Ñaipytyvõkena umi oñeʼẽvape ambue idióma

1. Mbaʼeichagua héntepa ikatu jatopa ñande territóriope?

¹ Jesucristo heʼivaʼekue pe marandu porã ‘herakuãvaʼerãha opa tetã rupi’. Upévare ñande ñasẽ japredika ha ñaporomboʼe (Mat. 24:​14, NM; 28:​19, 20). Japredikávo ikatu jatopa ñande territóriope ambue tetãygua oñeʼẽva peteĩ idióma ñande nañantendéiva. Jaikuaa ningo koʼã hénte ohenduvaʼerãha avei pe marandu porã ojepytaso mbarete hag̃ua Ñandejára ykére og̃uahẽ mboyve hiʼára guasu (Mal. 3:18). Mbaʼéichapa ñande ikatu japredika umi hénte tetã ambueguápe oĩva ñande territóriope?

2. Mbaʼéichapa jahechaukakuaa jahayhuha umi oñeʼẽvape ambue idióma?

² Ñamombaʼékena umi oñeʼẽva ambue idiómape Jehová omombaʼeháicha. Jahayhuvaʼerã umi hénte ñande territorioyguápe oñeʼẽva ambue idióma Jehová ohayhuháicha chupekuéra. Mbaʼéichapa jajapokuaa upéva? Ñañehaʼãmbaitévo ñamombeʼu chupekuéra iñeʼẽtépe Ñandejára rembipota (Sal. 83:18; Hech. 10:​34, 35). Ha jepe jajesarekovaʼerã umi hénte oñeʼẽvare ñane idióma, tekotevẽ avei ñaipytyvõ umi oñeʼẽvape ambue idióma. Jahekavaʼerã chupe ládo ohendu hag̃ua avei hikuái Ñandejára marandu porã. Aníkena ñanderesarái jaheja reíramo umichaguápe ndajapredikaihahína opa tetã rupi Jehová oipotaháicha. Upéicharõ, mbaʼéichapa ikatu ñaipytyvõ porãve umi oñeʼẽvape ambue idióma?

3. Mbaʼe puvlikasiónpa ñanepytyvõta japredika hag̃ua umi oñeʼẽvape ambue idióma? Ha mbaʼépa jajapovaʼerã jaiporukuaa hag̃ua?

³ Jaiporúkena pe folléto Notísia porã opavave tapichakuérape g̃uarã. Ko folléto ñanepytyvõta oĩramo ñande territóriope oñeʼẽva peteĩ idióma ñande nañantendéiva. Upévare iñimportanteterei jagueraha ñasẽta jave japredika. Péro upe mboyve jaikuaa porã vaʼerã mbaʼépa heʼi ipype jaiporukuaa hag̃ua. Pór ehémplo ikatu ñamarka umi idióma oñeñeʼẽvéva ñande territóriope. Ha pe ogajára olee rire pe follétope oĩva, ñameʼẽkuaa chupe peteĩ puvlikasión iñeʼẽme.

4. Mbaʼéichapa ikatu jaiporu predikasiónpe pe folléto Notísia porã?

⁴ Jatopáramo peteĩ tapicháre ndajaikuaáiva mbaʼe idiómapepa oñeʼẽ ikatu jaavri pe folléto Notísia porã, ha ijapére jatopáta peteĩ mápa. Jahechauka chupe mbaʼe tetãyguápa ñande, ha upéi jajerure chupe tohechauka ñandéve moõguápa haʼe ha mbaʼe idiómapa oñeʼẽ. Jaikuaa rire upéva ikatu jahecha pe índise ha jaheka mbaʼe páhinapepa oĩ. Upéi jahechauka pe primera párte oĩva létra hũvévape oikuaa hag̃ua maʼerãpa jaha hendápe. Oleepa rire ikatu ñameʼẽ chupe peteĩ tratádo iñeʼẽtépe térã jahechauka pe párte oñepintáva gríspe, heʼihápe jaguerutaha chupe puvlikasión iñeʼẽme. Jajapopa rire upéva jahasa pe párte oĩva létra hũvévape heʼihápe “che réra” ha jaʼe chupe ñande réra ontende hag̃uáicha. Upéi jahechauka heʼihápe “nde réra” oĩva avei létra hũvévape ha ñahaʼarõ tombohovái. Jajapopávo koʼã mbaʼe jaʼekuaa chupe jajuseha jey hendápe ha ñañehaʼãmbaite ñakumpli hendive.

5. Mbaʼe mbaʼépa jajapovaʼerã ñaipytyvõ porã hag̃ua umi oñeʼẽvape ambue idiómape?

⁵ Javisita jeýkena umi ohendu porã vaʼekuépe. Jahechakuaáramo umi hénte oñeʼẽva ótro idióma oikuaaseveha Ñandejára rembipota ha umi mbaʼe omboʼéva Iñeʼẽ, ñamyenyhẽvaʼerã pe kuatia Sírvase visitar (S-43). Upe rire ñameʼẽ pyaʼe porã pe sekretáriope omondo hag̃ua sukursálpe. Sukursál katu omondo jeýta pe grúpo oñeʼẽvape upe idióma. Og̃uahẽvo ko kuatia upe kongregasión térã grúpope, oñehaʼãtama hikuái otopa upe ohendu porã vaʼekuépe. Iporãta avei pe sekretário omeʼẽramo peteĩ kópia upe kuatiágui superintendénte de servísiope, ikatu hag̃uáicha oñepytyvõ porã umi héntepe. Péro ani ñanderesarái ñamyenyhẽvaʼerãha upe kuatia oiméramo umi hénte oikuaaseve añete Ñandejárape ha umi mbaʼe ojapótava.

6. Mbaʼépa jajapokuaa ñamondo rire pe kuatia Sírvase visitar?

⁶ Jaikuaaháicha ndahaʼéi la ñamondóre pe kuatia Sírvase visitar ojehótama voi upe ohendu porã vaʼekue rendápe. Upéicha rupi iporã jaha jey javisita ñande rapichápe jaguerahauka rire pe kuatia, ani ág̃a oimoʼã ñanderesaraiha mbaʼe chugui. Ikatu voi jajapo chupe estúdio. Péro moõ piko jatopakuaa puvlikasión iñeʼẽme?

7. Moõpa ikatu jatopa umi puvlikasión ambue idiómape?

⁷ Puvlikasionkuéra ambue ñeʼẽme. Ndovaléi jaguereko kongregasiónpe hetaiterei puvlikasión ambue ñeʼẽme, upéicha ikatu hembypa rei ñandéve. Péro oiméramo ndajaguerekói ni peteĩ voi ha oñekotevẽ, upéicharõ ojejerurentevaʼerã. Superintendénte de servísio ohechavaʼerã oĩpa pe territóriope oñeʼẽva ambue idióma oikuaasevéva añete la Biblia omboʼéva, ikatu hag̃uáicha oikuaa mboy puvlikasiónpa oñekotevẽta kongregasiónpe. Oĩ avei ermáno omboguejýva Internétgui umi puvlikasión iñeʼẽtépe (www.watchtower.org). Upépe ningo jatopakuaa puvlikasión hetaiterei ñeʼẽme ikatútava oipytyvõ heta héntepe oikuaave hag̃ua Jehovápe tahaʼe haʼéva iñidióma.

8. Mbaʼépa ikatu jajapo kongregasiónpe oho jave peteĩ noñeʼẽiva ñane idióma?

⁸ Kongregasión. Sapyʼánte peteĩ lugárpe heta hetave ohóvo umi oñeʼẽva ambue idióma, péro ndaipóri ni peteĩ kongregasión upe ñeʼẽme ijypypekuéra. Mbaʼépa jajapokuaa umícha jave? Ikatu ñainvita upe tapichápe oho hag̃ua ñanendive salónpe, jepe noñeñeʼẽi upépe iñidióma. Entéronte oguerohory ha omomaitejoáramo chupe katuete ohose jeýta ojejapo vove ótro aty. Ñepyrũrã ikatu hiʼotĩ oñeʼẽ rupi ótro idióma térã hetãme ojepokuaa rupi ojapo heta mbaʼe ñande ndajajapóiva. Upéicharamo jepe ohechakuaáta ñande testigo de Jehová jajoayhu añeteha ha upéva ikatu omokyreʼỹ chupe (Sof. 3:9; Juan 13:35). Oiméramo nde reñeʼẽ syryry ambue idióma ha ikatúta revisita umi oñeʼẽvape upe idióma remombeʼukuaa pe sekretáriope ha haʼe omondóta upe informasión sukursálpe. Upéicha haʼekuéra oikuaáta ikatuha ojevale nderehe oñekotevẽha óra ojevisita umi oñeʼẽvape ambue idióma.

9. Mbaʼéicha javépa ikatu pe sukursál ojapouka peteĩ kúrso ermanokuérape? Ha mbaʼéichapa ojejapovaʼerã?

⁹ Ñaaprende hag̃ua ambue idióma. Ñaipytyvõ porãve hag̃ua peteĩ oñeʼẽvape ambue idióma, iporãvéta ñamokyreʼỹrõ chupe oho hag̃ua peteĩ kongregasión oñeñeʼẽhápe upe idióma. Péro oiméramo ndaikatúi oho ñande voi ñaaprendekuaa upe idióma. Ndaipóriramo ni peteĩ kongregasión ag̃ui upégui ha oĩ heta oikuaasevéva la Biblia omboʼéva, upéicharõ sukursál ikatu ojapo peteĩ kúrso ermanokuéra oaprende hag̃ua upe idióma. Oñemombeʼúta kongregasionkuérape moõpa tekotevẽ ojepredika ambue ñeʼẽme ha oĩtaha peteĩ kúrso oñemboʼe hag̃ua upe idióma. Umi oĩséva guive ko kúrsope oikuaa porã vaʼerã ikatuha ojeguerova chupe ikongregasióngui.

10. Mbaʼe mbaʼépa tekotevẽ ojejapo oĩ hag̃ua peteĩ grúpo oñeʼẽva ambue idióma?

¹⁰ Ojejapo hag̃ua peteĩ grúpo oñeʼẽva ambue idióma. Mbaʼépa oñekotevẽ oĩ hag̃ua peteĩ grúpo oñeʼẽva ambue idióma? Oĩ irundy mbaʼe: 1) Oĩvaʼerã heta tapicha oikuaaséva Ñandejárape. 2) Oĩvaʼerã ermáno, jepe mbovymi, oñeʼẽva upe idióma térã oaprendevahína. 3) Oĩvaʼerã peteĩ jepe ansiáno térã siérvo ministeriál ikatupyrýva oñangareko hag̃ua upe grúpore ha omoakã hag̃ua rreunionkuéra upe idiómape. 4) Oĩvaʼerã peteĩ cuerpo de ancianos ambue kongregasiongua oipytyvõva ko grúpo pyahúpe. Oĩmbaitéramo koʼã mbaʼe cuerpo de ancianos omombeʼuvaʼerã sukursálpe oikuaamíva guive ko grúpogui ha ojerurevaʼerã ikatúpa ikongregasión oñangareko ko grúpore (ehecha avei Organizados, páhina 106 ha 107). Pe ansiáno térã siérvo ministeriál oñangarekótava ko grúpore hérata “superintendénte de grúpo” térã “siérvo de grúpo”.

11. Mbaʼérepa iñimportantete japredika ñande territóriope umi oñeʼẽvape ambue idióma?

¹¹ Iñimportanteterei ningo japredika ñande territóriope umi oñeʼẽvape ambue idióma. Upéicha jahechaukañaína jasegiha pe tembiapo Jesucristo omoñepyrũvaʼekue ha ñaipytyvõ ojepredika hag̃ua ko múndo tuichakuére. Katuete enterovéva ñambaʼapose Jehovápe g̃uarã, haʼe ningo omboguahína opa tetã otopa hag̃ua umi ipyʼaporãvape (Ageo 2:7). Aje piko javyʼaite ikatu haguére ñaipytyvõ umi oñeʼẽvape ambue idióma! Jajerurékena Jehovápe tohovasami ko tembiapo, haʼe katuete oipytyvõta chupekuéra oñakãrapuʼã hag̃ua iservísiope (1 Cor. 3:​6-9).