Jasegíkena umi proféta ehémplo: Nahúm
1. ¿Mbaʼépa ikatu ñaaprende Nahúm oprofetisa vaʼekuégui?
1 Nahúm oprofetisa vaʼekue Jehová ndohejareimoʼãiha iñenemigokuérape, katuete oñevengataha hesekuéra, ha ni pe ipoderosovéva ndaipuʼakamoʼãiha hese. Ha siuda de Nínive opytárõ guare itapere, ojekuaa porã Jehová okumpliha iñeʼẽ (Nah. 1:2, 6). Ñahesaʼỹijomína mbaʼéichapa pe profesía ohai vaʼekue Nahúm ikatu ñanepytyvõ predikasiónpe.
2. ¿Mbaʼérepa jaʼe ñakompartiha notísia porã umi héntendi?
2 Ñakonsola ha ñamokyreʼỹkena umi héntepe. Pe téra Nahúm ningo heʼise “Oporokonsoláva”. Péro jaleévo pe lívro ohai vaʼekue ko proféta, ikatu ñapensa notísia vaímante oĩha pype. ¿Mbaʼérepa jaʼe upéva? Omombeʼúgui mbaʼéichapa Jehová okondena pe siuda de Nínive (Nah. 1:1; 3:7). Upéicharamo jepe, ko notísia iporãiterei kuri Ñandejára siervokuérape g̃uarã. Upérõ Nahúm oprofetisa oñehundi potaitemaha iñenemigokuérape ha avei Jehová oñangarekotaha isiervokuérare ijetuʼuve jave (Nah. 1:7). Ñande avei japredikávo ñakomparti hína notísia porã umi héntendi. Upéicha ñamokyreʼỹ chupekuéra oñemoag̃ui hag̃ua Jehováre, ikatu hag̃uáicha haʼe oñangareko hesekuéra (Nah. 1:15).
3. ¿Mbaʼéichapa ikatu jaipuru umi ehémplo proféta Nahúm ojapo haguéicha?
3 Jaipurúkena umi ehémplo ohechaukáva mbaʼéichapa oñekumpli Jehová heʼíva. Jehová espíritu rupive, Nahúm oipuru vaʼekue peteĩ ehémplo ohechauka porãva mbaʼépa oikóta umi naiñeʼẽrendúivare. Haʼe omombeʼu umi héntepe mbaʼéichapa umi asírio ohundi vaʼekue pe siuda de Tebas (térã No-amón) oĩva Egíptope. Ha heʼi chupekuéra Nínive rehe upeichaite avei oikotaha (Nah. 3:8-10). Ñande avei jaʼe jave umi héntepe ko múndo aña oñehunditaha, ñamombeʼu vaʼerã chupekuéra mbaʼéichapa yma oñekumpli umi profesía. Péicha ohechakuaáta hikuái Jehová heʼíva katuete oñekumpliha. Por ehémplo, ñamombeʼukuaa chupekuéra mbaʼéichapa umi ehérsito oĩva Babilonia ha Médiape ojagarra pe siuda de Nínive, áño 632-pe. Upérõ okyetereígui, pe rrío Tigris tuichaiterei ojupi ha oity en párte umi murálla ijyvatetéva oĩva pe siuda jerére. Péicha pe siuda de Nínive oñehundi ha oñekumpli Jehová heʼi vaʼekue (Nah. 1:8; 2:6).
4. ¿Mbaʼéichapa ikatu jasegi Nahúm ehémplo japredika jave ha avei jajapóvo estúdio?
4 Ñañeʼẽkena umi héntepe ñanentende hag̃uáicha. Umi profesía ohai vaʼekue Nahúm ningo oñentende porãiterei, upévare jaleévo upe lívro ñanemopirĩmba voi (Nah. 1:14; 3:1). Ñande avei, ñañemongeta jave umi héntendi, ñañeʼẽ vaʼerã chupekuéra ñanentende hag̃uáicha (1 Cor. 14:9). Por ehémplo, javisita jave primera ves peteĩ persónape, ñamombeʼu porã vaʼerã chupe maʼerãpa jaha hendápe. Jajapóvo estúdio katu, ñaipytyvõ vaʼerã ñane estudiántepe ontende porã hag̃ua mbaʼéichapa ikatu ovenefisia chupe umi mbaʼe oaprendéva, ha avei ojerovia hag̃ua Jehová ha la Bíbliare (Rom. 10:14).
5. ¿Mbaʼéichapa ñanekonsola Nahúm 1:9 heʼíva?
5 Nahúm oikuaa porã vaʼekue Jehová katuete okumplitaha heʼíva, ha upéva ojekuaa porãiterei pe lívro ohai vaʼekuépe. Ko múndo oĩva Satanás poguýpe ningo oñehundipotaitéma, upévare tuicha ñanekonsola jaikuaávo Jehová oprometeha koʼẽrõitéma ‘opataha umi mbaʼe ñandepyʼapýva’ (Nah. 1:9).