Ñakonfiákena Jehová organisasiónre ñande pyʼaite guive

1. ¿Mbaʼéichapa Jehová siervokuéra oñeorganisa vaʼekue síglo primérope?

JEHOVÁ omeʼẽ jave isiervokuérape peteĩ asignasión, haʼe ohaʼarõ chuguikuéra oñeorganisa porã ojapo hag̃ua upéva (1 Cor. 14:33). Por ehémplo Ñandejára oipota oñemombeʼu umi notísia porã oparupiete ko yvy ape ári (Mat. 24:14). Jehová onkarga vaʼekue Jesúspe upe traváho. Ha Jesús oorganisa la tekotevẽva ojejapo porã hag̃ua upéva. Síglo primérope, oñenombra vaʼekue umi ansiáno odirihi ha ogia hag̃ua umi kongregasión pyahu oñepyrũva oĩ heta lugárpe (Hech. 14:23). Upe tiémpope, Jerusalénpe oĩ vaʼekue peteĩ grúpo oĩháme umi apóstol ha ansianokuéra odesidíva la ojejapo vaʼerã entéro umi kongregasionkuérape (Hech. 15:2; 16:4). Ha iñeʼẽrendu rupi hikuái, “umi kongregasión osegi ojerovia mbareteve ha káda día heta hetave hikuái” (Hech. 16:5).

2. Áño 1919 guive, ¿mbaʼéichapa Jehová oorganisa ipuévlope?

² Jehová osegi oorganisa ipuévlope ko tiémpo peve. Áño 1919 guive Jesús ojevale peteĩ grúpo de unhídore oorganisa hag̃ua la predikasión ha omeʼẽ hag̃ua itiempoitépe umi instruksión la Biblia rupive (Luc. 12:42).a Ojekuaa porãiterei Jehová ovendesiha pe traváho ojapóva hikuái (Is. 60:22; 65:​13, 14).

3, 4. a) Emoĩ peteĩ ehémplo ohechaukáva ideprovechoha ñaime organisádo. b) ¿Mbaʼépa jahecháta ko artíkulope?

³ Ñande nañañeorganisáirire ndaikatumoʼãi kuri ñakumpli la Jesús onkarga vaʼekue ñandéve (Mat. 28:​19, 20). Por ehémplo, noñeasignáirire peteĩ kongregasiónpe moõpa térã mbaʼe territóriopepa opredika vaʼerã, umi ermanokuéra ohóta kuri opredika oimehápe reíntema. Avei ikatu oĩ umi lugár térã território pyʼỹietereíma ojepredikahápe, péro ótro hendápe katu núnka ndojehói. ¿Mbaʼépepa nde ere ideprovechoha avei ñaime organisádo?

⁴ Ko tiémpope Jesús oorganisa Jehová puévlope, oorganisa haguéicha idisipulokuérape haʼe oĩrõ guare ko yvy ape ári. Ko artíkulope ñaanalisáta pe ehémplo omoĩ vaʼekue Jesús, ha mbaʼéichapa ñane organisasión ojapo avei upéicha koʼág̃arupi. Avei jahecháta mbaʼépa ikatu jajapo jahechauka hag̃ua ñakonfiaha Jehová organisasiónre.

ÑANE ORGANISASIÓN OSEGI JESÚS EHÉMPLO

5. ¿Mbaʼépa ikatu jajapo jasegi hag̃ua Jesús ehémplo? (Juan 8:28).

⁵ Jesús oaprende vaʼekue Itúagui mbaʼépa heʼi ha ojapo vaʼerã. Jehová organisasión osegi Jesús ehémplo ha oipuru Ñandejára Ñeʼẽ. Péicha ñanepytyvõ jaikuaa hag̃ua mbaʼépa la oĩ porãva ha la oĩ vaíva ha omeʼẽ ñandéve konsého jaikuaa hag̃ua mbaʼéichapa jaiko vaʼerã (elee Juan 8:28; 2 Tim. 3:​16, 17). Avei pyʼỹinte ñanemomanduʼa jalee vaʼerãha la Biblia ha jajapo vaʼerãha la heʼíva. ¿Mbaʼéichapa ñanevenefisia jajapóramo upéva?

6. ¿Mbaʼéichapa ñañevenefisia jastudiáramo la Biblia?

⁶ Tuichaiterei ñanevenefisia jastudiáramo la Biblia ñane puvlikasionkuéra rupive. Por ehémplo ikatu ñakompara la Biblia heʼíva ha umi konsého omeʼẽva ñandéve Jehová organisasión. Jahecha jave pe gía oñemeʼẽva ñandéve oñeguenohẽha la Bíbliagui, ñakonfiavétantema Jehová organisasiónre (Rom. 12:2).

7. ¿Mbaʼépa Jesús opredika vaʼekue, ha mbaʼéichapa Jehová organisasión osegi iñehémplo?

⁷ Jesús opredika vaʼekue “umi notísia porã oñeʼẽva Ñandejára Rréinore” (Luc. 4:​43, 44). Jesús omanda vaʼekue avei idisipulokuérape oñeʼẽ hag̃ua ótrope Ñandejára Rréinore (Luc. 9:​1, 2; 10:​8, 9). Koʼág̃arupi avei enterove oĩva Jehová organisasiónpe opredika umi notísia porã toiko oikohápe, ha orekóramo jepe heta rresponsavilida Jehová organisasiónpe.

8. ¿Mbaʼe priviléhiopa jareko?

⁸ Ñamombaʼeterei ningo ikatu haguére ñañeʼẽ ótrope Ñandejára Rréinore. Upéva ndahaʼéi hína peteĩ mbaʼe ikatúva enterove ojapo. Por ehémplo, Jesús oĩrõ guare ko yvy ape ári nopermitíri vaʼekue umi demóniope oñeʼẽ hérape (Luc. 4:41). Koʼág̃arupi peteĩ persóna osẽ hag̃ua opredika testígo de Jehovándi, oiko vaʼerã Jehová oipotaháicha. Ñande ñamombaʼeterei pe priviléhio jarekóva japredikávo. Upévare ñañeʼẽ Ñandejára Rréinore tahaʼe haʼehápe ha ikatúma guive. Jajoguasetereígui Jesúspe, ñañehaʼãmbaite japredika ha ñamboʼe ótrope la Biblia heʼíva (Mat. 13:​3, 23; 1 Cor. 3:6).

9. ¿Mbaʼéichapa ñane organisasión oikuaauka Ñandejára réra?

⁹ Jesús oikuaauka Ñandejára réra. Jesús oñemboʼérõ guare Itúape heʼi vaʼekue: “Che aikuaauka chupekuéra nde réra” (Juan 17:26). Ko tiémpope, Jehová organisasión osegi Jesús ehémplo ha ojapo opa ikatúva oipytyvõ hag̃ua la héntepe oikuaa hag̃ua Ñandejára réra. Upéva ojapo Ñandejára Ñeʼẽ La Biblia Traducción del Nuevo Mundo rupive. Ko traduksión omoĩ jey Ñandejára réra oĩ haguépe yma ojeskrivírõ guare Ñandejára Ñeʼẽ. Ko Biblia traduksión oĩ kompletoite térã en párte mas de 270 idiómape. Umi Informasión A4 ha A5 oĩva ko Bíbliape omombeʼu mbaʼérepa Ñandejára réra oñemoĩ jey umi lugár okorrespondehápe. Ha Apéndice C, oĩva Biblia de estúdio españólpe, omombeʼu heta mbaʼe ohechaukáva mbaʼérepa Ñandejára réra oĩ vaʼerã 237 vése Escrituras Griégaspe.

10. ¿Mbaʼépa reaprende peteĩ kuñakarai Myanmargua experiénsiagui?

¹⁰ Jesús ojapo haguéicha, ñande jaikuaaukase entérope Ñandejára réra. Myanmárpe, peteĩ kuñakarai orekóva 67 áño, omombeʼu ovyʼaiterei ha hesay pororopa hague oikuaárõ guare mbaʼéichapa héra Ñandejára. Haʼe heʼi: ‘Primera ves ahendu Ñandejára heraha Jehová. Peẽ ningo chemboʼe la iñimportantevéva che rekovépe’. Ko experiénsia ohechauka tuichaiterei mbaʼeha la héntepe g̃uarã oikuaa Ñandejára réra.

JASEGÍKENA ÑAKONFIA JEHOVÁ ORGANISASIÓNRE

11. ¿Mbaʼéichapa umi ansianokuéra ikatu ohechauka okonfiaha Jehová organisasiónre? (Ehecha pe taʼanga).

¹¹ ¿Mbaʼéichapa umi ansianokuéra ikatu ohechauka okonfiaha Jehová organisasiónre? Orresivi jave hikuái umi instruksión, tekotevẽ olee porã ha oñehaʼãmbaite ojapo la heʼíva umíva. Por ehémplo, chupekuéra oñemeʼẽ instruksión heʼíva mbaʼéichapa ojejapo vaʼerã umi asignasión ha orasión rreunionhápe, péro avei ojeʼe chupekuéra mbaʼéichapa okuida vaʼerã Jesucristo ovechakuérare. Umi ansianokuéra osegi jave kompletoite umi instruksión, umi ermáno ha ermanakuéra oñandu Jehová ohayhuha chupekuéra ha okuidaha hesekuéra.

12. a) ¿Mbaʼérepa jasegi vaʼerã umi instruksión omeʼẽva umi ansiáno? (Hebreos 13:​7, 17). b) ¿Mbaʼérepa jajesareko vaʼerã umi mbaʼe porã ojapóvare umi ansiáno?

¹² ¿Mbaʼépa jajapo vaʼerã umi ansianokuéra omog̃uahẽ jave ñandéve umi instruksión? Kyreʼỹme jasegi vaʼerã. Jajapóramo upéicha, ifasilvéta chupekuéra okumpli hag̃ua pe rresponsavilida orekóva hikuái. La Biblia ñanemokyreʼỹ voi ‘ñaneñeʼẽrendu ha ñañemoĩ hag̃ua umi ñandegiáva poguýpe’ (elee Hebreos 13:​7, 17). Upéva sapyʼánte ikatu ijetuʼu pórke umi ansiáno iñimperfékto avei. Péro jajesarekóramo umi idefektokuérarente ha ndajahechakuaái umi mbaʼe porã ojapóva hikuái, jajapóta hína la ñane enemigokuéra oipotáva. ¿Mbaʼérepa jaʼe upéva? Pórke ñapensáramo ivaíva umi ansiánore, ikatu hína upéi jaju ñadeskonfia Jehová organisasióngui. Ha upéva voi hína la ñane enemigokuéra oipotáva oiko. ¿Péro mbaʼépa ikatu jajapo ani hag̃ua ñanembotavy umi ñane enemigokuéra?

ANÍKENA JAHEJA AVAVE ÑANEMODESKONFIA

13. ¿Mbaʼéichapa Ñandejára enemigokuéra oheja vaise Jehová organisasiónpe?

¹³ Ñandejára enemigokuéra oheja vaise Jehová organisasiónpe, upévare oipota oñepensa vai umi mbaʼe porã ojapóvare. Por ehémplo, la Biblia rupive ñaaprende Jehová oipotaha ñanepotĩ, ñande reko porã ha jaadora chupe haʼe oipotaháicha. Haʼe heʼi oimeraẽ osegíva ojapo ivaíva ha nokambiaséiva, oñemosẽ vaʼerãha kongregasióngui (1 Cor. 5:​11-13; 6:​9, 10). Ñaneñeʼẽrendu rupi koʼã mbaʼépe, umi ñane enemigokuéra heʼi ñanderehe ndajahayhuiha ñande rapichakuérape, ñakondenaha chupekuéra, ha ndajaipotaiha oĩ ñande apytépe ni peteĩ idiferénteva ñandehegui.

14. ¿Mávapa hína la oikóva omosarambi japu Jehová organisasión kóntrape?

¹⁴ Jaikuaa porã mávapa la ñandeatakáva. Satanás la omosarambíva umi japu Jehová organisasión kóntrape, pórke haʼe hína “pe japu ruvicha” (Juan 8:44; Gén. 3:​1-5). Upévare nañanesorprendéi vaʼerã Satanás ojevaleha algúnore omosarambi hag̃ua umi japu. Upéva voi la haʼe ojapo vaʼekue Jesús ha umi kristiáno ypykue kóntrape.

15. ¿Mbaʼépa umi líder rrelihióso ojapo vaʼekue Jesús ha umi kristianokuéra kóntrape?

¹⁵ Jesús ningo Ñandejára Raʼy perfékto, ha ojapo vaʼekue heta milágro oĩrõ guare ko yvy ape ári. Upéicharõ jepe, Satanás ojevale unas kuánta persónare omosarambi hag̃ua heta japu ikóntrape. Por ehémplo umi líder rrelihióso heʼi la héntepe Jesús omosẽha umi demóniope, pórke omeʼẽ chupe podér “umi demónio ruvicha” (Mar. 3:22). Upéi Jesúspe ojehusgárõ guare, umi líder rrelihióso heʼi hese oñeʼẽ vai hague Ñandejárare, ha omboliga umi héntepe ojerure hag̃ua tojejuka chupe (Mat. 27:20). Tiémpo rire, Cristo segidorkuéra opredika umi notísia porã, ha umi oñemoĩva ikontrapekuéra ‘omboliga umi héntepe ndaijaʼéi’ ha opersegi hag̃ua koʼã kristianokuérape (Hech. 14:​2, 19). Rrevísta La Atalaya del 1 de diciembre de 1998 oñeʼẽ Hechos 14:2 rehe, ha heʼi: “Umi judío oñemoĩ vaʼekue umi kristianokuéra kóntrape, ndahaʼéi vaʼekue orrechasánteva umi notísia porã, síno oñepyrũ voi omosarambi heta japu ikatu hag̃uáicha umi hénte ótro paisgua oñemoĩ avei umi kristianokuéra kóntrape”.

16. ¿Mbaʼérepa ñanemanduʼa vaʼerã ñahendu jave umi japu oñemosarambíva?

¹⁶ Satanás siémpre osegi ijapu, ha koʼág̃a peve “ombotavy ko múndo kompletoitépe” (Apoc. 12:9). Sapyʼánte ikatu ñahendu oĩha omosarambíva álgo Jehová organisasión kóntrape térã umi ermanokuéra ñandedirihíva kóntrape. Upéicha jave, ñanemanduʼákena mbaʼéichapa Ñandejára enemigokuéra otrata vaʼekue Jesús ha idisipulokuérape. La Bíbliape heʼihaichaite voi, koʼág̃arupi ojepersegi umi oservívape Jehovápe ha oñemosarambi heta japu ikontrapekuéra (Mat. 5:​11, 12). Umi ñane enemigokuéra ndaikatumoʼãi ñanembotavy, ñanemanduʼáramo mávaguipa ou hína umi japu ha pyaʼe jajeprotehéramo. ¿Mbaʼépa ikatu jajapo jajeprotehe hag̃ua?

17. ¿Mbaʼépa ikatu jajapo jarrechasaite hag̃ua umi japu? (2 Timoteo 1:13). (Ehecha pe rrekuádro “¿Mbaʼépa ikatu jajapo ñahendu jave umi informasión japu?”).

¹⁷ Jarrechasaitékena umi japu oñemosarambíva. Apóstol Pablo heʼi porã vaʼekue mbaʼépa jajapo vaʼerã ñahendúramo umi japu oñemosarambíva hína. Haʼe heʼi vaʼekue Timotéope ‘oñemoñeʼẽ mbarete hag̃ua unos kuántope anivéma hag̃ua oiko opena hikuái umi kuénto reíre’ ha ‘ani hag̃ua ohendu umi kuénto japu oheja vaíva Ñandejárape’ (1 Tim. 1:​3, 4; 4:7). Ñapensamíntena ko situasiónre: Peteĩ veveʼi ningo sapyʼánte ojagarrántema omoinge ijurúpe oimeraẽ mbaʼe kyʼa otopáva yvýpe. Péro peteĩ persóna okakuaapámava núnka ndojapomoʼãi upéva, pórke ontende ikatuha ojapo vai hese. Upéicha avei ñande jarrechasa umi kuénto rei oñemosarambíva, pórke jaikuaa mávaguipa ou hína umi japu. Upéva rangue, ñahendu sólamente “umi enseñánsa iporãva” (elee 2 Timoteo 1:13).

18. ¿Mbaʼéichapa ikatu jahechauka ñamombaʼeha Jehová organisasión?

¹⁸ Ko artíkulope jahecha mbohapy mbaʼe ojapóva Jehová organisasión osegi hag̃ua Jesús ehémplo, péro jaikuaa ndahaʼeiha umívante la ojapóva. Jasegívo jastudia la Biblia jahechakuaáta mbaʼe mbaʼépa Jehová organisasión ojapove osegi hag̃ua Jesús ehémplo. Ñaipytyvõkena ótrope kongregasiónpe okonfiave hag̃ua Jehová organisasiónre. Jasegíkena jaservi Jehovápe fiélmente ha ani jaheja mbaʼeve ñanemomombyry pe organisasión haʼe oipurúvagui okumpli hag̃ua ivolunta (Sal. 37:28). Jehová organisasiónpe enterove ojoayhu ha oservi chupe fiélmente. Siémprekena ñamombaʼe ha jaagradese ñaime haguére iñorganisasiónpe.