Japredika meméramo jahechauka ñañakãrapuʼãha Jehová servísiope
Tekotevẽ akóinte ñasẽ predikasiónpe ikatu hag̃uáicha ñañakãrapuʼãve Jehová servísiope. Opavave jaikuaa porã ñakumplivaʼerãha ñane rresponsavilida ñasẽvo ñamoherakuã Ñandejára Rréino marandu. Upévare voi ningo ñañehenói testígo de Jehová (Isa. 43:10). Ha koʼã tiémpope koʼýte japredikavaʼerã ñaipytyvõ hag̃ua ñande rapichakuérape, upévare naiporãmoʼãi ñapensa vyroreiha ko tembiapo ha ñamotenonde ambue mbaʼe. Pablo heʼivaʼekue: ‘Akóinte ñamombaʼeguasuvaʼerã Ñandejárape, ñamombeʼúvo opavavépe Héra’ (Heb. 13:15, NM).
Ñapensávo mbaʼépa jajapóta káda semána, jahechavaʼerã avei arakaʼe ha mbaʼe órapa ñasẽta predikasiónpe. Kongregasiónpe ojejapo jepi heta día pe aty oñesẽ hag̃ua ojepredika, upévare jadesidintevaʼerã mbaʼe díapa ñasẽta. Iporãitereíta ningo jajapóramo hetave mbaʼe Ñandejára servísiope, pór ehémplo japredika ogahárupi ha ñaikuaveʼẽ ñande rrevistakuéra térã ambue puvlikasión, jajapo rrevisíta ha estúdio vívliko. Ha ikatu voi jagueraha umi puvlikasión mamo jahahápe japredika hag̃ua kállere térã ambue hendápe, ha jaaprovecha opaichagua oportunida ñañemongeta hag̃ua ñande rapichándi.
Akóinte japredikavaʼerã oĩramo jepe nañanerenduséiva. Jaikuaa voi ningo oĩtaha saʼieterei ohendu porãva pe marandu (Mat. 13:15; 24:9). Jehová heʼivaʼekue Ezequiélpe opredikavaʼerãha umi hénte ‘rrevélde, jejapo ha ipyʼahatãvape’. Ha opromete avei chupe ‘omohatãtaha hova haʼekuéraicha; peteĩ diamánteicha hatãvéva itágui’ (Eze. 2:3, 4; 3:7-9). Upéicharõ, akóinte japredika hag̃ua ñañehaʼã ha jagueropuʼakavaʼerã opa mbaʼe.