1922, ojapóma 100 áño

“UPE IDÉA ORESORPRENDETEREI”

Amáske hetave ohóvo umi opredikáva, oñekotevẽ kuri hetave puvlikasión. Pe Betel oĩva Broóklynpe ojapo vaʼekue umi rrevistakuéra. Péro upérõ haʼekuéra odepende gueteri umi empresakuérare ojapo hag̃ua umi lívro oguerekóva tápa dúra. Peteĩ tiémpore ofalta kuri umi puvlikasión ha upéva ojokoʼimi pe predikasión. Upévare ermáno Rutherford oporandu kuri ermáno Robert Mártinpe ikatúnepa avei haʼekuéra ojapo umi lívro.

Ermáno Martin omombeʼu: “Upe idéa oresorprendeterei kuri, heʼise rupi tekotevẽtaha roguereko peteĩ lugár ojejapo hag̃ua umi lívro”. Upearã umi ermáno oalkila kuri peteĩ lugár oĩva pe kálle Cóncordpe, número 18, Broóklynpe. Ha okonsegi hikuái umi ekípo oikotevẽva ikatu hag̃uáicha oñepyrũma ojapo umi lívro.

Péro naentéroi ovyʼa kuri ko mbaʼe ore rojaposévare. Pe herénte oĩva pe emprésa ojapóvape oréve umi lívro ou ovisita pe imprénta pyahu ha heʼi oréve: “Koʼápe peẽ peguerekopaite umi ekípo peikotevẽva, péro ni peteĩva ndapeikuaái mbaʼéichapa peipuru vaʼerã koʼãva, 6 mésepe sarambíma pejapóta chugui”.

Ermáno Martin heʼi: “Umi mbaʼe heʼi vaʼekue oréve haʼete kuri la siértova. Péro haʼe ndoguerahái enkuénta Jehová siémpre orepytyvõha”. Ko heʼi vaʼekue ermáno Martin ningo siertoite kuri, pórke ikatúma ojeprodusi 2.000 lívro por día.

OJEPURU PE RRÁDIO OÑEG̃UAHẼ HAG̃UA HETAITEREI HÉNTEPE

Upe tiémpope ndahaʼéi kuri ojejapóva umi livrokuérante ojepredika hag̃ua umi notísia porã, síno ojepuru avei ótro método upearã. Ha upéva haʼe kuri pe rrádio. Upérõ ermáno Rutherford oñeʼẽ kuri primera ves rrádio rupive peteĩ domingo kaʼaru, upe 26 de febrero de 1922. Upérõ haʼe ojapo pe diskúrso hérava: “Hetaiterei oikovéva koʼág̃a nomanomoʼãi arakaʼeve”. Ha oñembohasa pe emisóra KOG rupive de Los Ángeles, California, Estados Unidos.

Amo 25.000 persónarupi ohendu kuri upe prográma. Heta oĩ kuri oenviáva kárta oagradese hag̃ua. Umíva apytépe oĩ kuri Willard Ashford oikóva Santa Ana, Califórniape. Haʼe oagradeseterei ermáno Rútherfordpe idiskúrso porãitére, ha heʼive: “Ndahaʼéirire rrádio rupive ndaikatumoʼãi kuri rohendu ko diskúrso porãite, pórke roime kuri ógape ha añatende 3 persóna hasývare. Upéicha rupi ni pe ótra kuádrape ejapóramo la nde diskúrso, ndaikatumoʼãi kuri ahendu”.

Umi sigiénte semánape oñetransmitive kuri hetave prográma. Ha upe áño opakuévo, pe rrevísta The Watch Tower omombeʼu mas de 300.000 persóna ohendu hague pe notísia porã rrádio rupive.

Umi Estudiánte de la Biblia ohecha rupi umi rresultádo porã ojehupytýva ojepuru rupi pe rrádio, odesidi omoĩ peteĩ emisóra de rrádio pe terréno oguerekóvape hikuái Staten Íslandpe, opytáva ag̃ui pe Betel de Broóklyngui. Upéicha rupi umi áño oúvape umi Estudiánte de la Biblia oipuru ko emisóra oñehenóiva WBBR, ikatu hag̃uáicha oñemosarambi umi notísia porã.

“ADV”

Pe rrevísta The Watch Tower 15 de junio de 1922 oanunsia kuri ojejapotaha peteĩ asambléa Cedar Point, Ohíope. Upéva oikóta kuri del 5 al 13 de septiembre de 1922. Umi Estudiánte de la Biblia og̃uahẽva ohóvo Cedar Póintpe ovyʼaiterei.

Pe diskúrso de vienvenídape ermáno Rutherford heʼi kuri umi héntepe: “Che ajeroviaiterei ñande Ruvicha ovendesitaha ko asambléa ha oipytyvõtaha oñemombeʼu hag̃ua umi notísia porã arakaʼeve ojejapoʼỹ haguéicha ko yvy ape ári”. Umi ótro diskursánte avei omokyreʼỹ jey jey umi ermánope opredika hag̃ua.

Pe viernes 8 de septiembre 8.000 persónarupi oĩ pe auditóriope ha ohendusetereíma pe diskúrso ojapótava ermáno Rutherford. Upépe haʼe oexplikáta kuri mbaʼépa heʼise umi létra “ADV” oĩva pe invitasiónpe. Umi oikéva guive ohóvo upe auditóriope ohecha pe platafórma ári oĩha peteĩ mbaʼe oñenrrolláva. Arthur Claus oviaha vaʼekue Túlsagui, opytáva Oklahoma, Estados Unídospe, oheka peteĩ asiénto ikatutahápe ohendu porã, ha upéva ijetuʼu kuri pórke upérõ ndojepurúi gueteri umi mikrófono ni parlantekuéra.

Ani hag̃ua avave omolesta oñehendu aja pe asambléa, pe presidénte oanunsia umi og̃uahẽva tárde ndaikatumoʼãiha oike pe auditóriope ojejapo aja pe diskúrso. Las 9:30 pyhareve, ermáno Rutherford omoñepyrũ idiskúrso ha oipuru umi mbaʼe Jesús heʼi vaʼekue Mateo 4:17-pe: “Pe Rréino yvagapegua hiʼag̃uimbaitéma”. Heʼívo mbaʼéichapa umi hénte ohendúta umi notísia porã, haʼe oexplika: “Jesús voi heʼi vaʼekue ipresénsia aja oĩtaha peteĩ kosécha ha upéva rupive oñembyatytaha umi isiérvo iñeʼẽrendu ha ifiélvape chupe”.

Ermáno Claus, oguapy vaʼekue pe auditório prinsipálpe, omombeʼu: “Ore ningo roñatende porã umi mbaʼe haʼe heʼívare”. Péro upéi derrepentete oñepyrũ oñeñandu vai ha osẽmante vaʼerã pe auditóriogui, haʼe ojapómante upéva ndojaposéiramo jepe, pórke oikuaa porã osẽramo noñepermitimoʼãiha chupe oike jey pe auditóriope.

Ensegidamínte haʼe oñepyrũma oñeñandu porã jey kuri. Haʼe omombeʼu ohokuévo pe auditóriope ohendu hatã ojepopeteha umi hénte, ha upéva oemosionaiterei kuri chupe. Upévare haʼe opensa tekotevẽramo ojupitaha técho ári jepe ohendupa hag̃ua pe diskúrso porãite. Upérõ ningo haʼe imitã gueteri, 23 áño ramónte oguereko ha otopa mbaʼéichapa ojupíta pe técho ári. Ha ohecha kuri ojeavriha umi ventanaʼi oguerekóva pe edifísio, ha og̃uahẽvo ohechakuaa upépe oñehendu porãitereiha pe diskúrso.

Péro Arthur noĩri haʼeñónte pe técho ári. Upépe oĩ avei iñamigokuéra. Peteĩva héra Frank Johnson, ha haʼe odipara hendápe ha oporandu chupe: “¿Eguereko peteĩ kyse?”.

“Si aguereko”, heʼi Arthur.

Frank heʼi chupe: “Nde haʼe la rrespuésta ore orasiónpe. ¿Ehechápa pe mbaʼe oñenrrolláva pe yvate? Péva haʼe peteĩ letréro ha oñeñapytĩ hína koʼã klávore. Upévare eñatende porã pe Huésre,a heʼi vove: ‘Peikuaauka, peikuaauka’, eikytĩ koʼã 4 isã”.

Arthur kyse ipópe ohaʼarõ la señál. Upe riremínte ermáno Rutherford ja omohuʼãma ohóvo idiskúrso. Upe rire kyreʼỹme ha hatã porã heʼi: “Peneñeʼẽrendúkena ha pehechauka peẽ haʼeha testígo de Jehová. Pesegíkena pepredika umi rrelihión japu oñehundipa peve. Ko múndo oikuaa vaʼerã Ñandejára haʼeha Jehová, Jesucristo haʼeha umi rreikuéra Rréi ha umi autoridakuéra oĩva guive Ruvicha. Ko día hína pe iñimportantevéva. ¡Péina, pe Rréi ogovernáma! Peẽ peñeʼẽ vaʼerã hérape. ¡Upévare tapeho peikuaauka, peikuaauka, peikuaauka mávapa pe Rréi ha irréino!”.

Arthur omombeʼu haʼe ha umi ótro ermáno oikytĩ hague umi rróllo de téla ha upépe oñepyrũ ojepyso mbeguekatúpe ha osaingo pe platafórma ári ha ojehecha ojeskriviha hese: “Peikuaauka mávapa pe Rréi ha irréino”. “ADV” haʼe kuri umi primera 3 létra oĩva pe ñeʼẽ ingléspe “advertise” ha ojetradusíva “peikuaauka”.

PE SERVÍSIO IPORÃVÉVA

Pe asambléa oiko vaʼekue Cedar Póintpe oipytyvõ umi ermanokuérape oñehaʼãmbaite hag̃ua opredika pe Rréino. Ha umi ipyʼaporãva ovyʼaiterei kuri ikatu haguére oapoja ko tembiapo. Peteĩ kolportór (koʼág̃a oñehenóiva prekursór) oikóva Oklahómape oskrivi: “Ropredika oĩháme umi mína de karvón ha upépe la hénte imboriahueterei”. Haʼe omombeʼu umi hénte orresivi jave pe rrevísta The Golden Age oñepyrũ hague hasẽ. Haʼe omombeʼuve: “Orembovyʼaiterei ikatu haguére rokonsola chupekuéra”.

Umi Estudiánte de la Biblia ohechakuaa kuri iñurhenteha upe Jesús heʼi vaʼekue Lucas 10:2-pe: “Hetaiterei oĩ la oñemonoʼõ vaʼerã, péro saʼi travahadór oĩ omonoʼõ hag̃ua”. Opakuévo pe áño haʼekuéra oĩma kuri mas ke desidído oikuaauka hag̃ua pe Rréino oparupiete.