Japreparákena peteĩ introduksión ointeresátava umi ñanerendúvape
1. ¿Mbaʼérepa iñimportánte japrepara umi introduksión ointeresátava umi héntepe?
1 Oĩ jave ñaneinvitáva jakaru hag̃ua oprepara jepi vokaditoʼi ñanembojuruhe hag̃ua. Upéicha avei, umi hénte oikuaaseve hag̃ua umi mbaʼe omboʼéva la Biblia, ñañemotiémpo vaʼerã japrepara hag̃ua umi introduksión ointeresátava chupekuéra (Prov. 15:28). Péro ikatu hag̃uáicha ñane introduksión ointeresa umi héntepe nodependéi katuete umi mbaʼe jaʼévare ni mboy tiémpopa ipuku. Upéicharõ, ¿mbaʼépa jahecha vaʼerã japreparáta jave peteĩ introduksión?
2. ¿Mbaʼéichapa ikatu japrepara umi introduksión ogustátava umi héntepe?
2 Jaiporavo umi téma ointeresátava umi héntepe. Umi introduksión japreparáva nointeresáiramo umi héntepe ikatu noñeʼẽséi ñanendive. Upévare ñapensa vaʼerã mbaʼépa oipyʼapy umi hénte oĩvape ñande territóriope. Por ehémplo, ¿oipotápa hikuái peteĩ goviérno okumpli porãva hembiapo? ¿Oikosépa vyʼápe hogapýpe? ¿Oipotápa opa umi ñorairõ? Heta hénte omombeʼuse umi mbaʼe opensáva, upévare iporãta ñambaʼeporandu chupekuéra heʼi hag̃ua ñandéve umi mbaʼe oñandúva. Ha upearã ikatu jaiporu umi presentasión osẽva jepi Ñane Marandu Porãme, ha tekotevẽramo ikatu voi ñakambiaʼimi ogustave hag̃ua umi héntepe. Ha iporãitereíta jaaprovecháramo pe Aty Jastudia Hag̃ua Ñande Rogayguándi ñañensaja hag̃ua umi introduksión japrepara vaʼekue.
3. ¿Mbaʼérepa japrepara hag̃ua peteĩ introduksión tekotevẽ jahecha mbaʼépa oguerovia umi hénte ha mbaʼe kostúmbrepa oguereko?
3 Umi kostúmbre orekóva umi hénte ha umi mbaʼe ogueroviáva. Heta lugárpe umi hénte oipota pyaʼe voi ñamombeʼu chupekuéra maʼerãpa jaha. Péro ótro lugárpe katu umi hénte oipota jasaluda, ñañemongetaʼimi hendivekuéra ha upéi ae ñamombeʼu chupekuéra maʼerãpa jaha. Oĩ avei lugár umi hénte orrespetaitereihápe Ñandejára Ñeʼẽ, umichahárupi ikatu ñag̃uahẽre voi jaiporúma la Biblia (Hech. 2:14-17). Péro umi lugár oĩháme saʼi ojeroviáva Jesucrístore, térã ndogustáiva voi chupekuéra mbaʼeveichagua rrelihión, ikuentavénte jaiporu la Biblia ág̃a ótra visítape (Hech. 17:22-31).
4. ¿Mbaʼe konséhorepa ñanemanduʼa vaʼerã japreparávo umi mbaʼe ñepyrũrãite jaʼétava?
4 Umi mbaʼe jaʼéva ñañepyrũvo ñañeʼẽ. Jaiporavo porã vaʼerã umi mbaʼe ñepyrũrãite jaʼétava. Upearã iporãvéta ñañeʼẽ mbykymínte ha ani jaiporu umi palávra noñentendemoʼãiva. Péro ndahaʼéi umi mbaʼe jaʼévarente jajepyʼapy vaʼerã, síno avei mbaʼéichapa jaʼéta. Ñanemanduʼa vaʼerã ñanderory ha ñanekyreʼỹramo, umi hénte oñeñandu porãvetaha ñanendive ha ohenduséta pe mensáhe jagueraháva. Jajapóramo koʼã konsého japreparávo umi introduksión, ñaipytyvõta umi héntepe otantease hag̃ua umi mbaʼe oĩva ‘Jehová mesápe’ (1 Cor. 10:21).