Aníkena jakyhyje
1. Mbaʼérepa jaʼe nañamokañyiha mbaʼe porã ñande rapichakuéragui?
1 Ñande testigos de Jehová ningo nañamokañyséi mbaʼe porã ñande rapichakuéragui. Upéicha rupi jajuhúvape ñamombeʼu umi mbaʼe porãita oguerútava Ñandejára goviérno (Pro. 3:27). Iporãitéta ningo opavave oikuaáramo upéva. Ikatu ñasẽ meme ñaína predikasiónpe, ñamohenda heta rrevísta térã japredika oimehápe. Jajapóramo jepe koʼã mbaʼe, ofalta gueteri ñandéve ñambostudia ñande rapichápe. Mbaʼérepa nañañembosakoʼíri jajapo hag̃ua upéva?
2. Mbaʼérepa heta vése nañambostudiái ñande rapichápe?
2 Heta vése ningo jakyhyjéguinte nañambostudiái ñande rapichápe. Ikatu jakyhyje nañaporomboʼekuaáirõ g̃uarã térã nañanetiémpoirõ g̃uarã jajapo hag̃ua upéva. Hiʼãite umi mbaʼe jahechátava koʼápe ñanepytyvõ anivéma hag̃ua jakyhyje ha tañanemokyreʼỹ uvei ñambostudia hag̃ua ñande rapichápe (Mat. 28:19; Hech. 20:20).
3. Mbaʼérepa jaʼe opavave ikatuha ñamboʼe Ñandejára Ñeʼẽ?
3 Che ningo namboʼekuaái. Ikatu nañamboʼéi ñande rapichápe la Biblia ñande eskuelaʼi rupi, térã ñaimoʼãgui nañamboʼekuaaichéne hag̃ua. Ñanemanduʼápa umi kristiáno ypykue ndahaʼeihague ‘iñaranduetereíva’? Upéicharõ jepe haʼekuéra oporomboʼevaʼekue Ñandejára Ñeʼẽ. Mbaʼéicha rupípa oporomboʼekuaa hikuái? Ñandejára Ñeʼẽme heʼi haʼekuéra ‘omoirũmihague Jesúspe’ (Hech. 4:13, BNP). Péicha jahechakuaa Mboʼehára Guasúgui oaprendehague hikuái. Ñande avei ikatu ñaaprende chugui. Ñandejára Ñeʼẽme ningo oĩmbaite mbaʼéichapa haʼe oporomboʼevaʼekue. Upévare ñande eskuelaʼíramo jepe, hetaiterei mbaʼe ijojahaʼỹva ñanemboʼe Ñandejára (Isa. 50:4; 2 Cor. 3:5).
4. Mbaʼépa ñanemboʼe Amós heʼi ha ojapovaʼekue?
4 Yma ningo Jehová oiporuvaʼekue umi kuimbaʼe tavymíme oñemoñeʼẽ hag̃ua umi iñarandúvape. Umi Jehová oiporuvaʼekue apytépe oĩ Amós. Haʼe ningo heʼivaʼekue ijehe: ‘Che ndahaʼéi voi proféta, térã heseguakuéra. Che ningo ajeheka añangarekóvo ovecha ha ígo rehe’ (Amós 7:14). Upéicharamo jepe, haʼe ndokyhyjeivaʼekue heʼi hag̃ua Amasíaspe umi mbaʼe vaieta oikótava hese ha hogayguakuérare. Amasías ningo umi vakaraʼy omombaʼeguasúva ruvicha (Amós 7:16, 17). Nañanderesarairivaʼerã avei Jehová mbaʼeha umi tembiapo, ha haʼe ñanembokatupyrytaha jajapo hag̃ua (2 Tim. 3:17).
5. Mbaʼérepa ñañehaʼãvaʼerã ñamboʼe ñande rapichápe la Biblia ñane rembiapoitereíramo jepe?
5 Nachetiémpoingo ajapo hag̃ua. Heta ningo ñane rembiapo, péro katuete ñamohemby jepi ñane tiémpo japredika hag̃ua. Javyʼaitereíta jaiporuʼimíramo avei ñane tiémpo ñamboʼe hag̃ua ñande rapichápe. Javyʼaitétaningo jahechávo mbaʼéichapa ñande rapicha okambia ojapo rupi Ñandejára Ñeʼẽ heʼíva (Heb. 4:12). Jehová ovyʼa ohechávo mbaʼéichapa ñañehaʼã ñaipytyvõ ñande rapichápe ‘oikuaa hag̃ua pe añetegua’ (1 Tim. 2:4). Umi ánhel jepe ovyʼa ohechávo peteĩ tapicha oñembyasyha hembiapo vaikuére ha oñehaʼãha oservi porãve Jehovápe (Luc. 15:10).
6. Mbaʼépepa ñaipytyvõñaína Ñandejárape?
6 ‘Jehová ningo oipota opavave ojesalva ha oikuaa pe añetegua’ (1 Tim. 2:4, BNP). Ha ñande ñaipytyvõñaína oiko hag̃ua upéva. Ajépa iporãite! Upévare aníkena jakyhyje ñamboʼe hag̃ua ñande rapichápe Ñandejára Ñeʼẽ!