Oĩ porãva térã oĩ vaíva: Ikatu jajerovia la Bíbliare
Jarekóramo enkuénta sólamente ñande ñapensáva térã umi ótro opensáva jadesidi hag̃ua, ndahaʼéi katuete siémpre ñasẽ porãtava. La Biblia oexplika ñandéve mbaʼérepa, ha ndahaʼéi voi upévante, síno omeʼẽ avei ñandéve umi gía ikatúvare jajerovia. Upéva ñanepytyvõta javyʼa hag̃ua ha jaikuaa hag̃ua mbaʼépa oĩ porã ha mbaʼépa oĩ vai.
ÑAIKOTEVẼ ÑANDEJÁRA GÍA
La Biblia rupive, Ñandejára Jehováa oexplika umi umáno oikotevẽha hese ha ndaikatuiha ojapo mbaʼeve ijehegui reínte (Jeremías 10:23). Upévare haʼe omeʼẽ ñandéve la gía ñaikotevẽva Iñeʼẽ la Bíbliape. Haʼe ningo ñanderayhueterei enterovévape ha oipota ñasẽ porã, upévare ndoipotái jadesidi vai ni jaju jasufri upe haguére (Deuteronomio 5:29; 1 Juan 4:8). Avei haʼe hína ñande Apohare, iñarandu ha ñandekuaa porãiterei. Ndaipóri ótro haʼeichagua ikatu vaʼerã omeʼẽ ñandéve umi konsého iporãvéva (Salmo 100:3; 104:24). Upéicharamo jepe, Ñandejára ndoovligái la héntepe oiko hag̃ua haʼe oipotaháicha.
Jehová omeʼẽ ñande túa ha ñande sy ypykuépe, Adán ha Évape, opa mbaʼe oikotevẽva hikuái ovyʼa añete hag̃ua (Génesis 1:28, 29; 2:8, 15). Avei omeʼẽ chupekuéra unas kuánta instruksión isensilloitereíva ha ohaʼarõ haʼekuéra osegi umíva. Péro oheja ikargopekuéra haʼekueraite voi todesidi osegítapa umi instruksión térã nahániri (Génesis 2:9, 16, 17). Ñambyasýramo jepe, Adán ha Eva odesidi ojapo ogustáva chupekuérante, ha ndojapói umi mbaʼe ogustáva Ñandejárape (Génesis 3:6). ¿Mbaʼépa la rresultádo? ¿Oiko porãvépa umanokuéra odesidíramo ijehegui mbaʼépa oĩ porã térã oĩ vai? Nahániri. Koʼã tiémpo ohasávape jahechakuaa la hénte ndojapoiha Ñandejára heʼíva, ha upéicha rupi ndaikatúi oiko pyʼaguapýpe ni ovyʼa (Eclesiastés 8:9).
La Biblia ikatu ñandegia jadesidi porã hag̃ua, upéva ñanepytyvõta jaiko jaikohápe ha tahaʼe haʼéva ñande kultúra (2 Timoteo 3:16, 17; ehecha pe rrekuádro “Peteĩ lívro opaichagua persónape g̃uarã”). Jahechamína mbaʼéichapa la Biblia ikatu ñanepytyvõ.
¿Mbaʼérepa ojeʼe la Biblia haʼeha “Ñandejára ñeʼẽ”? (1 Tesalonicenses 2:13). Ehechamína ko vidéo hérava ¿Mávaguipa ou la Biblia?, retopátava jw.org-pe.
LA BIBLIA OMOMBEʼU MBAʼÉPA ÑANDEJÁRA OIPOTA JAJAPO
La Biblia omombeʼu ñandéve mbaʼéichapa ymaite guive Ñandejára ojogueraha umi ser umánondi. La heʼíva pype ñanepytyvõ ñantende hag̃ua mbaʼépa Ñandejárape g̃uarã oĩ porã térã oĩ vai, mbaʼépa ikatu ñanepytyvõ ha mbaʼépa ikatu ñandeperhudika avei (Salmo 19:7, 11). Umi leksión ñaaprendéva siémpre siertogua memete ha ñanepytyvõta jadesidi porã hag̃ua umi mbaʼe michĩvévape jepe.
Por ehémplo, epensamína ko konsého jatopávare Proverbios 13:20-pe: “Pe oiko meméva umi iñarandúvandi iñarandúta avei, péro pe oiko meméva umi itavývandi osẽ vaíta”. La heʼíva ko téxto siertoite, ha ikatu ñanepytyvõ koʼág̃a oporopytyvõ haguéicha ojeskrivi ypýrõ guare. La Biblia henyhẽte koʼãichagua konsého iporãvagui ha ideprovechoitereítava enterovépe (ehecha pe rrekuádro hérava “La Biblia ideprovécho koʼág̃a peve”).
Péro ikatu oime nde eñeporandu: “¿Mbaʼéichapa che ikatu aĩ segúro la Biblia heʼíva ikatuha chepytyvõ koʼág̃a?”. Pe ótro artíkulope jahecháta mbaʼéichapa la Biblia oipytyvõma heta héntepe.
a La Biblia ohechauka Ñandejára heraha Jehová (Salmo 83:18).