovápe ohasa jepi heta mbaʼe ijetuʼúva ikatúva omokangy chupekuéra. Pór ehémplo oñembohory hese ihentekuéra, ikompañéro de traváho ha umícha. Upévare ndajahejaivaʼerã ohasa heta tiémpo javisita jey hag̃ua chupe. Upéicha imanduʼáta gueteri umi mbaʼe ñañemongetavaʼekuére.
4. Mbaʼépa jajapovaʼerã javisita jey hag̃ua umi héntepe?
4 Arakaʼe ha mbaʼe óra. Iporãve ningo jaʼéma voi ñande rapichápe arakaʼe ha mbaʼe órapa jaha jeýta hendápe. Avei ñaporandu chupe peteĩ mbaʼe ñambohovái hag̃uáicha jaha jey vove. Hiʼãite un díante ohasa jaha jey hag̃ua javisita chupe, péro ndaijáiramo ñandéve ani ñambohasaiterei. Térã jatopáramo hese sábado ỹrõ domingokuénte jaʼekuaa chupe jaha jeytaha hendápe una semána haguépe. Ñaanota porã vaʼerã moõitépa oiko ikatu hag̃uáicha ñakumpli hendive (Mat. 5:37).
5. Mbaʼérepa javisita jey vaʼerã pyaʼe umi ohendu porã vaʼekuépe?
5 Ko múndo aña ‘saʼipaitéma itiémpo’, upévare ñamoĩvaʼerã peteĩ día ha óra javisita jey hag̃ua umi héntepe ha ndajahejaivaʼerã ohasa heta tiémpo (1 Cor. 7:29). Jaha jeýkena umi ñanerendu porãva rendápe ha ani jaheja última orarã, upéicha jajapo porãvéta ñane rembiapo ha ikatúta ñaipytyvõ hetavépe ojesalva hag̃ua.