“Pejapo kóva penemanduʼávo cherehe” Ág̃a 2 de abril ñañemomanduʼa jeýta hína Jesús ñemanóre
1. Mbaʼérepa iñimportantete ko áñope pe fécha 2 de abril?
1 Ko áñope, ág̃a 2 de abril, heta tapicha oñembyatytahína oparupiete, oñemomanduʼa jey hag̃ua mbaʼéichapa Jesús omanorakaʼe ñande rehehápe. Omanórõ guare haʼe ohechauka Jehová añoite iderechoha ñanesãmbyhývo. Ha Satanás ijapuhague heʼívo jaserviha Ñandejárape omeʼẽgui ñandéve opa mbaʼe ñaikotevẽva (Job 2:1-5). Jesús Séna Paha ñanemomanduʼáta avei haʼe omeʼẽhague hekove perfékto ‘onohẽ hag̃ua hetápe ivaívagui’ (Mat. 20:28). Upévare haʼe ojerure hemimboʼekuérape: “Pejapo kóva penemanduʼávo cherehe” (Luc. 22:19). Reagradeségui Jehovápe ko mbaʼére, reñembosakoʼimapareína reñemomanduʼa jey hag̃ua pe mborayhu tuichaitéva Jehová ohechaukavaʼekuére ñandéve? (Juan 3:16.)
2. Mbaʼéichapa ikatu jarekomañaína ñande pyʼapýpe pe Conmemoración?
2 Jarekómakena ñandepyʼapýpe. Jaleemavaʼerã hína mbaʼe mbaʼépa Jesús ojapovaʼekue omano mboyvemi. Jajapóramo upéicha jarekotamañaína ñandepyʼapýpe upe mbaʼe (Esd. 7:10). Upearã pe folléto Examinando las Escrituras diariamente 2007 ha pe Calendario de los testigos de Jehová 2007, ogueru heta téysto vívliko oñeʼẽva upévare. Umi téysto omombeʼúva mbaʼépa oikovaʼekue Jesús omano mboyve, oñemohenda opyta porã hag̃uáicha ñane kalendáriore. Umi día ha fécha oñemombeʼúva Ñandejára Ñeʼẽme katu ojeporu pe kalendário judíope oĩháicha, upépe peteĩ día oñepyrũ kaʼaru pytũ ha opa ótro kaʼaru pytũ. Upéva jahechakuaáta hína jalee vove upe téysto oñemoĩva Jesús Séna Paha rehegua. Jalee, ñañemboʼe ha jajepyʼamongetáramo pe mborayhu Jehová ohechaukavaʼekuére, ñanepytyvõta ñamombaʼeve hag̃ua pe Conmemoración.
3. Mbaʼéichapa ikatu ñaipytyvõ umi oikuaasevévape ha umi ermáno ndohovéivape rreunionhápe, oho hag̃ua Conmemoraciónpe?
3 Ñainvitákena ñande rapichakuérape ou hag̃ua avei. Ñane Rembiapo Rréino Rehegua osẽvaʼekue márzope omombeʼu kuri ñamosarambitaha invitasión Conmemoracionrã. Rejepreparamapareína remosarambi hag̃ua ikatuhaguéicha ko invitasión? Rerekómapa lístape máva mávapepa reinvitáta? Reinvita ñepyrũmapareína? Ñañehaʼãkena ñag̃uahẽ voimi ko rreuniónpe ikatu hag̃uáicha ñamomaitei opavavépe og̃uahẽ vove, koʼýte umi ñainvitavaʼekuépe. Ikatu ñamboguapy chupekuéra ñande ykére ha ñameʼẽ chupekuéra peteĩ Biblia ha kántiko, oiméramo ndorekói. Ha ñapresenta chupekuéra umi ermánope. Opa rire pe rreunión ñañemongetavaʼerã hendivekuéra ñambohovái hag̃ua umi mbaʼe oikuaasevéva hikuái. Ñainvita jey chupekuéra ou hag̃ua ojejapo vove diskúrso espesiál ag̃a 15 de abril. Ansianokuéra oñatendevaʼerã oñeinvitapa hag̃ua koʼã rreunionrã, opavave umi ermáno ndohovéivape rreunionhápe térã umi nosẽvéivape predikasiónpe.
4. Mbaʼéichapa ikatu ñaipytyvõ ñande rapichápe pe Conmemoración rire oñakãrapuʼã ha oservi porãve hag̃ua Ñandejárape?
4 Ñaipytyvõkena umi oikuaasevévape ha umi ermáno ikangývape oñakãrapuʼã hag̃ua. Pe ermáno ojapóva diskúrso Conmemoraciónpe omombeʼúta mbykymi ikatuha ñamboʼe la Biblia umi ñande rapicha oikuaasevévape ha omokyreʼỹta umívape oikuaave hag̃ua ohóvo Jehovápe. Rejevalekuaa ág̃a upe ojeʼévare reikuaveʼẽ hag̃ua umi reinvitavaʼekuépe restudia hag̃ua hendivekuéra. Oiméramo ndostudiái gueteri hikuái la Biblia avave ndive, javisitavaʼerã chupekuéra pe Conmemoración rire ha jahechauka chupekuéra mbaʼéichapa ñamboʼe la Biblia ha reietenteha. Ikatu hag̃uáicha oñakãrapuʼã ha oservi porãve Ñandejárape ohovaʼerã avei umi ótro rreunión ojejapóvape (Heb. 10:24, 25). Upévare, ñamokyreʼỹkena chupekuéra oho meme hag̃ua. Oho rire Conmemoraciónpe umi ermáno ndohovéiva rreunionhápe, ansianokuéra ohovaʼerã ovisita chupekuéra. Omokyreʼỹvaʼerã chupekuéra ojepyʼamongeta hag̃ua pe diskúrsope ojeʼevaʼekuére. Ojapóramo upéicha ikatu ikyreʼỹ hikuái oñembyaty jey hag̃ua kongregasión ndive.
5. Mbaʼéichapa ikatu ñanepytyvõ jajepyʼamongetáramo Conmemoración rehe?
5 Pe Conmemoración ñanemomanduʼa ha ñanemopensa Jehová ha Jesús ojapovaʼekuére ñanderehehápe. Jajepyʼamongetáramo umi mbaʼére, jahayhuverei chupekuéra, ha upéva ojekuaa ñande rekovére (2 Cor. 5:14, 15; 1 Juan 4:11). Jajepreparamavaʼerã ñaína ha ñainvita umi oikuaasevévape ikatu hag̃uáicha oho pe rreunión iñimportantetévape, ‘ñamombeʼutahápe Jesús omanohague’ (1 Cor. 11:26).