Jaipuru porãkena ñane tiémpo predikasiónpe
Pe áño de servísio 2014-pe testígo de Jehová opredika kuri 1.945.487.604 óra. Upéva ohechauka ñaimeha desidído jajapóvo opa ikatúva Jehová servísiope (Sal. 110:3; 1 Cor. 15:58). Koʼág̃a ningo “saʼipaitéma pe tiémpo hembýva” (1 Cor. 7:29). Upévare ñasẽ jave predikasiónpe, ñañehaʼãmbaite vaʼerã jaipuru porã ñane tiémpo, upéicharõmante ikatúta ñañeʼẽ hetave héntendi.
Jaipuru porã hag̃ua ñane tiémpo, tekotevẽ jajadapta umi héntere. Por ehémplo, sapyʼánte ikatu jahasa uno térã hetave óra japredikaségui umi ogahárupi, umi lugár oĩhápe jepi heta hénte, térã jajapo hag̃ua rrevisíta ha estúdio, ha upéicharõ jepe nañakonsegíri ñañemongeta avavéndi, ¿mbaʼépa ikatu jajapo péicha jave? Káda lugárpe idiferénteramo jepe la situasión, umi suherénsia oĩva ko artíkulope ñanepytyvõta jaipuru porãve hag̃ua ñane tiémpo predikasiónpe, ani hag̃ua ñañehaʼã rei jaikóvo (1 Cor. 9:26).
Japredika jave ogahárupi. Heta tiémporema enterovénte jajepokuaa japredika ogahárupi pyharevekue. Péro jaikuaaháicha heta hénte ombaʼapo upe órape. ¿Naiporãvemoʼãi piko upéicharõ japredika ogahárupi kaʼarupytũ? Upe órape umi hénte oĩma hógape ha itrankilovéma hikuái. Pyharevekue katu jaaprovechakuaa japredika hag̃ua kállere térã negosiohárupi.
Japredika jave umi lugár hetahápe hénte. Umi karríto ha mesa oñemoĩhápe puvlikasionkuéra, oñemoĩ vaʼerã umi lugár ohasahápe heta hénte ñane kongregasión territóriope (ehecha Ñane Marandu Porã julio 2013, páhina 5). Péro tiémpo rire, ojehecháramo saʼimaha ojehasa upérupi, pe komite de servísio kongregasionpegua ikatu odesidi oguerova pe karríto peteĩ lugár hetavehápe hénte.
Jajapo jave rrevisíta ha estúdio vívliko. Sapyʼánte oĩ óra ñañehaʼãvéramo jepe japredika hag̃ua umi héntepe, nañakonsegíri mbaʼeve. ¿Ikatúpa upéicharõ jaaprovecha upe óra jajapo hag̃ua rrevisíta ha estúdio? Por ehémplo, heta lugárpe sábado pyharevekue ojetopave umi héntere predikasiónpe. Upéicha jave jaaprovechakuaa japredika hag̃ua pyharevekue. Ha kaʼaru térã pyhare katu jajapo hag̃ua umi estúdio. Ikatu voi jajapo arréglo peteĩ ermáno orekóvandi estúdio térã rrevisíta pe território jahatahápe jajapo avei ñande rrevisitakuéra. Jajapóramo upéicha, jaipuru porãta hína ñane tiémpo.
Jaikuaa ningo ndajatopáiramo jepe avavére predikasiónpe, lomímonte ikatuha ñaanota upe óra ñane infórmepe, péro katuete javyʼavéta ñañeʼẽramo umi héntendi. Jahechakuaáramo peteĩ órape umi hénte ndaiporiha hógape, jahecha vaʼerã moõ ha mbaʼe órapa ikatu jatopa hesekuéra. Ñañemboʼékena Jehovápe tañanepytyvõ jaipuru porã hag̃ua ñane tiémpo predikasiónpe (Mat. 9:38).