¿Mbaʼe rehepa odepende ñande futúro?
Heta hénte opensa ifutúro odependeha idestíno térã isuértere, upévare ojapo heta mbaʼe haʼekuéra oimoʼãva oipytyvõtaha chupekuéra.
OJEGUEROVIÁVA JEPI
PE ASTROLOHÍA: Oĩ hénte opensáva ifutúro odependeha asegún moõitépa oĩ kuri umi estrélla haʼekuéra onasérõ guare. Upévare olee hikuái pe oróskopo oikuaaségui mbaʼépa oikóta hesekuéra amo gotyove, mbaʼéichapa ikatu ojei peteĩ provlémagui térã mbaʼépa ojapo vaʼerã osẽ porã hag̃ua hikuái.
UMI KARTAKUÉRA: Oĩ oitykáva umi kárta ikatu hag̃uáicha oikuaa mbaʼérepa oiko hesekuéra peteĩ mbaʼe ha mbaʼépa tekotevẽ ojapo. Upéi ojegia la ojeʼévare chupekuéra ojehekýi hag̃ua umi pelígrogui, osolusiona hag̃ua peteĩ provléma ha oikuaa hag̃ua mbaʼéichapa ikatu iplatave.
OJEADORA UMI OMANO VAʼEKUÉPE: Oĩ oroviáva oadora vaʼerãha ihénte omano vaʼekuépe térã heta dióspe, koʼãva oprotehe ha ovendesi hag̃ua chupekuéra. Peteĩ kuñakarai oikóva Vietnámpe heʼi: “Apensa vaʼekue amombaʼeguasúramo che hentekuéra omano vaʼekuépe aiko porãvetaha koʼág̃ama voi ha ndojehumoʼãiha mbaʼeve ivaíva chéve ni che membykuérape”.
RRENKARNASIÓN: Heta persóna oguerovia omanóramo, upéi onase jeytaha ha ko proséso ojerrepetiha heta vése. Haʼekuéra opensa umi mbaʼe iporãva térã ivaíva oikóva hesekuéra koʼág̃a odependeha umi mbaʼe ojapo vaʼekuére ivída pasádape.
Amo ipahápe umi persóna opensa koʼã mbaʼe japupa reiha, péro lomímonte otantea hikuái ha oho umi espiritísta rendápe, oityka umi kárta, oleeka ipo, olee umi oróskopo ha umícha. Haʼekuéra ojapo koʼã mbaʼe peichahágui oipytyvõramo g̃uarã chupekuéra oikuaa hag̃ua ifutúro.
MBAʼÉPA LA RRESULTÁDO
¿Oiko porãvépa térã oasegurápa ifutúro umi hénte ogueroviáva koʼã mbaʼe?
Jahechamína la ohasa vaʼekue peteĩ karai oikóva Vietnámpe. Haʼe omombaʼeguasu vaʼekue umi ihénte omano vaʼekuépe ha siémpre ojegia pe oróskopore odesidi hag̃ua la ojapótava. ¿Oho porãvépa chupe upéi? Ko karai heʼi: “Kon el tiémpo aju aperde heta pláta, aike heta déudape, cheprovléma che rogapýpe ha aju añedeprimiete”.
Peteĩ karai oikóva Taiwánpe omombaʼeguasu vaʼekue umi ihénte omano vaʼekuépe, oguerovia pe destíno, pe rrenkarnasión, astrolohía ha umícha. Péro upéi ko karai oñepyrũ oinvestiga porã koʼã mbaʼe, ha heʼi: “Ahechakuaa koʼã kostúmbre ha enseñánsa oñekontradesipa ha naisentidoiha. Por ehémplo, pe astrolohía pyʼỹinte ojavypa ha pe rrenkarnasión amo ipahápe naisentídoi chéve, pórke oimérõ nanemanduʼái la rejapo vaʼekuére pe ótra vídape, ¿mbaʼéicha erekóta oportunida rekambia hag̃ua upéi?”.
“Ahechakuaa koʼã kostúmbre ha koʼã enseñánsa oñekontradesipa ha naisentidoiha” (PETEĨ KARAI OIKÓVA TAIWÁNPE).
Koʼã persóna ha hetave hénte voi ohechakuaa ifutúro nodependeiha pe destínore, umi estréllare, pe rrenkarnasiónre, ni umi hénte omano vaʼekuére. ¿Péro heʼisépa upéva ndaikatuiha jajapo mbaʼevete asy jaasegura hag̃ua ñande futúro?
Heta hénte opensa oasegura hag̃ua ifutúro ijestúdio porã ha ipláta heta vaʼerãha. ¿Péro mbaʼépa ohupyty umi odesidi vaʼekue ojerovia koʼã mbaʼére?
a Ko karai heʼi vaʼekue jatopa Ñandejára Ñeʼẽ la Bíbliape Gálatas 6:7-pe. Oĩ avei voi peteĩ ñeʼẽnga heʼíva: “Eñotỹramo merõ, osẽta ndéve merõ. Eñotỹramo kumanda, emonoʼõta kumanda”.