Umi erramiénta ñaikotevẽva ñaporomboʼe hag̃ua
1. ¿Mbaʼérepa ñakomparakuaa peteĩ kristiánope umi karpintérore?
1 Umi karpintéro ningo oreko opaichagua erramiénta. Oĩ umi erramiénta oipurúva káda día ha oĩ avei umi oipurúva sapyʼapyʼánte ojapóta jave umi traváho helikadovéva. Umi karpintéro ikatupyrýva siémpre oreko a máno umi erramiénta oipuruvéva ha ivakeáno oipuru hag̃ua umíva. La Biblia ñanemokyreʼỹ ñambaʼapo meme hag̃ua predikasiónpe ha ñandekatupyry hag̃ua “peteĩ kuimbaʼe ombaʼapo jejopývaicha, ndorekóiva mbaʼérepa otĩ hag̃ua” (2 Tim. 2:15). ¿Mbaʼépa hína pe erramiénta iñimportantevéva? La Biblia. Pórke ko erramiénta jaipuru ñaipytyvõ hag̃ua umi héntepe oiko hag̃ua chuguikuéra Jesús disípulo (Mat. 28:19, 20). Upévare ñañehaʼãmbaite vaʼerã oiko hag̃ua ñandehegui peteĩ persóna “oiporúva Ñandejára Ñeʼẽ hekoitépe”. Péro ndahaʼéi upévante, ñañehaʼã vaʼerã avei ñañembokatupyry jaipuru hag̃ua umi erramiénta jarekóva ñamboʼe hag̃ua la Biblia la héntepe (Prov. 22:29).
2. ¿Mbaʼe mbaʼépa hína umi erramiénta jaipuruvéva ñamboʼe hag̃ua umi héntepe?
2 Umi erramiénta jaipuruvéva ñaporomboʼe hag̃ua. Jaikuaaháicha la Biblia haʼe pe erramiénta iñimportantevéva, péro jareko avei pe lívro Mbaʼépa añetehápe omboʼe la Biblia?, jaipurúva jajapo hag̃ua estúdio. Ha jastudiapa rire peteĩ persónandi ko lívro, jastudia hendive pe lívro “Jaikókena Ñandejára mborayhúpe”, oikuaa hag̃ua mbaʼéichapa osegi vaʼerã umi konsého oĩva la Bíbliape. Upévare iñimportanteterei jaikuaa porã umi mbaʼe oĩva koʼã lívrope ha ñañehaʼã jaipuru porã. Ñane erramientakuéra apytépe ndofaltái vaʼerã avei umi folléto jaipuruvéva. Por ehémplo folléto ¡Notísia Porã oúva Ñandejáragui!, jaipurúva ñamoñepyrũ hag̃ua estúdio. Ha jatopáramo predikasiónpe peteĩ persóna ndoleekuaáiva térã noñeʼẽporãiva ñane idióma, ikatu jaipuru pe folléto “Ehendúkena Ñandejárape” térã “Ehendúkena Ñandejárape ha reikovéta opa árare”. Ótro folléto jaipuru meméva ñaipytyvõ hag̃ua ñane estudiántepe oikuaa hag̃ua Jehová organisasión, haʼe ¿Mávapa umi ojapóva Jehová rembipota koʼág̃a rupi? Jareko avei heta vidéo, umíva apytépe ¿Mbaʼérepa restudia vaʼerã la Biblia?, ¿Mbaʼéichapa rojapo ore rreunionkuéra? ha ¿Mbaʼéichapa héra Ñandejára? Koʼãva tuicha ñanepytyvõ jajapo hag̃ua disípulo ha upévare ñañehaʼã vaʼerã jaipuru meme.
3. ¿Mbaʼépa osẽta jepi Ñane Marandu Porãme?
3 Ñane Marandu Porãme osẽta jepi mbaʼéichapa ikatu ñandekatupyryve jaipuru hag̃ua umi erramiénta jaguerekóva ñaporomboʼe hag̃ua. Ñañehaʼãramo jaipuru porã umi erramiénta, jasegíta hína ko konsého oĩva la Bíbliape: “Akóintekena eñatende ndejehe ha remboʼe lájare. Esegíke ejapo koʼã mbaʼe; rejapóramo péicha rejesalváta nde ha avei umi nerendúva” (1 Tim. 4:16).