Mbaʼéichapa ikatu jaipuru umi gravasión
1. ¿Mbaʼépa oreko avei ñande sítio jw.org?
1 Heta persóna olee umi informasión porã porã oĩva ñande sítio de Internet jw.org-pe (Ecl. 12:10). Enterove lénto umi puvlikasión ha informasión oĩva upépe ojegrava avei ikatu hag̃uáicha ñahendu. ¿Rehendúmapa umi gravasión? ¿Mbaʼérepa ideprovécho umíva?
2. ¿Mbaʼéichapa ikatu jaipuru umi gravasión jajapo jave ñande estúdio personál térã Estúdio de Família?
2 Eipuru ejapo hag̃ua nde estúdio personál ha nde estúdio de família. Ikatu hag̃uáicha jaaprovecha porã ñane tiémpo javiaha térã ñane rembiapo jave, ikatu ñahendu umi gravasión, tahaʼe la Biblia, umi rrevísta térã ótra puvlikasión (Efes. 5:15, 16). Jajapo jave ñande Estúdio de Família, ikatu ñahendu umi gravasión ha jasegi pe lektúra. Ha jajapo jave ñande estúdio personál, umi gravasión ikatu ñanepytyvõ jalee porãve hag̃ua, térã ñaaprendéramo hína ótro idióma, ñanepytyvõ ñapronunsia porãve hag̃ua umi palávra.
3. ¿Mávapepa ikatu oipytyvõve ñande territóriope umi gravasión?
3 Ideprovécho predikasiónpe. Heta persóna ñande territoriopegua heʼi naitiempoiha olee hag̃ua, péro ikatu hína ohenduse umi gravasión. Oĩ avei umi oñeʼẽva ótro idiómape ha ikatu oñatende porãve ñanderehe ñamog̃uahẽramo chupe pe notísia porã iñeʼẽtépe (Hech. 2:6-8). Heta lugárpe umi hénte ojepokuaa oaprende umi mbaʼe ohendúvagui. Por ehémplo, umi oñeʼẽva pe idióma hmong siémpre omombeʼu ifamíliape ipuévlo istória ha haʼekuéra omombeʼu jey vaʼerã ifamíliape ha upéicha oaprende hikuái. Haʼekuéra imanduʼave umi mbaʼe ohendu vaʼekuére. Áfricape avei, heta lugárpe umi hénte ojepokuaave oaprende umi mbaʼe ohendúvagui.
4. ¿Mbaʼe mbaʼépa iporã ñañeporandumi?
4 Ñapensamína umi hénte oĩvare ñande territóriope, ¿naiporãmoʼãipa ñahenduka chupekuéra iñeʼẽtépe peteĩ puvlikasión? ¿Erekópa peteĩ ne konosído ogustátava chupe umi puvlikasión ojegrava vaʼekue? ¿Orekópa korréo elektróniko remondo hag̃ua chupe? ¿Ikatúpa ñamboguejy ha ñambohasa peteĩ CD-pe jaheja hag̃ua pe puvlikasión ndive peteĩ persóna ñanerendu porãvape predikasiónpe? Jaheja jave peteĩ gravasión tahaʼe lívro, folléto, rrevísta térã tratádo, ikatu ñaanota ñane infórmepe. Upéicharõ, umi gravasión ikatu jaipuru jajapo jave ñande estúdio personál, péro tuichaiterei avei ñanepytyvõta ñañotỹ hag̃ua peteĩ semíllaicha umi notísia porã umi hénte korasõme (1 Cor. 3:6).