¿Mbaʼépa ñaaprendekuaa Ñandejáragui iprofetakuéra rupive?
Yma ningo Ñandejára ojevale vaʼekue umi profetakuérare oñekomunika hag̃ua yvyporakuérandi. Ha umi mbaʼe haʼe heʼi vaʼekue chupekuéra ikatu ñanepytyvõ jaikuaa hag̃ua mbaʼépa jajapo vaʼerã jareko hag̃ua Ñandejára vendisión. Jahechamína mbaʼépa ikatu ñaaprende 3 proféta ifiél vaʼekuégui.
ABRAHÁN
Ñandejára ohecha enterovépe peteĩcha ha hiʼãiterei chupe ovendesi káda únope.
Ñandejára ojapo vaʼekue ko promésa pe proféta Abrahánpe: “Nde rupive oñevendesíta enteroite família oĩva pe yvy ape ári” (Génesis 12:3).
¿Mbaʼépa ñaaprende? Ñandejára ñanderayhueterei, ha ovendesíta entéro umi família iñeʼẽrendúvape chupe, tahaʼe kuña, kuimbaʼe ha mitã.
MOISÉS
Ñandejára ñandeporiahuvereko, ha ovendesi umi oñehaʼãvape oikuaa hag̃ua chupe.
Ñandejára todopoderóso omeʼẽ vaʼekue pe proféta Moiséspe podér ikatu hag̃uáicha ojapo heta milágro tuichaitereíva. Upéicharõ jepe, Moisés ojerure vaʼekue chupe: “Eikuaaukána chéve nde rape ikatu hag̃uáicha roikuaa porã ha péicha resegíta cheguerohory” (Éxodo 33:13). Ñandejárape ogustaiterei kuri la haʼe ojeruréva chupe ha ovendesi Moiséspe. Upéicha rupi haʼe ikatu kuri oikuaa porãve Ñandejárape ha umi kualida orekóva. Por ehémplo, Moisés oaprende kuri ñande Apohare haʼeha “peteĩ Dios oporoporiahuverekóva ha oporombyasýva” (Éxodo 34:6, 7).
¿Mbaʼépa ñaaprende? Ñañehaʼãramo jaikuaa porãve Ñandejárape haʼe ñanevendesíta, tahaʼe kuña, kuimbaʼe ha mitã. Iñeʼẽ rupive haʼe omombeʼu ñandéve mbaʼéichapa oipota jaadora chupe, avei mbaʼeichaitépa ovyʼáta ñandereheve ha ñanevendesíta jajapóramo upéva.
JESÚS
Jesús oiporiahuvereko vaʼekue la héntepe ha upévare omonguera opaichagua mbaʼasy.
Ikatúta jadisfruta umi vendisión odurátava pára siémpre oguerútava Ñandejára ñaaprendéramo Jesúsgui, ha umi mbaʼe haʼe heʼi ha ojapo vaʼekuégui.
Ñandejára Ñeʼẽme oĩ hetaiterei detálle Jesús ohasa vaʼekue ha avei umi mbaʼe haʼe omboʼe vaʼekue. Ñandejára omeʼẽ kuri chupe pe podér ikatu hag̃uáicha ojapo umi milágro tuichaitereíva. Por ehémplo, haʼe omonguera vaʼekue umi ohechaʼỹva, ohenduʼỹva, ndoguatáiva, ha omoingove jey umi omanóvape jepe. Upéicha Jesús ohechaukáma hína kuri umi vendisión Ñandejára oguerútava amo gotyove enterovévape g̃uarã. Ha avei oexplika vaʼekue mbaʼépa jajapo vaʼerã káda uno jadisfruta hag̃ua umi vendisión, heʼírõ guare: “Umi hénte oikove hag̃ua pára siémpre tekotevẽ ndekuaa ndéve, nde hína Ñandejára teete ha peteĩetéva. Oikuaa vaʼerã avei Jesucrístope, upe nde rembou vaʼekue” (Juan 17:3).
Jesús oiporiahuvereko vaʼekue enterovépe, ha avei hory ha iñamávle. Upévare opaichagua hénte, tahaʼe kuña, kuimbaʼe, imitãva ha ijedáva oasepta vaʼekue ko invitasión haʼe ojapóva: “Peaprende chehegui. Che ningo ndachepochyreíri ha cheumílde che pyʼaite guive, upévare katuete pombopiroʼýta” (Mateo 11:29). Upe tiémpope ningo oĩ vaʼekue oapoʼietereíva kuñanguérape, péro haʼe katu ndahaʼeiete vaʼekue upéicha. Jesús siémpre iñamávle, otrata porã, ha ohechauka orrespetaha kuñanguérape.
¿Mbaʼépa ñaaprende? Jesús ohayhu vaʼekue la héntepe ipyʼaite guive, ha oheja ñandéve peteĩ ehémplo iporãitereíva ohechaukáva mbaʼéichapa jajotrata vaʼerã.
JESÚS NDAHAʼÉI ÑANDEJÁRA
Ñandejára Ñeʼẽ omboʼe “oĩha peteĩ Dios verdadéro añoite”, ha Cristo Jesús haʼe hague Ñandejára mensahéro (1 Corintios 8:6). Jesús voi heʼi porã vaʼekue Ñandejára tuichaveha chugui, ha Ñandejára haʼe hague upe ombou vaʼekue chupe ko yvy ape ári (Juan 11:41, 42; 14:28).a