Emopuʼã ha emombarete jey ne amista Jehovándi

KÁDA áño ningo hetaiterei ovecha mimi ivaliosoitereíva oñerreadmiti ha ou jey kongregasiónpe. Epensamíntena mbaʼeichaitépa ‘ojevyʼa yvágape’ koʼã ovecha ou jey jave (Luc. 15:7, 10). Oiméramo nde ramoiténte reñerreadmiti raʼe, ikatu reime segúro Jesús, umi ánhel, ha Jehová voi ovyʼaitereiha reime jey haguére kongregasiónpe. Péro ikatu hína oĩ heta mbaʼe ijetuʼúva amedída ke remopuʼã ha remombarete jey ne amista Jehovándi. ¿Mbaʼe mbaʼépa ikatu ijetuʼu hína ndéve, ha mbaʼépa nepytyvõkuaa?

¿MBAʼE MBAʼÉPA IKATU HÍNA IJETUʼU?

Heta ermáno ningo osegi oñeñandu vai oñerreadmiti riréma jepe chupekuéra. Oiméramo oiko avei nderehe upéva, katuete oiméne rentende porãiterei mbaʼéichapa oñeñandu raʼe rréi David. Oñeperdona riréma jepe chupe, haʼe heʼi vaʼekue: “Añeñandu vaieterei ningo pórke ajapo ivaíva” (Sal. 40:12; 65:3). Ou jeýramo jepe Jehová rendápe, peteĩ persóna ikatu gueteri otĩ térã oñeñandu kulpávle heta áñore. Por ehémplo Isabel,a peteĩ ermána oĩ vaʼekue expulsáda mas de 20 áño, heʼi: “Ijetuʼueterei kuri chéve aguerovia hag̃ua Jehová ikatuha cheperdona”. Péro nde reñedesanimáramo, ikatu hína ikangy jey ndehegui ne amista Jehovándi (Prov. 24:10). Eñehaʼãmbaitékena ani hag̃ua oiko upéva nderehe.

Ótro katu oñekevrantaiterei opensávo entéro umi mbaʼe ojapo vaʼerãre oĩ porã jey hag̃ua Jehovándi. Por ehémplo oñerreadmiti rire, Antonio heʼi vaʼekue: “Che cheresaraipaitéma voi kuri mbaʼéichapa oiko vaʼerã peteĩ kristiáno”. Oñeñandu rupi upéicha, heta oĩ okyhyjéva oñemeʼẽmbaite hag̃ua Jehová servísiope.

Ñamoĩmína peteĩ ehémplo. Ñamoĩ chupe peteĩ torménta ivaietereíva sarambi ojapo hague peteĩ ógare. Pe ogajára ningo katuete ojedesesperáta opensávo mbaʼeichaitépa ombaʼapo vaʼerã omopuʼã jey hag̃ua la hóga, ha oikotevẽtaha heta tiémpo upearã. Upéicha avei, oiméramo ne amista Jehovándi ojeperhudika raʼe repeka vai haguére, ikatu hína repensa hetaiterei rembaʼapo vaʼerãha emopuʼã ha emombarete jey hag̃ua upéva. Péro nereiméi hína neaño rejapo hag̃ua ko traváho.

Jehová ningo mborayhúpe heʼi isiervokuéra ofalla vaʼekuépe: “Peju che rendápe ñañemongeta hag̃ua, ha che poipytyvõta peiko porã jey hag̃ua chendive” (Is. 1:18). Nde ningo hetáma reñehaʼã ‘reiko porã jey hag̃ua Jehovándi’, upévare haʼe nderayhueterei. Epensamíntena: Nde reju jey haguére Jehová rendápe, haʼe ikatu oipuru ne ehémplo ohechauka hag̃ua Satanás ijapuha (Prov. 27:11).

Reju jeývo Jehová rendápe, tuicháma voi reñemoag̃ui jey hína hese, ha haʼe opromete oñemoag̃uitaha avei nderehe (Sant. 4:8). Iporã ningo añete umi ótro ohecha nde reju jey hague kongregasiónpe. Péro oĩve hína peteĩ mbaʼe rejapo vaʼerã: Reñehaʼã vaʼerã rehayhuve nde Túa ha ne Amígo Jehovápe. ¿Mbaʼéichapa ikatu rejapo upéva?

EMOĨ UMI MÉTA IKATÚVA REHUPYTY

Eñehaʼã emoĩ umi méta ikatúva rehupyty. Nemanduʼákena nde róga ndahaʼeiha ku hoʼapaite vaʼekue voi. Ikatu oime opyta gueteri pe simiénto ha umi párte iñimportantevéva. Por ehémplo, oiméne nemanduʼa gueteri Jehová promesakuérare ha umi mbaʼe iñimportantevéva reaprende vaʼekuére chugui. Péro koʼág̃a eñehaʼã vaʼerã eiko jey peteĩ kristiánoicha. Upearã ejepokuaa jey vaʼerã epredika, eho meme rreunionhápe ha ehasa tiémpo umi ermáno ha ermanakuérandi. Jahechamína mbaʼeichagua métapa ikatu emoĩ.

Eñemongeta memékena Jehovándi. Nde Túa yvagapegua ningo ontende ikatuha ijetuʼu ndéve reñemboʼe chupe resegíramo reñeñandu kulpávle (Rom. 8:26). Upéicharõ jepe, ‘siémprekena eñemboʼe’ ha ere Jehovápe mbaʼeichaite pevépa erekose jey chupe ne amígoramo (Rom. 12:12). Andrés imanduʼa: “Che ningo añeñandu vaieterei vaʼekue ha atĩeterei voi. Péro káda orasión rire menovéma añeñandu upéicha ha chepyʼaguapyve”. Oiméramo nde ndereikuaái mbaʼépa ikatu ere Jehovápe, ejepyʼamongetakuaa umi ñemboʼe rréi David ojapo vaʼekuére oñarrepenti rire, ha oĩva Salmo 51 ha 65-pe.

Estudia memékena la Biblia. Upéva omombaretéta nde jerovia ha nepytyvõta rehayhuve hag̃ua Jehovápe (Sal. 19:7-11). Felipe heʼi: “Che ningo ndajepokuaái vaʼekue alee ha astudia la Biblia, upéicha rupi aju chekangy ha afalla Jehovándi. Che ndaipotái oiko jey cherehe upéva, upéicha rupi ajapo meme che estúdio personál ikatu hag̃uáicha ajeprotehe”. Nde upeichaite avei ikatu rejapo. Péro ndereikuaáiramo mbaʼe témapa ikatu reiporavo rejapo hag̃ua nde estúdio personál, ikatu rejerure peteĩ ne amígo ijerovia mbaretévape nepytyvõ hag̃ua.

Eñamiga jeýkena umi ermanokuérare. Sapyʼánte umi ou jeýva kongregasiónpe okyhyje oñemaña vaipárõ g̃uarã hesekuéra, térã oĩrõ g̃uarã ipochýva hendivekuéra. Larissa omombeʼu: “Atĩeterei ningo kuri ha ndaikuaái voi moõpa amoingéta la che rova. Heta tiémpore añandu vaʼekue atraisiona hague umi ermanokuérape”. Ikatu reime segúro umi ansiáno ha umi ermáno ijerovia mbaretéva nepytyvõsetereiha, ikatu hag̃uáicha remopuʼã ha remombarete jey ne amista Jehovándi (ehecha pe rrekuádro “¿Mbaʼépa ikatu ojapo umi ansiáno?”). Haʼekuéra ningo ovyʼaiterei reju jey haguére kongregasiónpe ha oipota nde avei revyʼa (Prov. 17:17).

¿Mbaʼépa ikatu rejapo reñemoag̃uive hag̃ua pe kongregasiónre? Ani rejavy ni peteĩ rreunión ha epredika meme ermanokuérandi. ¿Mbaʼéichapa nepytyvõta upéva? Félix heʼi: “Pe kongregasiónpe ningo hiʼãitereíma kuri che aju jey. Ahechakuaa umi ermáno cherayhuetereiha. Enterovénte voi chepytyvõ añeñandu jey hag̃ua en família, añandu hag̃ua Jehová cheperdonáma hague ha ikatuha aservi jey chupe” (ehecha pe rrekuádro “¿Mbaʼépa nde ikatu rejapo?”).

¡ANÍKENA EÑENTREGA!

Amáske reñemoag̃uive Jehováre, Satanás osegíta opoi nde ári umi “torménta ndevaipa jepéva” nemokangy hag̃ua (Luc. 4:13). Reimeséramo preparádo, koʼág̃ama voi remombarete vaʼerã ne amista Jehovándi.

Oñeʼẽvo ijovecha mimíre, Jehová opromete: “Ahekáta pe okañy vaʼekuépe ha agueru jeýta pe oñedesatina vaʼekuépe, avendáta pe oñelastima vaʼekuépe ha amombaretéta pe ikangývape” (Ezeq. 34:16). Jehová ningo oipytyvõma heta isiérvope oreko jey hag̃ua peteĩ amista iporãva hendive. Upévare ikatu reime segúro haʼe nepytyvõseha avei ndéve amás día imbareteve hag̃ua ne amista hendive.