Jasegíkena umi proféta ehémplo: Amós
1. ¿Mbaʼéichapa ikatu ñanemokyreʼỹ Amós ehémplo?
1 ¿Repensápa nde estudioʼi térã nemboriahu haguére ndaikatumoʼãiha repredika? Oiméramo upéicha tuicha nemokyreʼỹta Amós ehémplo. Haʼe ningo ovecha rerekuamínte ha por temporáda katu ombaʼapo mimi vaʼekue umi igotýpe, upéicharõ jepe Jehová ojevale hese omombeʼu hag̃ua peteĩ mensáhe iñimportánteva (Amós 1:1; 7:14, 15). Koʼág̃arupi Jehová ojevale avei umi hénte imboriahu ha ilápi mbykývare ojapo hag̃ua hembipota (1 Cor. 1:27-29). ¿Mbaʼéichapa Amós ehémplo ikatu ñanepytyvõ predikasiónpe?
2. ¿Mbaʼérepa ikatu jagueropuʼaka oĩramo jepe opuʼãva ñanderehe?
2 Oĩramo jepe opuʼãva hese ojepytaso mbarete Jehová ykére. Amós opredikárõ guare umi diez trívu oĩva Israélpe, Amasías (pe saserdóte guasu omoakãva umi omombaʼeguasúvape vakaraʼýpe) heʼi chupe: “¡Tereho koʼágui, anive oremolesta ore rorekóma voi ore rrelihión!” (Amós 7:12, 13). Upéi, Amasías oho omoñeʼẽngue Amóspe rréi Jeroboán renondépe, ikatu hag̃uáicha oproivi ko profétagui opredika upépe (Amós 7:7-11). Péro Amós ndokyhyjéi ha akóinte ojapo Jehová rembipota. Koʼág̃arupi avei heta omoakãva rrelihionkuéra oñemoĩ porã umi polítikondi opuʼã hag̃ua Jehová puévlore. Péro oñehaʼãramo jepe hikuái tuicha ñanembopyʼaguapy Jehová heʼíva ñandéve: “Tahaʼe haʼéva umi opuʼãva nderehe nosẽporãmoʼãi” (Is. 54:17).
3. Koʼág̃arupi ñamomarandu umi héntepe mokõi mbaʼe iñimportánteva, ¿mbaʼe mbaʼépa umíva?
3 Omombeʼu Ñandejára ojapotaha heta mbaʼe porã ha ohunditaha umi hembiapo vaívape. Amós oprofetisa vaʼekue umi diez trívu oĩva Israélpe oñehunditaha, péro omohuʼãvo pe lívro haʼe ohai vaʼekue omombeʼu Ñandejára ohovasataha isiervokuérape ha omoĩ porã jeytaha ipuévlo (Amós 9:13-15). Ñande avei koʼág̃arupi ñamombeʼu Ñandejára ohunditaha ko múndo aña, péro ñamombeʼu avei Irréino rupive oguerutaha heta mbaʼe porã (2 Ped. 3:7; Mat. 24:14). Jehová ohundi vove umi hénte añáme Armagedónpe, ikatútama oiko ko yvýgui peteĩ hardín neporãva (Sal. 37:34).
4. ¿Mbaʼérepa jaikuaa ikatutaha ñakumpli Jehová rembipota?
4 Jaikuaa ningo oĩramo opuʼãva ñanderehe japredika jave pe marandu porã, ijetuʼuha ñandéve jajapo hag̃ua Jehová rembipota ha ñakumpli pe kompromíso jajapo vaʼekue hendive ñañemeʼẽrõ guare chupe (Juan 15:19). Upéicharõ jepe, jaikuaa porã Haʼe akóinte ñanepytyvõtaha jajapo hag̃ua hembipota oipytyvõ haguéicha Amóspe (2 Cor. 3:5).