JASTUDIA HAG̃UA
Eipurúkena la Biblia peteĩ espéhoicha
Disípulo Santiago heʼi vaʼekue la Biblia ojoguaha peteĩ espéhope. ¿Mbaʼe sentídopepa? Pórke ñanepytyvõ jahechakuaa hag̃ua mbaʼeichagua persónapa hína ñande (Sant. 1:22-25). ¿Péro mbaʼéichapa ikatu jaipuru porã la Biblia peteĩ espéhoicha?
Ñañatende porã vaʼerã jalee jave. Ñamaña pyaʼe pyaʼéramo ñandejehe peteĩ espéhope ikatu hína ndajapillái jarekoha ñanderehe álgo ivaíva. Upéicha avei jalee pyaʼe pyaʼéramo la Biblia ndaikatumoʼãi japilla mbaʼe mbaʼépepa tekotevẽ ñakambia. Upévare tekotevẽ ñañatende porã jalee jave la Biblia.
Jajesareko vaʼerã ñandejehe ha ani umi ótrore. Sapyʼánte ñamaña jave peteĩ espéhope ojekuaa avei ótra persóna raʼanga, ha ikatu hína jajesareko umi defékto pe persóna orekóvare. Upéicha avei jalee jave la Biblia ikatu hína ñapensa umi mbaʼe tekotevẽhápe omehora ótra persóna. Péro jajapóramo upéva ndaikatumoʼãi ñamehora umi mbaʼe ñande ñaikotevẽvape.
Ani jajexihieterei. Ñamaña jave peteĩ espéhope ikatu jahecha peteĩ mbaʼe nañandegustáiva ñandejehe, ha upéva ikatu ñanedesanima. Upéicha avei jalee jave la Biblia ndovaléi jajexihieterei, pórke ni Jehová ndojapói upéva ñanendive (Sant. 3:17).