‘Ñañemeʼẽmbaitékena’ ñaipytyvõ hag̃ua ñane estudiántepe
1. Mbaʼépa jajapovaʼerã jaipotáramo ñane estudiánte oñakãrapuʼã?
1 Iñimportánteramo jepe ñambostudia ñande rapichakuérape, ndahaʼéi upévante oikotevẽva hikuái ojevautisa hag̃ua. Apóstol Pablo heʼi oñangareko hague umi ou ramóvare kongregasiónpe, peteĩ sy oñangareko ha omokunuʼũháicha imembýpe. Upéicha avei ñande jaipotáramo ñane estudiantekuéra oñakãrapuʼã kongregasiónpe, ‘ñañemeʼẽmbaitevaʼerã’ ñaipytyvõ hag̃ua chupekuéra (1 Tes. 2:7-9).
2. Mbaʼérepa iporã jajepyʼapy ñane estudiántere? Mbaʼéichapa ikatu jajapo upéva?
2 Jajepyʼapýkena hesekuéra. Pe estudiánte ojapóvo la Biblia heʼíva, oheja ohóvo ijúnta vai yma guare (1 Ped. 4:4). Ikatu avei ihentekuéra omboyke chupe ostudia haguére (Mat. 10:34-36). Upévare iporã jajepyʼapy hese ha ñaime ijykére, péicha noñeñandumoʼãi haʼeñoite. Oñeʼẽvo ko mbaʼére peteĩ misionéro ikatupyrýva heʼi: “Aníkena rejapuraiterei ha restudiapa vai vaíre resẽma reho. Ija porãramo ikatu repyta reñemongeta hendive sapyʼaite jepe”. Ñanembaʼerechakuaákena oimérõ ñane estudiánte oikotevẽ ñaipytyvõ chupe. Pór ehémplo, hasýramo ikatu ñahenói térã jaha javisitami chupe. Ha oúramo rreunionhápe jaguapykuaa hendive ha ñañatende chupe imembykuérare.
3. Mbaʼépa ikatu jajapo umi ermáno oipytyvõ hag̃ua ñane estudiántepe?
3 Enterovete ikatu ñaipytyvõ. Ñasẽramo japredika ñane estudiánte róga ypýrupi, iporãta ñag̃uahẽramo javisitami chupe. Upekuévo ikatu ñapresenta chupe umi ermáno osẽva ñanendive. Avei opyta porãramo, jajerurekuaa ambue ermáno térã ansiánope oho hag̃ua ñanendive ñambostudia jave chupe. Ani ñahaʼarõiterei ñainvita hag̃ua chupe rreunionrã. Péicha oikuaáta hetave ermánope ha ovyʼáta hendivekuéra ohechávo mbaʼéichapa kongregasiónpe enterove jajotrata peteĩ famíliaicha (Mar. 10:29, 30; Heb. 10:24, 25).
4. Mbaʼépa jahupytýta ñañemeʼẽmbaitéramo ñaipytyvõ hag̃ua ñane estudiántepe?
4 Ñapensami mbaʼeichaitépa ovyʼa peteĩ túva oñehaʼãmbaitéva oipytyvõ ifamíliape, ohechávo ojeroviaha hikuái Jehováre ha ohoha tape porãre (3 Juan 4). Opavave ikatu avei péicha javyʼa ñañemeʼẽmbaitéramo ñaipytyvõ hag̃ua ñane estudiántepe.