Ikatúpa rehasa Macedóniape?

1. Mbaʼéicha rupípa Pablo ha iñirũnguéra oho Macedóniape?

¹ Amo áño 49 rupi apóstol Pablo osẽ Antioquía de Síriagui ha oho isegúndo viáhepe ovisita hag̃ua Éfeso ha ambue táva oĩva Asia Menórpe. Péro pe espíritu sánto rupive ojeʼe chupe: “Ehasána Macedóniape”. Haʼe ha iñirũnguéra kyreʼỹme ojapo upéicha, ha omoñepyrũ hikuái upépe pe kongregasión ypykue (Hech. 16:9, 10; 17:1, 2, 4). Koʼág̃a rupi avei ñande japredikavaʼerã ko yvy tuichakuére, ha heta hendápe oñekotevẽterei maranduhára oipytyvõvaʼerã (Mat. 9:37, 38). Ndépa reime reipytyvõ hag̃uáicha?

2. Mbaʼérepa ikatu oĩ opensáva ndaikatumoʼãiha ova ambue tetãme?

² Oiméne nde avei reipytyvõse oñekotevẽvehápe apóstol Pablo ojapo haguéicha, péro nerepensáiva gueteri reva ambue tetãme. Térã ndaikatumoʼãi reho Escuela de Galaádpe rehasáma rupi pe eda ojejeruréva, nde soltéra rupi térã remongakuaa gueteri ne família. Ikatu avei nderehoséi ambue tetãme repenságui ndaikatumoʼãiha reñeʼẽ ótro idiómape, térã reváma voi kuri ne retãgui ivai rupi la situasión, ha koʼág̃a ijetuʼúma ndéve reva jey hag̃ua. Péro ikatu reñemboʼe ha rejepyʼamongeta porã rire rehechakuaa ijataha ndéve reho hag̃ua reipytyvõ ambue tetã oñekotevẽvehápe.

3. Rehomantevaʼerã piko Escuela de Galaádpe reipytyvõ hag̃ua ambue tetãme?

³ Rehomantevaʼerã piko Escuela de Galaádpe? Apóstol Pablo ha iñirũnguéra ningo ohupytyvaʼekue heta mbaʼe porã ojerovia rupi Jehová ha ijespíritu sántore (2 Cor. 3:1-5). Upévare jaʼekuaa ikatuha tuicha reipytyvõ tetã ambuépe, ndaikatúiramo jepe reho Escuela de Galaádpe. Nemanduʼavaʼerã avei pe Eskuéla Jaiporukuaa Hag̃ua la Biblia ha Aty Ñanemboʼéva Japredika Hag̃ua ikatuha akóinte nembokatupyry. Avei reváramo ambue tetãme, upéva tuicha nepytyvõta ndekatupyryve hag̃ua oiméramo rehose Escuela de Galaádpe térã ambue eskuélape.

4. Ikatúpa umi ijedámava oho oipytyvõ umi tetã oñekotevẽvehápe maranduhára?

⁴ Ermanokuéra ijedámava. Umi ermáno ijedámava, ijerovia mbarete ha hesãiva tuichaiterei ikatu oipytyvõ umi tetã oñekotevẽvehápe maranduhára. Ndépa rejehuviláma? Oĩ umi sueldoʼimíre jepe ikatúmava oñemantene peteĩ tetã imboriahúvape, upérupi ningo saʼive ojegasta ojeho hag̃ua doktórpe térã varatove heta mbaʼe.

5. Emombeʼu mbaʼépa ohasa peteĩ ermáno ojehuvilavaʼekue ha ova tetã ambuépe.

⁵ Peteĩ ermáno oservíva de ansiáno ha prekursór oñeʼẽva ingléspe, ojehuvila rire ova Ásiape suréste gotyo oipytyvõ hag̃ua peteĩ grúpope. Upépe oĩ nueve maranduhára oñeʼẽva ingléspe ha haʼe omoirũ chupekuéra opredika hag̃ua umi 30.000 tetã ambueguápe oikóva upépe. Dos áño haguépe ijatýma hikuái 50 umi rreunionhápe. Upe ermáno heʼi: “Ava rupi koʼápe hetaiterei mbaʼe porãma Jehová omeʼẽ chéve. Amombeʼupátarõ peẽme umi mbaʼe ahupytýva, ñanekoʼẽmbáta koʼápe”.

6. Mbaʼépa ohasáraʼe peteĩ ermána soltéra ohóva oipytyvõ peteĩ tetã oñekotevẽvehápe maranduhára?

⁶ Ermanakuéra soltérava. Ñamombaʼeterei ningo mbaʼéichapa Jehová ojevale ermanakuérare oikuaauka hag̃ua pe marandu porã umi tetã oñekotevẽvehápe maranduhára (Sal. 68:11). Pór ehémplo, peteĩ ermána imitãva ohosevaʼekue ambue tetãme opredikave hag̃ua, péro isy ha itúva ojepyʼapy oikórõ g̃uarã hese mbaʼe vai upérupi. Upémarõ oiporavo peteĩ tetã ndaiporihápe provléma polítiko ha ndaivaieteihápe la situasión. Upéi ohai peteĩ kárta upe tetãmegua sukursálpe, ha oñemondo ko ermánape informasión tuicha oipytyvõtava chupe. Umi seis áño oiko aja upe tetãme ohupyty hetaiterei mbaʼe porã Jehová servísiope. Haʼe heʼi: “Apytánterire che retãme, saʼi arekovaʼerãmoʼã estúdio vívliko. Péro aha haguére aipytyvõ oñekotevẽvehápe areko heta estúdio ha upéva chembokatupyryve aporomboʼe hag̃ua”.

7. Emombeʼu mbaʼépa ohupyty peteĩ família ova rupi tetã ambuépe.

⁷ Umi ifamíliava. Ndépa repensa ne família haguére ndaikatumoʼãiha reva tetã ambuépe rembaʼapove hag̃ua Jehová servísiope? Peteĩ sy ha túva, orekóva mokõi mitã de ocho ha diez áño, odesidi ojapo upéicha. Pe ermána heʼi: “Rovyʼa romongakuaa haguére koʼápe ore familiakuérape, upéicha rupi ojeheʼa hikuái heta prekursór ha misionérore. Rohechakuaa roservi rupi oñekotevẽvehápe rohupyty hague heta mbaʼe porã ore rekovépe”.

8. Ikatúpa reho reservi ambue tetãme nereñeʼẽiramo jepe ótro idióma? Emyesakã.

⁸ Oñeñeʼẽramo ambue idiómape. Nderevaséipa rekyhyjégui reaprende hag̃ua ambue idióma? Ikatuhína oñeñeʼẽ ne idióma umi tetã oñekotevẽvehápe maranduhára. Peteĩ ermáno ha hembireko oñeʼẽva ingléspe ova peteĩ tetã oñeñeʼẽhápe españól, péro upépe oiko avei heta tetã ambuegua oñeʼẽva ingléspe. Sukursálgui oñemondo chupekuéra informasión heʼihápe mboy kongregasiónpa oĩ oñeʼẽva ingléspe ha oikotevẽva hetave maranduhára. Haʼekuéra oiporavo peteĩva ha oho dos vése upépe. Upéi oho jey hikuái hógape, oñehaʼã saʼive ogasta káda més ha ombyaty ipláta un áño aja. Ha oĩmaramo ova hag̃uáicha, umi ermáno upe tetãmegua oipytyvõ chupekuéra otopa hag̃ua hogarã varatomíva.

9, 10. Mbaʼépa ikatu ojapo umi ohovaʼekue hetãgui, ha mbaʼérepa?

⁹ Umi ohóva hetãgui. Rehópa ne retãgui reikuaa mboyve Jehovápe? Ikatuhína oñekotevẽve maranduhára ne retãme. Upévare, repensámavapa reho jeývo repredika hag̃ua upépe? Umi tetã ambueguápe ningo ijetuʼuve otopa hag̃ua itravahorã, hogarã ha oaprende hag̃ua pe idióma oñeñeʼẽva ne retãme, péro ndéve g̃uarã ndaijetuʼumoʼãi koʼã mbaʼe. Avei umi hénte ikatuhína nerenduseve ndéve umi tetã ambueguápe rangue.

¹⁰ Peteĩ kuimbaʼe Albaniaygua ohovaʼekue oiko hag̃ua Itáliape. Upépe ojuhu peteĩ traváho iporãva ha upéicha rupi ikatu omondo pláta ifamíliape. Tiémpo rire oikuaa Jehovápe ha oservi chupe. Upéi oñepyrũ omboʼe albanés umi precursor especial Italiayguápe ohótava opredika Albániape. Ko ermáno omombeʼu: “Haʼekuéra ningo noñeʼẽkuaái albanéspe, upéicharamo jepe ovyʼaiterei ohóta haguére pe tetã ahejavaʼekuépe. Che katu añeʼẽkuaa upe idiómape ha avei aikuaa mbaʼéichapa oiko umi hénte upepegua, upévare apensa: ‘Mbaʼe piko che ajapo Itáliape?’”. Upe rire ko ermáno odesidi oho jey hetãme opredikave hag̃ua, ha heʼi: “Nambyasýiva aheja haguére che traváho ha pe pláta aganáva Itáliape. Che aikuaa ko tembiapo iñimportantetereiha. Ha avyʼaiterei voi aiporu haguére opa mbaʼe arekóva aservi hag̃ua Jehovápe. Ahechakuaa pe traváho iporãvéva atopa hague Albániape”.

11, 12. Mbaʼépa ojapo raẽ vaʼerã umi ovaséva tetã ambuépe?

¹¹ Mbaʼéichapa rejapovaʼerã. Pe espíritu sánto heʼi mboyve Pablo ha iñirũnguérape oho hag̃ua Macedóniape, haʼekuéra ohomoʼãkuri kuarahyreike gotyo. Péro ojejoko rupi chupekuéra oho nórte gotyo (Hech. 16:6). Ha og̃uahẽmbotávo hikuái Bitíniape, Jesús ohapejoko jey chupekuéra (Hech. 16:7). Koʼág̃a rupi avei Jehová oisãmbyhy gueteri predikasión Itaʼýra Jesucristo rupive (Mat. 28:20). Upévare, oiméramo revase ambue tetãme rejerurevaʼerã Jehovápe nepytyvõ hag̃ua (Luc. 14:28-30; Sant. 1:5; ehecha mbaʼépa heʼi pe rrekuádro “Mbaʼéichapa ikatu aikuaa upe tetã ahaseha oikotevẽha maranduhára?”).

¹² Emombeʼu umi ansiáno ne kongregasionguápe térã ambue ermáno ikatupyrývape mbaʼépa rejapose, ha eporandu chupekuéra mbaʼépa opensa upévare (Pro. 11:14; 15:22). Elee umi informasión oñeʼẽva umi ohóvare oservi ambue tetãme ha eñehaʼã eikuaave mbaʼeichaguápa upe tetã rehoseha. Ikatu avei revisita upe tetã ha epytaʼimi upépe. Ha oiméramo redesidíma revataha, rehaivaʼerã upe tetãmegua sukursálpe reikuaa hag̃ua mbaʼépa tekotevẽ rejapo. Eheka pe direksión Anuario ipyahuvévape, ha remondóntemarangue nde kárta sukursálpe remeʼẽvaʼerã umi ansiáno ne kongregasionguápe. Upéi haʼekuéra ohaimiéta pype omondo mboyve (ehecha mbaʼépa heʼi lívro Organizados para hacer la voluntad de Jehová páhina 111 ha 112).

13. Mbaʼe mbaʼépepa ikatu nepytyvõ pe sukursál, ha mbaʼépa ndete rehechavaʼerã?

¹³ Pe sukursál oguerukáta ndéve informasión oñeʼẽvéva upe tetãre ha nepytyvõtava rejedesidi hag̃ua. Péro nomoĩmoʼãi ndéve ne dokumentorã, pór ehémplo umi reikotevẽva reike térã reiko hag̃ua upe tetãme, ni ndojapomoʼãi peteĩ kárta heʼihápe neinvitaha térã ogarantiha nderehe. Ndohekamoʼãi avei ndéve peteĩ óga reiko hag̃ua. Nde voi rehechapamavaʼerã koʼã mbaʼe rejeprepara mboyve reva hag̃ua. Avei reñeʼẽvaʼerã umi embaháda térã konsuládo ndive, ikatu hag̃uáicha reikuaa mbaʼe mbaʼépa reikotevẽta rejerureséramo pe dokuménto reike hag̃ua ha permíso rembaʼapo hag̃ua upépe. Umi ovaséva ikatuvaʼerã okonsegi ijeheguínte idokumentorã ha opa mbaʼe oikotevẽtava (Gál. 6:5).

14. Mbaʼépa rejapovaʼerã rehoséramo reservi peteĩ tetã ojeproivihápe ñane rembiapo?

¹⁴ Umi tetã ojeproivihápe predikasión. Ermanokuéra oikóva umi tetã ojeproivihápe ñane rembiapo, oñatende porã vaʼerã opredika hag̃ua (Mat. 10:16). Sapyʼánte umi maranduhára ohóva koʼã tetãme, oimoʼãʼỹre ikatu oheja vai ermanokuéra rembiapo predikasiónpe ha péicha oapeligra chupekuéra. Oiméramo revase koʼãichagua tetãme remondo raẽ vaʼerã peteĩ kárta ne retãmegua sukursálpe ansianokuéra rupive.

15. Ndaikatúiramo jepe reva, mbaʼépa rejapokuaa repredikave hag̃ua?

¹⁵ Ha ndaikatúiramo reva? Oiméramo nde ndaikatumoʼãi reva tetã ambuépe, ani reñeñandu vai. Ikatuhína ‘ojepeʼa ndéve ótro okẽ guasu’ rembaʼapove hag̃ua Jehová servísiope (1 Cor. 16:8, 9, ÑÑB). Pe superintendénte de sirkuíto oikuaáne mbaʼe kongregasión hiʼag̃uívapepa ikatu reho reipytyvõ. Avei rehokuaa peteĩ kongregasión térã grúpo oñeʼẽvape ambue idióma; térã repredikave ne kongregasiónpente voi. Tahaʼe haʼéva ne situasión, nemanduʼavaʼerã mbaʼépa hína pe iñimportantevéva: emombaʼeguasu Jehovápe ne ánga rugua guive! (Col. 3:23.)

16. Mbaʼépa jajapovaʼerã jaikuaáramo peteĩ ermáno ohoseha oservi tetã ambuépe?

¹⁶ Oiméramo reikuaa peteĩ ermáno ijerovia mbaretéva ohoseha oservi tetã ambuépe, emokyreʼỹ ha eipytyvõkena chupe ojapo hag̃ua upéva. Roma ha Alejandría rire, Antioquía de Siria haʼevaʼekue pe táva tuichavéva pe Imperio románope. Upepegua kongregasión tuichaiterei iterritório ha oikotevẽneraʼe hikuái Páblore opredika hag̃ua. Upéicharamo jepe la Biblia ndeʼíri umi ermáno ojokose hague Páblope ohótarõ guare upégui, síno omokyreʼỹ chupe ohechakuaágui ‘pe kokue haʼeha ko múndo’ (Mat. 13:38, NM).

17. Mbaʼérepa iporã vaʼerã ‘rehasáramo Macedóniape’?

¹⁷ Pablo ha iñirũnguéra ohupyty hetaiterei mbaʼe porã ‘ohasa haguére Macedóniape’ oñeinvitárõ guare chupekuéra. Og̃uahẽvo Filípospe oikuaa hikuái Lídiape, ha ‘Jehová opoko ikorasõre oguerovia hag̃ua Pablo heʼíva’ (Hech. 16:14, NM). Oiméne piko ovyʼaitéraʼe Pablo ha iñirũnguéra ohechávo Lidia ha hogayguakuéra ojevautisa! Koʼág̃a rupi avei oĩ heta tetãme umi hénte ipyʼaporãva Lídiaicha ha nohendúiva gueteri Ñandejára Rréino marandu. Ha nde avei ‘rehasáramo Macedóniape’ ikatúta retopa ha reipytyvõ koʼãichagua hénte ipyʼaporãvape.

[Nóta oĩva taʼanga ndive páhina 5]

Mbaʼéichapa ikatu aikuaa upe tetã ahaseha oikotevẽhamaranduhára?

• Ehecha pe Anuario ipyahuvéva reikuaa hag̃ua mboy héntepepa opredikavaʼerã káda maranduhára.

• Eiporu pe Índice eheka hag̃ua informasión oñeʼẽvéva upe tetãre ha umi ermáno rembiasakue.

• Eñemongeta umi maranduhára ohovaʼekuéndi oiko térã ovisita upe tetã.

• Repredikaséramo ne idiómape, ikatu reheka Internétpe térã ambue hendápe mboýpa oĩ oñeʼẽva ne idióma upe tetãme.