Umi kogaty otyarõmbáma oñemonoʼõ hag̃ua
1. Mbaʼe tembiapo iñimportántevapa ojejapo koʼág̃a rupi?
1 Jesús opredika rire peteĩ kuña Samariayguápe heʼi hemimboʼekuérape: “Pemaʼẽ umi kogaty rehe otyarõmbamaha oñembyaty hag̃ua” (Juan 4:35, 36, BNP). Upe heʼivaʼekue ohechauka oñepytyvõvaʼerãha umi ipyʼaporãvape oservi hag̃ua Ñandejárape. Ha Jesús ohechakuaáma ko tembiapo ojejapotaha ko yvy tuichakuére. Koʼág̃a rupi yvága guive haʼe ohecha mbaʼéichapa ikatu oñepytyvõ umi ipyʼaporãvape oñemoag̃ui hag̃ua Ñandejárare (Mat. 28:19, 20). Mbaʼéichapa jahechakuaa ko tembiapo oñakãrapuʼãha ohóvo og̃uahẽmbotaitévo huʼãme?
2. Mbaʼérepa jaʼekuaa oñemohuʼãmbotaitemaha pe kóga ñemonoʼõ?
2 Oñemonoʼõ ko yvy tuichakuére. Áño de servísio 2009-pe ojehecha hetaveha amo 234.021 rupi umi maranduhára ko yvy tuichakuére. Ha umi tetã ndaikatuihápe ojepredika katu 14% voi hetave. Ojejapo káda més 7.619.000 rasa estúdio vívliko. Áño 2009-pe ojejapo hetaitereive estúdio áño 2008-gui, haimete 500.000 voi. Okakuaave rupi ko tembiapo oñekotevẽve umi misionérore. Avei ojepredika opaichagua idiómape ha oho porãiterei chupekuéra. Ojekuaa og̃uahẽmbotaitemaha huʼãme ko tembiapo ha Jehová oipotaha jajopypaite ñamonoʼõ hetave hag̃ua (Isa. 60:22). Ha nde, nekyreʼỹpa rejapo hag̃ua ko tembiapo?
3. Mbaʼépa opensa jepi heta ermáno iterritóriore?
3 Oñemonoʼõ ñande territóriope. Ikatu oĩ heʼíva: “Che aikohárupi ningo saʼieterei oĩ ohenduséva”. Ha ikatu oime upéicha ñambojojáramo ótro territóriore térã ñapensáramo mbaʼeichaitépa ymave ohendu umi hénte. Upévare heta ermáno heʼi oñemonoʼõmbatamaha iterritóriope, ha koʼág̃a oñembyatyntemaha umi hembýva. Péro, upéicha piko añete?
4. Mbaʼéichapa jahechavaʼerã pe kóga ñemonoʼõ, ha mbaʼérepa nañanekangyivaʼerã koʼág̃a?
4 Oñemonoʼõ jave peteĩ kogaty heta oñembaʼapo, oñepyrũ guive opa peve. Jesús voi ohechaukavaʼekue ko tembiapo iñimportantetereiha heʼívo: ‘Pe kóga oñemonoʼõvaʼerã ningo hetaiterei, omonoʼõva katu saʼi. Upévare pejerurékena pe kóga Járape tombou hetave omonoʼõvaʼerã’ (Mat. 9:37, 38, NM). Jehová hína pe kóga Jára ha haʼe odesidi arakaʼe ha moõpa heñói porãvéta (Juan 6:44; 1 Cor. 3:6-8). Upéicharõ, mbaʼépa ñande jajapovaʼerã? La Biblia ombohovái heʼívo: “Eñemitỹ pyharevekue ha kaʼarukue eñemitỹ avei” (Ecl. 11:4-6). Ko tembiapo oñemohuʼãmbotaitéma, upévare aníkena ni mbaʼevéicharõ ñanekangýtei!
5. Mbaʼérepa akóinte japredika kyreʼỹ vaʼerã?
5 Neʼĩra gueteri oñemonoʼõmba. Ojepredikáramo jepe heta vése ñande territóriope ha haʼete voi avave nañanerenduséiva, ani ñanekangy upévare. Síno ñanekyreʼỹ ha japredika meme vaʼerã, mbaʼérepa? (2 Tim. 4:2.) Oiko rupi hetaiterei mbaʼe vai ko múndo tuichakuére, heta hénte okambia opensa lája ha ojepyʼapy henonderãre. Mitãrusukuéra katu ndaipyʼaguapýi ha heta vése ndoikuaái mbaʼépa ojapóta. Oĩ katu ohecháva akóinte japredikaha ha upévare koʼág̃a ojapysaka ñanderehe, jepeve yma nohenduseivaʼekue. Ha oĩramo jepe ndoikuaaséiva mbaʼeve la Bíbliagui, ñande ñamomaranduvaʼerã avei chupekuéra (Eze. 2:4, 5; 3:19).
6. Mbaʼépa jajapokuaa ani hag̃ua ñanekangy predikasiónpe?
6 Mbaʼépa jajapokuaa ani hag̃ua ñanekangy oĩramo nañanerenduséiva ñande territóriope? Iporãta japredikáramo avei ambue hendáicha, pór ehémplo negosiohárupi, teléfono rupive térã ikatu avei ñakambia ñane presentasión. Ñasẽkuaa japredika kaʼaruete térã ambue óra ikatuhápe jatopa umi héntere hogakuérape. Avei ñaaprendekuaa ótro idióma ikatu hag̃uáicha japredika hetave tapichápe. Ha jajapóramo prekursorádo rregulár katu hetaitereive mbaʼe jahupytýta predikasiónpe. Ikatu avei jaha umi lugár oñekotevẽhápe maranduhára. Jahechakuaáramo iñimportanteha ko tembiapo, ñañehaʼãta jajapo opa ikatúva japredikave hag̃ua.
7. Arakaʼe pevépa ñamonoʼõvaʼerã?
7 Umi ombaʼapóva kokuépe oikuaa porã saʼiha pe tiémpo orekóva omonoʼõ hag̃ua pe kóga, upévare ndopytuʼúi ni michĩmi ombyatypa peve. Ñande avei jahechakuaavaʼerã mbykypaitemaha pe tiémpo hembýva. Arakaʼe pevépa ñamonoʼõvaʼerã? Ñandejára Ñeʼẽ heʼi og̃uahẽ meve huʼãme pe ára paha (Mat. 24:14; 28:20). Jesús ojapo haguéicha, ñande ñamohuʼãvaʼerã avei pe tembiapo ojehejavaʼekue ñandéve (Juan 4:34; 17:4). Upévare akóintekena jajapo ñande servísio kyreʼỹme ha vyʼapópe (Mat. 24:13). Ha aníkena ñanderesarái pe kóga neʼĩra gueteriha oñembyatypa!
[Komentário oĩva páhina 2-pe]
Oñemonoʼõ jave peteĩ kogaty heta oñembaʼapo, oñepyrũ guive opa peve