Mbaʼérepa japredika ogaha rupi
1. Mbaʼépa ñañeporandu pe predikasión ogaha rupi jajapóvare ha mbaʼérepa?
1 “Umi ikatupyrýmava predikasiónpe, katuete heʼíta iporãveha japredika ogaha rupi pe lívro La Aurora del Milenio reheve.” Péicha pe rrevísta Zionʼs Watch Tower, oñehenóiva koʼág̃a La Atalaya, 1 de julio 1893–pe guare ohechauka iñimportantetereiha japredika ogaha rupi. Koʼág̃a avei, oparupiete ojekuaa testigos de Jehová opredikaha upéicha. Koʼág̃a katu heta tetãme hasy ojejuhu hag̃ua tapichakuérape hógape. Upévare, iporãpa gueteri japredika ogaha rupi?
2. Mbaʼéichapa Ñandejára Ñeʼẽ ohechauka japredikavaʼerãha ogaha rupi?
2 Iñimportánte, ha la Biblia ohechauka jajapovaʼerãha. Ñandejára Ñeʼẽ ohechauka japredikavaʼerãha ogaha rupi. Jesús omondovaʼekue mokõi mokõi umi 70 hemimboʼekuérape opredika hag̃ua ogaha rupi (Luc. 10: 5-7). Omano riremi Jesús, la Biblia heʼi hemimboʼekuéra ‘opa ára oporomboʼe ha omoherakuãhague pe marandu porã, témplope ha ogakuéra rupi’ (Hech. 5:42). Apóstol Pablo avei kyreʼỹme omboʼevaʼekue ogaha rupi (Hech. 20:20).
3. Emombeʼu mbaʼe mbaʼérepa iñimportánte japredika ogaha rupi.
3 Koʼag̃aite peve iñimportanteterei japredika ogaha rupi ñamosarambi hag̃ua pe marandu porã. Upéicha jajapóramo ‘jaheka’ porãvéta umi omeresévape (Mat. 10:11). Tapichakuéra ipyʼaguapyve jepi oĩ jave hógape. Ñañemongetáramo peteĩ tapicha ndive hogaitépe, ñahendúramo pe heʼíva, ñamañáramo hese ha umi mbaʼe oĩvare ijerére, jahechakuaáta mbaʼépa oikuaaseve ha mbaʼépa oipyʼapy chupe. Avei péicha ikatu ñañemongeta areve ñande rapicha ndive.
4. Mbaʼépa ikatu jajapo jajuhuve hag̃ua tapichakuérare predikasiónpe?
4 Ekambia reikotevẽhápe. Apóstol Pablo okambiavaʼekue oikotevẽhápe ‘pe marandu porã rehehápe’ (1 Cor. 9:23). Ñande ikatu jahecha mbaʼe órapa ikatu jajuhuve tapichakuérape hógape. Ikatu ñasẽ kaʼarukue, sábado, domingo térã arete jave. Ñaanotavaʼerã umi óga ndajajuhuihápe avavére, ikatu hag̃uáicha jaha jey ótro día térã ikatúta jave jatopa hese.
5. Mbaʼéichapa ikatu ñaipytyvõ umi nahesãiporãivape osẽ hag̃ua opredika ogaha rupi?
5 Umi nahesãiporãiva jepe ikatu opredika ogaha rupi. Mbaʼéguipa nañamoirũi umívape opredika hag̃ua mbeguekatumi umi óga hiʼag̃uiveha rupi? Peteĩ ermána hasykatúva ndaikatúi oñeʼẽ pyʼỹi umi ogaha rupi, péro ovyʼaiterei ojeguerahahaguére chupe opredika hag̃ua!
6. Mbaʼérepa iporã japredika meme ogaha rupi?
6 Heta tapicha gueteri jajuhu ñanerendu porãva japredika jave ogaha rupi. Peteĩ ermánope heʼi peteĩ óga jára: “Eike katu, aikuaáma mávapa nde. Angete ajerure Ñandejárape omboumi hag̃ua chéve peteĩ chepytyvõvaʼerã, ha upe javépe ahendu rembota che rokẽ. Ñandejára cherendu ha nembou cherendápe”. Koʼã mbaʼe ohechauka Jehová ñanevendesiha japredikáramo ogaha rupi (Mat. 11:19). Upévare, epredika memékena ogaha rupi ha ani rehejátei upéva.