“Ñandejára ohechauka ñandeporiahuverekoitereiha”

1. ¿Mbaʼépa ikatu ou ñane akãme ñañeʼẽ jave peteĩ oiporiahuverekóvare hapichápe?

ÑAÑEʼẼ jave peteĩ oiporiahuverekóvare hapichápe, oiméne ñapensa peteĩ persóna ivuénovare, ipyʼaporãva, oporombyasýva ha ipojerávare. Oiméne ou voi ñane akãme pe istória Jesús omombeʼu vaʼekue oñeʼẽva pe samaritano imbaʼeporãvare. Ko kuimbaʼe extranhéro ningo “oiporiahuvereko vaʼekue” peteĩ judío oñemonda ha oñembyepoti vaipaite vaʼekuépe. Pe samaritano “ombyasyeterei chupe”, ha mborayhúpe oñangareko hese (Luc. 10:29-37). Ko ehémplo ñanemboʼe Jehová ñandeporiahuverekoha, upéva ningo peteĩ kualida iporãitereíva haʼe orekóva. Ñandejára ningo ñandeporiahuvereko ñanderayhu rupi, ha haʼe ohechauka ñandéve upéva hetaiterei hendáicha káda día.

2. ¿Mbaʼéichapa ojehechauka jepi avei ojeporiahuverekoha peteĩ persónape?

² Ojehechauka jepi avei ojeporiahuverekoha peteĩ persónape ndojekastigáiramo chupe, omereséramo jepe upéva. Upéicha rupi ikatu jaʼe Jehová ñandeporiahuverekoitereiha, pórke pe salmísta heʼi haguéicha: “Ñande japeka ha ñamerese kuri Ñandejára ñandekastiga, péro haʼe ndojapói upéva” (Sal. 103:10). Péro sapyʼánte Jehová okastiga mbaretémante vaʼerã peteĩ opeka vaʼekuépe.

3. ¿Mbaʼe mbaʼépa ñambohováita ko artíkulope?

³ Ko artíkulope jahecháta mbaʼéichapa la Biblia ombohovái koʼã mbohapy porandu: ¿Mbaʼérepa Jehová ñandeporiahuvereko? ¿Mbaʼérepa ikatu jaʼe ojeporiahuverekoha hína peteĩ persónape ojekorrehi mbarete jave chupe? ¿Ha mbaʼépa ñanepytyvõta jaiporiahuvereko hag̃ua ñande rapichakuérape?

¿MBAʼÉREPA JEHOVÁ ÑANDEPORIAHUVEREKO?

4. ¿Mbaʼérepa Jehová ñandeporiahuvereko?

⁴ Ñanderayhu rupi. Apóstol Pablo oskrivi vaʼekue Ñandejára “ñandeporiahuverekoitereiha”. Koʼápe Pablo omyesakã Ñandejára ohechaukaha ko kualida, pórke omeʼẽ isiervokuéra imperféktope pe esperánsa oikovévo yvágape (Efes. 2:4-7). Péro Jehová ndahaʼéi oiporiahuverekóva umi unhídopente. Rréi David oskrivi vaʼekue peteĩ sálmope: “Jehová, nde ningo nevuenoiterei enterovéndi, siémpre oreporiahuvereko, upéva ojekuaa opa mbaʼe rejapóvape” (Sal. 145:9). Jehová ñanderayhu enterovépe, upévare siémpre ñandeporiahuvereko ijáma guive chupe.

5. ¿Mbaʼéichapa Jesús oaprende vaʼekue Jehová ñandeporiahuverekoha?

⁵ Jesús ningo oikuaa porãiterei mbaʼeichaitépa Jehová ñandeporiahuvereko ñanderayhu rupi. Ndaipóri voi ótro haʼéicha oikuaa porãve vaʼerã Jehovápe, pórke Jesús ou mboyve ko yvy ape ári, haʼekuéra oĩ vaʼekue oñondive yvágape hetaiterei áñore (Prov. 8:30, 31). Hetaiterei vése ningo Jesús ohecha vaʼekue mbaʼéichapa Itúa oiporiahuvereko umi yvypóra imperféktope (Sal. 78:37-42). Ha Jesús oporomboʼe jave, pyʼỹinte oñeʼẽ vaʼekue ko kualida porãite Itúa orekóvare.

6. ¿Mbaʼe istóriapa Jesús omombeʼu vaʼekue ñantende hag̃ua Itúa ñandeporiahuverekoha?

⁶ Jahecha haguéicha pe ótro artíkulope, Jesús omombeʼu vaʼekue peteĩ istória opokoitereíva ñanderehe oñeʼẽva pe taʼýra ofalla vaʼekuére. Péicha ñanepytyvõ ñantende hag̃ua mbaʼeichaitépa Jehová ñandeporiahuvereko ñanderayhu rupi. Upe istóriape pe taʼýra osẽ oho hógagui “oiko iñakãre ha ogasta vaipa la orekomíva” (Luc. 15:13). Upe rire haʼe oñarrepenti hekovai haguére, oñemomirĩ ha oho jey hógape. ¿Mbaʼépa ojapo raʼe itúa? Jesús heʼi: “Itúa ohecha chupe ouha mombyry guive, ha oiporiahuverekoiterei chupe, upévare odipara hendápe, hatã oañuã itaʼýrape ha ohetũ chupe”. Itúa ningo ndojaʼói ni nomotĩri chupe. Upéva rangue, upepete voi oiporiahuvereko ha operdona itaʼýrape ha orresivi jey chupe ifamíliaramo. Pe taʼýra opeka vaieterei kuri, péro oñarrepenti rupi itúa operdona chupe. Pe túa ivuenoitéva orrepresenta hína Jehovápe. Ko istória iporãitéva rupive Jesús ñanemboʼe Itúa operdonasetereiha umi pekadór oñarrepentívape ipyʼaite guive (Luc. 15:17-24).

7. ¿Mbaʼéichapa Jehová ohechauka iñaranduha ñandeporiahuvereko jave?

⁷ Iñarandueterei rupi. Jehová ningo iñarandueterei, péro upéva ndeʼiséi haʼe oikuaanteha heta mbaʼe ha noñanduiha mbaʼeve avavére. La Biblia heʼi voi ‘pe arandu oúva yvágagui oporoporiahuverekoha ha ojapoha heta mbaʼe iporãva’ (Sant. 3:17). Ojapoháicha peteĩ túa ohayhuetereíva ifamiliakuérape, Jehová oikuaa ideprovechoitereitaha itaʼyrakuérape oiporiahuverekóramo chupekuéra (Sal. 103:13; Is. 49:15). Ñaneimperféktoramo jepe, Jehová omeʼẽ ñandéve peteĩ esperánsa iporãitereíva ñandeporiahuverekógui. Jehová iñarandueterei rupi ñandeporiahuvereko ijáma guive chupe ojapo hag̃ua upéva. Péro haʼe oikuaa avei mbaʼe moméntopepa ñandeporiahuvereko vaʼerã ha mbaʼe moméntopepa nahániri. Haʼe ningo iñarandueterei, upévare haʼe ndaiflóhoi ni naipermisívoi.

8. ¿Mbaʼépa sapyʼánte tekotevẽmante ojejapo, ha mbaʼérepa?

⁸ Ñamoĩ chupe peteĩ ermáno odesidiha ipyʼapýpe voi opekataha. ¿Mbaʼépa ojejapo vaʼerã péicha jave? Jehová heʼi Páblope oskrivi hag̃ua pe kongregasiónpe: “Anive pejeheʼa hese” (1 Cor. 5:11). Umi pekadór noñarrepentírivape oñemosẽ kongregasióngui. Upéva ojejapómante vaʼerã ikatu hag̃uáicha ojeprotehe umi ermáno ha ermanakuéra ifiélvape, ha oñekumpli hag̃ua umi léi ihústova Jehová omeʼẽva. Péro oñemosẽ jave peteĩ ermánope kongregasióngui, oĩ opensáva Jehová ndoiporiahuverekói hague chupe. ¿Siértopa upéva? Jahechamína.

¿OÑEMOSẼPA PETEĨ PERSÓNAPE NDOJEPORIAHUVEREKÓI RUPI CHUPE?

9, 10. a) Ohechaukaháicha Hebreos 12:5, 6, ¿mbaʼérepa ikatu jaʼe oñemosẽ jave peteĩ persónape ojeporiahuverekoha chupe ha pe kongregasiónpe? b) ¿Mbaʼe ehémplopa ñanepytyvõ ñantende hag̃ua upéva?

⁹ Ñambyasyeterei ningo oñeanunsia jave rreunionhápe peteĩ jahayhúva “ndahaʼeveimaha testígo de Jehová”. Ikatu voi ñañeporandu tekotevẽpa raʼe la oñemosẽ chupe kongregasióngui. ¿Péro ikatúpa jaʼe oñemosẽha peteĩ persónape ndojeporiahuverekói rupi chupe? Nahániri. Oĩramo opekáva ha omerese ojekorrehi, iporãve hína ojejapo upéva ha péicha ojehechauka ojehayhu ha ojeporiahuverekoha chupe (Prov. 13:24). ¿Ikatúpa oñepytyvõ peteĩ pekadórpe oñarrepenti ha okambia hag̃ua oñemosẽramo chupe? Si ikatu. Heta ermáno opeka ha oñemosẽ vaʼekue kongregasióngui, heʼi upéva oipytyvõ hague chupekuéra ohechakuaa hag̃ua mbaʼeichaitépa ivai la ojapo vaʼekue. Avei oipytyvõ chupekuéra oñarrepenti ha okambia hag̃ua oiko lája, ha ou jey hag̃ua Jehová rendápe (elee Hebreos 12:5, 6).

¹⁰ Oñemosẽ jave peteĩ persónape, ojehechauka hína avei ojeporiahuverekoha pe kongregasiónpe. Ñapensamína ko ehémplore. Ñamoĩ chupe peteĩ pastór ohechakuaaha peteĩva umi ijovecha hasyha hína. Haʼe oikuaa oipohãno hag̃ua ko ovechápe, oapartámante vaʼerãha chupe umi ótrogui. Péro umi ovecha ningo ndopytaséi jepi haʼeño. Haʼekuéra oĩse umi ótro ovechándi, ha ojedesespera voi oñemohaʼeñóramo chupekuéra. Upéicharõ, ¿heʼisépa upéva pe pastór iñañaha, térã ojopyetereimaha pe ovechándi ojapóvo upéva? Ni mbaʼevéicharõ. Haʼe oikuaa ohejáramo pe ovecha hasýva ojeheʼa umi ótrore, ikatuha oguerova hesekuéra la imbaʼasy. Péro oapartávo chupe, oñangareko hína pe ovecha aty kompletoitére (ekompara Levítico 13:3, 4).

11. a) ¿Mbaʼérepa ikatu jaʼe pe oñemosẽva ojoguaha peteĩ ovecha hasývape? b) ¿Mbaʼe mbaʼépa ojapokuaa umi expulsádo, ha mbaʼe ajúdapa ikatu oñemeʼẽ chupekuéra?

¹¹ Peteĩ kristiánope oñemosẽ jave, ikatu jaʼe ojoguaha pe ovecha hasývape. Haʼe ningo ombyai kuri pe iñamista Jehovándi, upévare hasykatu hína (Sant. 5:14). Peteĩ persóna hasýva ikatuháicha oguerova ótrore pe imbaʼasy, upéicha avei pe ombyai vaʼekue iñamista Jehovándi ikatu oguerova ótrore pe opensa lája. Upéicha rupi sapyʼánte oñemosẽmante vaʼerã kongregasióngui upe ovecha hasývape. Péicha okorrehívo pe pekadórpe, Jehová ohechauka ohayhuha umi ótro isiervokuéra ifiélvape. Ha upéva ikatu avei oipytyvõ pe pekadórpe ohechakuaa hag̃ua mbaʼeichaitépa ivai la ojapo vaʼekue ha oñarrepenti. Oĩ aja expulsádo, haʼe ikatu oho rreunionhápe, ikatuhápe orresivi instruksión oúva la Bíbliagui ha omombarete jey ijerovia. Haʼe ikatu orresivi umi puvlikasión olee ha ostudia hag̃ua, ha avei ikatu ohecha pe prográma JW Broadcasting^®. Umi ansiáno ohechakuaáramo pe expulsádo okambiaha ohóvo, ikatu omeʼẽ jepi konsého oipytyvõtava chupe oĩ porã jey hag̃ua Ñandejárandi, ha oiko jey hag̃ua chugui testígo de Jehová.b

12. ¿Mbaʼépa ikatu ojapo umi ansiáno ohechauka hag̃ua ohayhu ha oiporiahuverekoha pe pekadór noñarrepentírivape?

¹² Iñimportánte ñanemanduʼa oñemosẽha kongregasióngui umi pekadór noñarrepentírivape añoiténte. Umi ansiáno oikuaa opensa porã vaʼerãha odesidi mboyve omosẽ peteĩ persónape. Haʼekuéra ningo oikuaa Jehová ‘oporokorrehiha oñekotevẽha peve’, ha osegise hikuái iñehémplo (Jer. 30:11). Umi ansiáno ningo ohayhu iñermanokuérape, ha ndojaposéi mbaʼeve ikatúva ombyai pe amista orekóva hikuái Jehovándi. Péro sapyʼánte iporãvéta oñemosẽ pe pekadórpe ikatu hag̃uáicha ojehechauka ojehayhu ha ojeporiahuverekoha chupe.

13. ¿Mbaʼérepa oñemosẽ vaʼerã kuri kongregasióngui peteĩ kristiáno oĩvape Coríntope?

¹³ Jahechamína mbaʼépa ojapo vaʼekue apóstol Pablo, yma síglo primérope oĩrõ guare peteĩ pekadór noñarrepentíriva. Coríntope oĩ vaʼekue peteĩ kristiáno oikóva hekovai, pórke oreko rrelasión sexuál itúa rembirekóndi. ¡Ajépa ñanembojeguaruete la oiko vaʼekue! Pablo ningo oikuaa vaʼekue Jehová omanda hague umi israelítape: “Peteĩ kuimbaʼe orekóramo rrelasión sexuál itúa rembirekóndi, omotĩ hína itúape. Ojejuka vaʼerã katuete pe kuimbaʼépe ha pe itúa rembirekópe” (Lev. 20:11). Pablo ndaikatúi vaʼekue heʼi pe kongregasiónpe ojuka hag̃ua pe kuimbaʼépe. Péro si heʼi oñemosẽ hag̃ua chupe. Umi mbaʼe vai ojapóva ko kuimbaʼe operhudikáma ótrope kongregasiónpe. Oĩma voi ijapytepekuéra umi notĩvéimava la oikóvare ni nopensavéimava ivaietereiha upe pekádo (1 Cor. 5:1, 2, 13).

14. ¿Mbaʼéichapa Pablo ohechauka vaʼekue oiporiahuverekoha pe kuimbaʼe Corintogua oñemosẽ vaʼekuépe, ha mbaʼérepa? (2 Corintios 2:5-8, 11).

¹⁴ Tiémpo rire, Pablo oikuaa ko kuimbaʼe tuichaiterei okambia hague. ¡Pe pekadór oñarrepentíma ipyʼaite guive! Haʼe ningo omotĩ kuri pe kongregasiónpe, upéicharõ jepe Pablo heʼi umi ansiánope haʼe ndoikoseiha okorrehi pohyietereíma chupe. Ha heʼi avei chupekuéra: “Pyʼaporãme peperdona vaʼerã pe kuimbaʼépe, ha pekonsola chupe”. Ha omyesakã chupekuéra mbaʼérepa ojapo vaʼerã upéva: “Ani ág̃a oñembyasyetereígui oñentrega”. Pablo ningo ombyasy pe pekadór oñarrepenti vaʼekuépe. Haʼe ndoipotái ko kuimbaʼe oñeñandu vai rasáma ni omboguapyeterei ijehe umi mbaʼe vai ojapo vaʼekue, ha amo ipahápe noñehaʼãvéi Ñandejára operdona hag̃ua chupe (elee 2 Corintios 2:5-8, 11).

15. ¿Mbaʼéichapa umi ansiáno ikatu okorrehi mbarete ha avei oiporiahuvereko peteĩ pekadórpe?

¹⁵ Umi ansiáno ningo osegi Jehová ehémplo ha oiporiahuvereko hapichápe oporohayhu rupi. Tekotevẽ jave, haʼekuéra okorrehi mbaretéta peteĩ pekadórpe, péro ikatúma guive ohechaukáta oiporiahuverekoha chupe. Umi ansiáno ndokorrehíriramo pe pekadórpe tekotevẽháicha, añetehápe ndoiporiahuverekomoʼãi hína chupe, síno iflóho ha ipermisívota hikuái. ¿Péro umi ansiáno añoiténtepa ohechauka vaʼerã oiporiahuverekoha hapichápe?

¿MBAʼÉPA ENTEROVÉPE ÑANEPYTYVÕTA JAIPORIAHUVEREKO HAG̃UA ÑANDE RAPICHÁPE?

16. Ohechaukaháicha Proverbios 21:13, ¿mbaʼépa Jehová ojapóta umi ndoiporiahuverekóivare hapichápe?

¹⁶ Enterove ningo ñañehaʼã jasegi Jehová ehémplo ha jaiporiahuvereko ñande rapichápe. ¿Mbaʼérepa? Pórke upéva hína peteĩva umi mbaʼe iñimportantevéva Jehová ohendu hag̃ua ñane ñemboʼe (elee Proverbios 21:13). Ñande ndajaipotaiete Jehová orrechasa umi ñane ñemboʼe. Upévare ñañatende porã vaʼerã ani hag̃ua jaju ñandepyʼahatã. Ñande ningo nañambotyséi ñande apysa peteĩ ñane ermáno osufrívagui hína. Upéva rangue pyaʼe voi ñaipytyvõta chupe ojerure jave ñandéve ajúda. Avei ñañehaʼãmbaitéta jareko enkuénta ko konsého oĩva Santiago 2:13-pe: “Pe ndoiporiahuverekóiva hapichápe, ndojeporiahuverekomoʼãi avei ojehusga vove”. Ñande ñaneumílderamo ha ñanemanduʼa mbaʼeichaitépa ñaikotevẽ umi ótro ñandeporiahuvereko, ifasilvéta ñandéve jaiporiahuvereko hag̃ua ñande rapichápe. Ha koʼýte tekotevẽ jahechauka upéva peteĩ pekadór oñarrepentíramo ha ou jey kongregasiónpe.

17. ¿Mbaʼéichapa rréi David oiporiahuvereko vaʼekue hapichápe ipyʼaite guive?

¹⁷ La Bíbliape jatopa umi ehémplo ñanepytyvõva jaiporiahuvereko hag̃ua ñande rapichápe ha ani hag̃ua ñandepyʼahatã. Jahechamína la oiko vaʼekue rréi David rehe. Haʼe ningo pyʼỹinte oiporiahuvereko vaʼekue hapichakuérape ipyʼaite guive. Por ehémplo, Saúl ojukaséramo jepe chupe, David oiporiahuvereko Saúlpe haʼe rupi pe rréi Ñandejára oiporavo vaʼekue. David ningo núnka nopensái vaʼekue oñevengávo térã olastimávo chupe (1 Sam. 24:9-12, 18, 19).

18, 19. Emombeʼu mokõi situasión David ndoiporiahuverekói haguépe hapichápe.

¹⁸ Péro David ndahaʼéi vaʼekue la siémpre oiporiahuverekóva hapichápe. Por ehémplo, Nabal haʼe vaʼekue peteĩ kuimbaʼe ijarheletereíva, ha ojaʼo vaipa David soldadokuérape nomeʼẽséi rupi chupekuéra hoʼumi vaʼerã. Upéva omorrenegaiterei Davídpe, ha odesidi voi ojukataha Nabálpe ha entéro kuimbaʼe oĩvape hógape. Péro Abigaíl, haʼéva Nabal rembireko, imbaʼeporã ha ipasiénsia, ha pyaʼe ohecha oñemeʼẽ hag̃ua hiʼupy David umívape. Upéicha rupi David ndojukái Nabálpe ni umi ótro kuimbaʼépe (1 Sam. 25:9-22, 32-35).

¹⁹ Ótra vuéltape, proféta Natán heʼi Davídpe peteĩ kuimbaʼe irríkova omonda hague peteĩ karai mboriahúgui ijovechami ohayhuetereíva. Upéva omorrenegaiterei Davídpe ha heʼi: “Ñandejára Jehová oikovévare ahura ndéve, pe kuimbaʼe ojapóva upéva omano vaʼerã” (2 Sam. 12:1-6). David ningo oikuaa porã vaʼekue Moisés léi heʼíva. Upépe heʼi peteĩ kuimbaʼe omondáramo hapichágui ijovecha, omeʼẽ vaʼerãha 4 ovecha pe omonda vaʼekue rekovia (Éx. 22:1). Péro David ohasáma la rrája ha ipyʼahatãitereíma heʼírõ guare ojejuka vaʼerãha chupe. Natán omombeʼúnte kuri peteĩ istória oipytyvõtava Davídpe ontende hag̃ua haʼe ojapo hague umi mbaʼe ivaive jeýva upévagui. Jahechaháicha David ndoiporiahuverekói vaʼekue pe kuimbaʼe omonda vaʼekuépe pe ovecha, péro Jehová katu si oiporiahuvereko Davídpe (2 Sam. 12:7-13).

20. ¿Mbaʼépa ñaaprende David ehémplogui?

²⁰ David ningo ipochyetereírõ guare odesidi Nabal ha umi hogaygua omereseha omano. Upe rire pyaʼe porã avei odesidi ojejuka vaʼerãha pe kuimbaʼe Natán istóriape guarépe. Péro David ningo haʼe vaʼekue peteĩ kuimbaʼe ipyʼaporãva. ¿Mbaʼére piko upéicharõ la ipyʼahatãite raʼe ohusgárõ guare pe mondahápe? Ñantende hag̃ua, ñapensami mbaʼépa haʼe ohasa vaʼekue upe moméntope. Upérõ ningo omolesta hína kuri chupe la ikonsiénsia. Peteĩ persóna ojepokuaáramo ipyʼahatãiterei oporohusga jave, upéva heʼise noĩporãiha Jehová renondépe. Upéicha rupi, Jesús oavisa porã vaʼekue isegidorkuérape: “Anive pehusga pende rapichápe, ha Ñandejára napendehusgamoʼãi avei. Pórke peẽ pehusgaháicha pende rapichápe pejehusgáta avei” (Mat. 7:1, 2). Upévare, ñañatendékena ani hag̃ua ñandepyʼahatã ha ñañehaʼãmbaite japoroporiahuvereko Ñandejára ojapoháicha.

21, 22. ¿Mbaʼe mbaʼépa ikatu jajapo jaiporiahuvereko hag̃ua ñande rapichápe?

²¹ Jaiporiahuverekóramo ñande rapichápe ndahaʼemoʼãi ñambyasýtanteva chupe, síno jajapóta voi álgo hesehápe. Upévare enterove ikatu ñapensa mávapepa ikatu ñaipytyvõ, tahaʼe ñane famíliape, ñane kongregasiónpe térã ñande várriope. Katuete jarekóta heta oportunida jaiporiahuvereko hag̃ua ótrope. Por ehémplo, ¿oĩpa peteĩ persóna oikotevẽva oñekonsola chupe? ¿Ikatúpa jagueraha hoʼumi vaʼerã peteĩ oikotevẽvape, térã jajapo algún travahíto chupe hógape? ¿Oĩpa peteĩ ermáno oñerreadmiti ramóva oikotevẽva peteĩ amígo omokyreʼỹ vaʼerã chupe? ¿Ikatúpa ñakomparti ótrondi umi notísia porã okonsolátava chupe? Upéva ningo peteĩva umi mbaʼe iporãvéva ikatúva jajapo jaiporiahuvereko hag̃ua entéro persónape (Job 29:12, 13; Rom. 10:14, 15; Sant. 1:27).

²² Ñanembaʼerechakuaáramo jahecháta oĩha hetaiterei oportunida jaiporiahuvereko hag̃ua umi oikotevẽvape. Jajapóramo upéicha ñambovyʼáta hína Jehovápe, ñande Ru yvagapegua ‘ohechaukáva ñandeporiahuverekoitereiha’.