¿Mbaʼépa opensa Jehová ñanderehe?

1. ¿Mbaʼérepa jaʼekuaa la Biblia ojoguaha peteĩ espéhope?

¹ ¿Ndépa remaña jepi espéhope? Entéronte jajapo jepi upéva káda día, ikatu hag̃uáicha jahecha mbaʼetekópa hína ñane pínta. Péro Jehová nomañái ñane píntare, síno ñane korasõre. Ha la Biblia ñanepytyvõ jahechakuaa hag̃ua mbaʼépa oĩ ñande pyʼapýpe. Upévare oñembojoja peteĩ espéhore (1 Sam. 16:7; Sant. 1:22-24). Ñandejára Ñeʼẽ “ikatu ohechauka umi mbaʼe ñapensáva ha jaipotáva ñane korasõme” (Heb. 4:12). Jaleéramo la Biblia káda día ha jajepyʼamongeta hese, jahechakuaáta mbaʼépepa ikatu ñambaʼapove ñandekatupyryve hag̃ua predikasiónpe (Sal. 1:1-3).

2. ¿Mbaʼéichapa la Biblia ikatu ñanepytyvõ?

² Jaiporúkena la Biblia peteĩ espéhoicha. La Bíbliape ningo oĩ heta rreláto oñeʼẽva Jehová siervokuéra iñeʼẽrendúvare. Ha jaleévo umíva jahechakuaa mbaʼe kualidápa Ñandejára oguerohory. Por ehémplo, David ndoipotái vaʼekue avave omongyʼa Jehová réra (1 Sam. 17:45, 46). Proféta Isaías ndokyhyjéi vaʼekue opredika hag̃ua peteĩ território ijetuʼúvape (Is. 6:8, 9). Jesús ohayhueterei vaʼekue Itúvape, upévare vyʼápe ojapo hembipota ha núnka nopensái haʼe hague peteĩ kárga chupe g̃uarã (Juan 4:34). Umi kristiáno síglo primérope guare katu ojeroviaiterei Jehováre, kyreʼỹme opredika ha ndohejái mbaʼeve ojoko chupekuéra (Hech. 5:41, 42; 2 Cor. 4:1; 2 Tim. 4:17). Jajepyʼamongetáramo koʼã ehémplore, jahechakuaáta mbaʼépepa ikatu ñamehora jaservi porãve hag̃ua Jehovápe.

3. ¿Mbaʼérepa koʼág̃ama ñakambia vaʼerã?

³ Ñakambiákena tekotevẽhápe. Ndaideprovechomoʼãi ñandéve ñamañánteramo espéhope ha upéi nañapenái ñane píntare. Upéicha avei, la Biblia ndaideprovechomoʼãi ñandéve jaleénteramo ha ndajajapói umi mbaʼe ñaaprendéva. Upévare jajerure vaʼerã Jehovápe tañanepytyvõ jahechakuaa hag̃ua mbaʼépepa ikatu ñamehora (Sal. 139:23, 24; Luc. 11:13). Pe tiémpo hembýva ningo mbykypaitéma, ha heta persóna ikatu hína ojesalva ñaipytyvõramo chupekuéra. Upéicha rupi koʼág̃ama jakuʼe vaʼerã ha ñakambia tekotevẽhápe (1 Cor. 7:29; 1 Tim. 4:16).

4. ¿Mbaʼépa ikatu jaʼe umi oleévare la Biblia ha okambia tekotevẽhápe?

⁴ Umi mbaʼe oĩva ñande pyʼapýpe ningo iñimportanteve ñane píntagui (1 Ped. 3:3, 4) ¿Mbaʼépa ikatu jaʼe umi oleévare la Biblia ha okambia tekotevẽhápe? Koʼãichagua persóna ningo ‘ojapo Ñandejára Ñeʼẽ heʼíva ha ndahaʼéi ohendúnteva’ (Sant. 1:25). Péicha jajapóramo ñamombaʼeguasúta Jehovápe, javyʼáta ha avei ñandekatupyryvéta ñaporomboʼe hag̃ua (2 Cor. 3:18).