VIVLIOTÉKA OĨVA INTERNÉTPE Watchtower
Watchtower
VIVLIOTÉKA OĨVA INTERNÉTPE
guarani
ã
  • ã
  • ẽ
  • ĩ
  • õ
  • ũ
  • ỹ
  • g̃
  • ʼ
  • ñ
  • BIBLIA
  • PUVLIKASIONKUÉRA
  • RREUNIONKUÉRA
  • w25 junio páh. 14-19
  • Ñarrekonosékena oĩha umi mbaʼe ndajaikuaáiva

Ko párte ndorekói gueteri ni peteĩ vidéo.

Rombyasyeténgo, péro ndaikatúi ojehechauka ko vidéo.

  • Ñarrekonosékena oĩha umi mbaʼe ndajaikuaáiva
  • Ñemañaha. Oanunsia Jehová Goviérno (ojestudiáva) 2025
  • Subtítulo
  • Informasión oñeʼẽva avei ko témare
  • NDAJAIKUAÁI ARAKAʼÉPA OÑEHUNDÍTA KO MÚNDO AÑA
  • NDAJAIKUAÁI UMI MBAʼE JEHOVÁ IKATÚVA OJAPO
  • NDAJAIKUAÁI MBAʼÉPA OIKÓTA KOʼẼRÕ
  • NDAIKATÚI ÑANTENDEPA MBAʼEICHAITE PEVÉPA JEHOVÁ ÑANDEKUAA
  • Ñakonfia Jehováre jadesidíta jave
    Mbaʼéichapa Jaiko ha Japredika vaʼerã 2023
  • Aníkena ñanderesarái Jehová haʼeha “Ñandejára oikovéva”
    Ñemañaha. Oanunsia Jehová Goviérno (ojestudiáva) 2024
  • ¿Mbaʼéichapa Jehová oporohusgáta koʼẽrõite?
    Ñemañaha. Oanunsia Jehová Goviérno (ojestudiáva) 2024
  • ¿Mbaʼépa ñaaprende la heʼi vaʼekuégui ipahaitépe umi kuimbaʼe ifiélva?
    Ñemañaha. Oanunsia Jehová Goviérno (ojestudiáva) 2024
Oĩve informasión
Ñemañaha. Oanunsia Jehová Goviérno (ojestudiáva) 2025
w25 junio páh. 14-19

ARTÍKULO OJESTUDIÁVA 26

PURAHÉI 123 Ñañemoĩkena Jehová poguýpe

Ñarrekonosékena oĩha umi mbaʼe ndajaikuaáiva

“Ñande ndaikatúi ñantendepa umi mbaʼe ojapóva Ñandejára Todopoderóso” (JOB 37:23).

¿MBAʼÉPA ÑAAPRENDÉTA?

Jahecháta oĩha umi mbaʼe ndajaikuaáiva mbaʼeichaitépa oikóta. Upéicharamo jepe ikatu hína ñaaguanta umi situasión ijetuʼúva ñapensáramo umi mbaʼe si jaikuaávare ha ñakonfiáramo Jehováre.

1. ¿Mbaʼéichapa Jehová ñandeapo vaʼekue ha mbaʼérepa?

JEHOVÁ ningo ñandeapo porãiterei. Ñande ikatu ñapensa, ñaaprende heta mbaʼe pyahu ha ñantende mbaʼéichapa ikatu jajapo la ñaaprendéva. ¿Mbaʼérepa Jehová ñandeapo vaʼekue péicha? Pórke oipota ‘jaikuaa porã chupe’ ha avei oipota jaipuru ñane akã ha ñane pensamiénto jaservi hag̃ua chupe (Prov. 2:​1-5; Rom. 12:1).

2. a) ¿Mbaʼépa tekotevẽ ñarrekonose? (Job 37:​23, 24). (Ehecha pe taʼanga). b) ¿Mbaʼérepa iñimportánte jaasepta ndaikatuiha jaikuaa entéro mbaʼe?

2 Ñande ningo ikatu ñaaprende umi mbaʼe pyahu, péro ñarrekonose vaʼerã oĩha hetaiterei mbaʼe ndajaikuaapáiva (elee Job 37:​23, 24). Ñanemanduʼamína Job rehe. Jehová oporandu vaʼekue chupe heta mbaʼe, ha upérõ Job opilla heta mbaʼe ndoikuaái hague. Job oñeʼẽ rire Jehovándi ohechakuaa vaʼekue tekotevẽha iñumílde ha okambia opensa lája (Job 42:​3-6). Ñandéve avei ou porãitereíta ñarrekonoséramo ndaikatuiha jaikuaapa opa mbaʼe. Upéva ñanepytyvõta ñaneumílde hag̃ua ha ñakonfiáta Jehová oikuaaukataha ñandéve la legálmente tekotevẽva jaikuaa jadesidi porã hag̃ua (Prov. 2:6).

Yvága guive, umi arai mbytépe peteĩ lus omimbi Job rehe, upe aja Jehová oñeʼẽ chupe. Upépe oĩ avei Elihú ha umi mbohapy Job amígo guaʼu, haʼekuéra oĩ ag̃ui ha ohecha la oikóva.

Job orrekonose vaʼekue ndoikuaaiha heta mbaʼe. Tuicha ou porãta ñandéve jajapóramo avei upéva (Ehecha párrafo 2)


3. ¿Mbaʼépa jahecháta ko artíkulope?

3 Ko artíkulope jahecháta unas kuánta kósa ñande ndajaikuaáiva ha mbaʼérepa sapyʼánte upéva ikatu ijetuʼu ñandéve. Avei jahecháta mbaʼérepa iporã ndajaikuaáinte heta mbaʼe. La ñaaprendéva ko artíkulope ñanepytyvõta ani hag̃ua jaduda Jehová oikuaaukataha ñandéve umi mbaʼe tekotevẽva jaikuaa. Haʼe ningo “upe oikuaáva opaite mbaʼe” (Job 37:16).

NDAJAIKUAÁI ARAKAʼÉPA OÑEHUNDÍTA KO MÚNDO AÑA

4. Ohechaukaháicha Mateo 24:​36, ¿mbaʼépa ñande ndajaikuaái?

4 (Elee Mateo 24:36). Ñande ndajaikuaái arakaʼépa ko múndo aña oñehundíta. Jesús jepe oĩrõ guare ko yvy ape ári ndoikuaái vaʼekue “ni pe óra ni pe día”.a Tiémpo rire haʼe heʼi vaʼekue ijapostolkuérape Jehová añoite orekoha “pe autorida heʼi hag̃ua mbaʼe tiémpopepa oikóta umi mbaʼe” (Hech. 1:​6, 7). Jehová ningo odesidíma mbaʼe tiémpopepa oúta pe fin, péro ñande ndaikatúi jaikuaa arakaʼetépa oikóta upéva.

5. Ndajaikuaái rupi arakaʼetépa oúta pe fin, ¿mbaʼépa sapyʼánte ikatu oiko ñanderehe?

5 Jahechaháicha ñande ndajaikuaái mboýpa gueteri ñahaʼarõta ou peve pe fin. Upéicha rupi ikatu jaju nañanepasiensiavéi ha ñañedesanima, koʼýte oimérõ heta tiémporema ñahaʼarõ ou Jehová ára. Ikatu ningo ñañedesanima oimérõ oĩ ñane hénte térã ótra persóna oñembohorýva ñanderehe ndoúi haguére gueteri pe fin (2 Ped. 3:​3, 4). Ikatu voi sapyʼánte ñapensa: “Che aikuaáramo mbaʼe diaitépa oúta pe fin, ifasilvéta chéve ahaʼarõ hag̃ua ha aaguanta porãvéta oĩ jave oñembohorýva cherehe”.

6. ¿Mbaʼérepa iporã ndajaikuaáinte arakaʼetépa og̃uahẽta pe fin?

6 Jehová nomombeʼúivo ñandéve arakaʼetépa og̃uahẽta pe fin, omeʼẽ ñandéve la oportunida jahechauka hag̃ua jaserviha chupe jahayhúgui chupe ha jajeroviágui hese. Ñande ndajaservíri Jehovápe peteĩ fécha pevénte, síno ñamombaʼeguasuse chupe opa ára g̃uarã. Upévare jaiko rangue ñapensaiterei arakaʼetépa og̃uahẽta ‘Jehová ára’, iporãve jajepyʼamongeta umi mbaʼe porã ojehupytýtavare pe día og̃uahẽ vove. Péicha jasegíta ñañemoag̃uive Ñandejárare, ñakonfiáta hese ha jajapóta opa ikatúva haʼe ñandeguerohory hag̃ua (2 Ped. 3:​11, 12).

7. ¿Mbaʼépa si jaikuaa?

7 Iñimportanteterei ñapensa umi mbaʼe si jaikuaávare. Por ehémplo ñande jaikuaa umi ára paha oñepyrũ hague áño 1914-pe. La Biblia rupive Jehová oikuaauka ñandéve umi profesía ohechaukáva upe áño guive oñepyrũ hague umi ára paha. Péro ndahaʼéi upévante, avei Jehová omombeʼu ñandéve mbaʼe mbaʼépa oikóta kuri ko múndope upe áño guive. Jahechávo oñekumpliha umi profesía ndajadudái ‘hiʼag̃uimbaitemaha Jehová ára guasu’ (Sof. 1:14). Avei jaikuaa mbaʼépa Jehová oipota jajapo. Haʼe oipota ñamombeʼu umi “notísia porã oñeʼẽva Ñandejára Rréinore” ikatumívape guive (Mat. 24:14). Ko notísia porã oñemombeʼu hína amo 240 paíspe rupi, mas de 1.000 idiómape. Añetehápe natekotevẽi jaikuaa “ni pe óra ni pe día” japredika kyreʼỹ hag̃ua.

NDAJAIKUAÁI UMI MBAʼE JEHOVÁ IKATÚVA OJAPO

8. ¿Mbaʼépa heʼise pe fráse “umi mbaʼe Ñandejára ojapóva” oĩva Eclesiastés 11:​5-pe?

8 Ñande ningo ndahaʼéi ku siémpre jaikuaáva “umi mbaʼe Ñandejára ojapóva” (elee Eclesiastés 11:5). Ko téxtope oñeñeʼẽvo ‘umi mbaʼe Ñandejára ojapóvare’, ¿mbaʼépa heʼise? Ohechauka Jehová voi oñenkargaha oiko hag̃ua álgo térã opermitiha oiko upéva ikatu hag̃uáicha oñekumpli ivolunta. Ñande ndajaikuaapái mbaʼérepa sapyʼánte Jehová oheja oiko peteĩ mbaʼe térã mbaʼeichaitépa haʼe ñanepytyvõta (Sal. 37:5). La Biblia heʼi ndaikatuiha ñantende umi mbaʼe Ñandejára ojapóva ndajaikuaaháicha avei mbaʼéichapa oñeforma peteĩ mitã isy retepýpe. Koʼág̃a peve umi sientífiko ndaikatúi gueteri ontendepa upéva. Péicha avei ñande ndaikatúi ñantendepaite mbaʼéichapa Jehová ojapóta heta mbaʼe.

9. Ndajaikuaapái rupi umi mbaʼe Jehová ojapótava, ¿mbaʼéichapa ikatu sapyʼánte ñañeñandu?

9 Ndajaikuaái rupi mbaʼeichaitépa Jehová ñanepytyvõta, upéva ikatu ñandejoko jadesidi hag̃ua peteĩ mbaʼe. Ikatu jaduda jajapo hag̃ua umi sakrifísio ñanepytyvõtava japredikave hag̃ua. Por ehémplo jaiko sensillove térã java hag̃ua oĩvehápe nesesida. Térã ikatu jaju ñapensa Jehová nañandeguerohorýigui nosẽiha ñandéve heta mbaʼe ñahaʼarõ haguéicha. Ikatu oime nañakumplíri hína peteĩ méta, térã ndajahupytýi heta mbaʼe predikasiónpe ñañehaʼãmbaitérõ jepe. Ikatu oime avei jareko peteĩ asignasión Jehová organisasiónpe péro oñepresenta heta provléma jajapo hag̃ua. Oikórõ koʼã mbaʼe ikatu jaju ñapensa Jehová nañanepytyvõiha.

10. Ndajaikuaái rupi mbaʼeichaitépa Jehová ñanepytyvõta, ¿mbaʼéichapa upéva ou porã ñandéve?

10 ¿Mbaʼéichapa ou porã ñandéve la ndajaikuaái mbaʼeichaitépa Jehová ñanepytyvõta? Upéva rupive ikatu jareko umi kualida iporãva, por ehémplo ñaneumílde hag̃ua. Avei ñarrekonose Jehová opensáva siémpre iporãvetaha la ñande ñapensávagui (Is. 55:​8, 9). Ñanepytyvõ avei jajeroviave hag̃ua Jehováre ha ñakonfia hag̃ua haʼe rupivémante ñasẽ porãtaha. Jahupyty jave umi mbaʼe iporãva predikasiónpe térã oimeraẽ ótra asignasiónpe, ñamombaʼeguasu Jehovápe jaikuaágui haʼe ñanepytyvõ hague (Sal. 127:1; 1 Cor. 3:7). Péro oimérõ nosẽi peteĩ mbaʼe ñande ñahaʼarõ haguéicha, jasegi vaʼerã ñanemanduʼa Jehová orekoha entéro mbaʼe ipoguýpe (Is. 26:12). Ñande jasegínte vaʼerã jajapo ñande párte ha jasegi jajerovia Jehová ñanepytyvõtaha. Ndajadudái haʼe ñandegiataha ndojapóiramo jepe ñanderehehápe peteĩ milágro ojapo haguéicha yma isiervokuéra rehehápe (Hech. 16:​6-10).

11. ¿Mbaʼe iñimportántevapa jaikuaa?

11 Ñande si jaikuaa Jehová siémpre oporohayhu, ihústo ha iñaranduha. Avei ñaĩ segúro haʼe omombaʼetereiha la jajapóva chupe g̃uarã ha ñande ermanokuérape g̃uarã, ha jaikuaa Jehová siémpre omyengovia porãha umi ifiélvape chupe (Heb. 11:6).

NDAJAIKUAÁI MBAʼÉPA OIKÓTA KOʼẼRÕ

12. Ohechaukaháicha Santiago 4:​13, 14, ¿mbaʼépa ndajaikuaái?

12 (Elee Santiago 4:​13, 14). Ñande ndajaikuaái mbaʼépa oikóta ñandehegui koʼẽrõ. Ko múndope ikatu ‘jahasa peteĩ tiémpo ijetuʼúvare térã ñanderupyty umi desgrásia ñahaʼarõʼỹve jave’ (Ecl. 9:11). Upéicha rupi ndajaikuaái osẽtapa ñandéve umi mbaʼe ñaplaneáva ni jaikovétapa jajapopa hag̃ua umíva.

13. ¿Mbaʼéichapa sapyʼánte ikatu ñañeñandu ndajaikuaáigui la oikótava ñane renonderãme?

13 Sapyʼánte ikatu ijetuʼu ñandéve jasegi ñaaguanta ndajaikuaáigui mbaʼépa oikóta ñane renonderãme. Ikatu jaju ndajavyʼavéi pórke ñañekevrantaiterei la ikatúvare oiko. Ikatu ñañembyasyeterei ha ñarrenega voi oikórõ derrepentete ñanderehe álgo ivaíva, térã oñepresentárõ peteĩ mbaʼe ni michĩmi nañahaʼarõi vaʼekue. Avei ikatu jaju ñañedesanima noñekumplíriramo peteĩ mbaʼe ñahaʼarõiterei vaʼekue (Prov. 13:12).

14. ¿Mbaʼéichapa ikatu javyʼa añete? (Ehecha pe taʼanga).

14 Jasegíramo ñaaguanta umi mbaʼe ijetuʼúva jahechauka hína toiko la oikóva jasegitaha jaservi Jehovápe jahayhu rupi chupe. La Biblia ohechauka ndaikatuiha ñahaʼarõ Jehová ñandeprotehetaha opa mbaʼe vaígui. Ñandejára Ñeʼẽ avei ñanemboʼe Jehová ndoikoiha odesidi de antemáno mbaʼépa oikóta ñanderehe. Haʼe ningo oikuaa ikatuha javyʼa ndajaikuaapáiramo jepe umi mbaʼe oikótava ñane renonderãme. ¿Mbaʼéichapa upéicharõ ikatu javyʼa? Javyʼa añetéta jahejáramo Jehová ñandegia ha ñaneñeʼẽrendúramo chupe (Jer. 10:23). Jarekóramo enkuénta Jehovápe jadesidíta jave peteĩ mbaʼe ndajaikomoʼãi ñañekevrantaiterei, síno jaʼéta Santiago heʼi haguéicha: “Jehová oipotáramo jaikovéta, ha jajapóta péva ha amóva” (Sant. 4:15).

Taʼanga: 1. Peteĩ túa oprepara itaʼýrandi imochíla de emerhénsia. Haʼekuéra omoĩ pe mochílape peteĩ Biblia ha umi ambue mbaʼe oikotevẽtava. 2. Pe túa, hembireko ha itaʼýra oñemoʼã peteĩ kárpa guýpe oky aja. Haʼekuéra oipuru umi mbaʼe oguerekóva imochíla de emerhénsiape.

Ikatu jajeprotehe jasegíramo Jehová gía ha ñaneñeʼẽrendúramo chupe (Ehecha párrafo 14 ha 15)b


15. ¿Mbaʼépa si jaikuaa oikotaha amo gotyove?

15 Ndajaikuaái mbaʼépa ikatu oiko káda día, péro si jaikuaa Jehová oprometeha ñandéve jaikovetaha pára siémpre tahaʼe ko yvy ape ári térã yvágape. Avei ñaĩ segúro haʼe ndaijapuiha ha ndaiporiha mbaʼeve ikatúva ojoko chupe okumpli hag̃ua ipromesakuéra (Tito 1:2). Jehová añoite ‘omombeʼúma mbaʼéichapa opáta peteĩ mbaʼe ha ymaite guive oprofetisa vaʼekue umi mbaʼe neʼĩrava oiko’. Entéro umi mbaʼe haʼe heʼi vaʼekue oikotaha yma, oñekumplipaitéma ha upeichaite avei oñekumplíta umi mbaʼe heʼíva oikotaha amo gotyove (Is. 46:10). Avei jaikuaa ndaiporiha mbaʼeve ojokótava Jehovápe osegi hag̃ua ñanderayhu (Rom. 8:​35-39). Haʼe ñanemoarandúta, ñanekonsoláta ha ñanemombaretéta ñaikotevẽhaichaite tahaʼe haʼéva la oikóva ñanderehe. Jehová katuete ñanepytyvõta ha ñanevendesíta (Jer. 17:​7, 8).

NDAIKATÚI ÑANTENDEPA MBAʼEICHAITE PEVÉPA JEHOVÁ ÑANDEKUAA

16. Ohechaukaháicha Salmo 139:​1-6, ¿mbaʼépa ñande ndaikatúi ñantendepa?

16 (Elee Salmo 139:​1-6). Ñande Apohare oikuaa entéro mbaʼe ñandehegui, ndaipóri mbaʼeve okañýva chugui. Haʼe ontende mbaʼérepa ñañeñandu ñañeñanduháicha ha mbaʼérepa ñapensa ñapensaháicha. Jehová oikuaa umi mbaʼe jaʼéva ha jarekóva ñande pyʼapýpe. Avei oikuaa entéro mbaʼe jajapóva ha ontende mbaʼérepa jajapo umíva. Rréi David ohechakuaa vaʼekue voi Jehová ñanemoʼãha opáguio ládo ha siémpre oĩha ñanepytyvõ hag̃ua. ¿Mbaʼéichapa reñeñandu reikuaávo peichaite peve oñeinteresaha nderehe Ñandejára ogovernáva opa mbaʼe ha pe Todopoderóso okrea vaʼekue opa mbaʼe? Ñande avei ikatu jaʼe David heʼi haguéicha: “Ñandejára, nde ningo chekuaa porã ha upéva iporãiterei, ha ndaikatúi antende, yvateterei oĩ chehegui ha ndaikatúi ahupyty” (Sal. 139:6).

17. ¿Mbaʼérepa sapyʼánte ikatu ijetuʼu ñandéve jarovia Jehová ñandekuaa porãitereiha?

17 Ñarrekonose vaʼerã ikatuha ñandeafekta umi mbaʼe jahasa vaʼekue ñane famíliape, la oñepensa lája pe jaikohápe, térã umi mbaʼe jaguerovia vaʼekue ñaaprende mboyve la Biblia heʼíva. ¿Mbaʼérepa jaʼe upéicha? Por ehémplo ikatu ijetuʼu ñandéve jaguerovia Jehová haʼeha peteĩ Túa ñanderayhúva ha oñeinteresáva ñanderehe. Ha oimérõ jajavy rakaʼe yma, ikatu ñapensa Jehová ndoikuaasemoʼãiha peteĩ persóna péicha hembiapo vai vaʼekuépe ha noñemoag̃uisemoʼãiha ñanderehe. Rréi David jepe oñeñandu vaʼekue péicha sapyʼánte (Sal. 38:​18, 21). Ha oimérõ peteĩ persóna oñehaʼãmbaite okambia Jehová oguerohory hag̃ua chupe, ikatu sapyʼánte haʼe oñeporandu: “La oimérõ Jehová chekuaa porãiterei, ¿mbaʼére piko ojerure chéve aheja hag̃ua peteĩ mbaʼe ijetuʼuetéva chéve?”.

18. ¿Mbaʼérepa iñimportánte jaasepta Jehová ñandekuaa porãitereiha? (Ehecha pe taʼanga).

18 Ñañehaʼã vaʼerã jaasepta ndaiporiha ñandekuaa porãvéva Jehovágui, ni ñande ndajajekuaái la haʼe ñandekuaaháicha. Avei ñañehaʼã vaʼerã jaguerovia Jehová ohechaha iporãva ñanderehe, haʼe ohecha umi mbaʼe ni ñande ndajahechakuaáiva ñandejehe. Avei Jehová ohecha umi ñande defékto ha ontende umi mbaʼe ñañandúva ha jajapóva, péro oikuaa avei ikatuha ñakambia ha mborayhúpe ñanepytyvõse (Rom. 7:15). Jehová oikuaa mbaʼeichagua persónapa ikatu oiko ñandehegui ha umi mbaʼe porã ikatúva jajapo. Ñanemanduʼa memérõ upévare, jarekóta la fuérsa jaservi hag̃ua Jehovápe fiélmente ha vyʼápe.

Taʼanga: 1. Peteĩ ermáno oñedesanimáva omaña peteĩ ventána rupi. Upe díape oky ha ijaraipa. 2. Upéi pe ermáno oĩma paraísope, haʼe ojepasea iñamigokuérandi ha odisfruta umi paisáhe porã porã.

Jehová ñanepytyvõ jaguerovia mbarete hag̃ua koʼẽrõitéma jaikotaha vyʼápe múndo pyahúpe. Péicha ikatu ñaaguanta umi provléma oñepresentáva ñahaʼarõʼỹve jave (Ehecha párrafo 18 ha 19)c


19. ¿Mbaʼépa avei jaikuaa?

19 Ñandejára ningo mborayhu. Ñande jaikuaa ndaiporiha jaduda hag̃ua upévagui (1 Juan 4:8). Avei jaikuaa umi mbaʼe omandáva ñandéve ohechaukaha haʼe ñanderayhuha ha siémpre oipotaha la iporãvéva ñandéve g̃uarã. Ñaĩ segúro Jehová oipotaha jaiko pára siémpre, upévare voi omeʼẽ pe rreskáte. Jesús omano rupi ñanderehehápe, ñande ikatu jaservi Jehovápe haʼe oipotaháicha ñaneimperféktoramo jepe (Rom. 7:​24, 25). Avei jaikuaa “Ñandejára tuichaveha ñane korasõgui ha oikuaaha entéro mbaʼe” (1 Juan 3:​19, 20). Ndaipóri mbaʼeve Jehová oikuaaʼỹva ñandehegui ha haʼe ndodudái ikatuha jajapo ivolunta.

20. ¿Mbaʼépa jajapo vaʼerã ani hag̃ua jajepyʼapyeterei la ndajaikuaáivare?

20 Jehová oikuaauka ñandéve entéro mbaʼe tekotevẽva jaikuaa, upévare natekotevẽi jajepyʼapyeterei umi mbaʼe ndajaikuaáivare. Upéva rangue, jajesarekókena umi mbaʼe iñimportántevare, péicha jahechaukáta jajeroviaha Jehováre ñande pyʼaite guive. Haʼe hína upe ‘oikuaáva opaite mbaʼe’ (Job 36:4). Oĩramo jepe heta mbaʼe nañantendepáiva koʼág̃a, jaikuaa Jehová osegitaha ñanemboʼe heta mbaʼe pára siémpre. Upévare javyʼaiterei pórke opa árare ñaaprendéta heta mbaʼe Ñandejára tuichaitévagui (Ecl. 3:11).

¿MBAʼÉICHAPA RERRESPONDÉTA?

  • ¿Mbaʼérepa ou porã ñandéve la ndajaikuaái arakaʼetépa oúta pe fin?

  • ¿Mbaʼérepa natekotevẽi jaikuaa la oikótava koʼẽrõ javyʼa añete hag̃ua?

  • ¿Mbaʼérepa ideprovécho ñandéve jaasepta Jehová ñandekuaa porãitereiha?

PURAHÉI 104 Ñandejára omeʼẽ ijespíritu sánto

a Jesús omoakãta pe gérra oñeñorairõtahápe Satanás múndo kóntrape. Upévare ikatu jaʼe Jesús koʼág̃a oikuaamaha arakaʼetépa oñepyrũta pe Armagedón ha arakaʼépa ‘okompletáta iñorairõ’ (Apoc. 6:2; 19:​11-16).

b JAHECHÁVA PE TAʼANGÁPE: Peteĩ túa oprepara itaʼýrandi pe mochíla de emerhénsia ikatu hag̃uáicha ifamília oĩ preparádo oikóramo g̃uarã peteĩ mbaʼe ivaíva.

c JAHECHÁVA PE TAʼANGÁPE: Peteĩ ermáno ohasáva hína peteĩ situasión ijetuʼúva opensa mbaʼeichaitépa ovyʼáta pe múndo pyahúpe.

    Guaranimegua puvlikasionkuéra (2000-2025)
    Emboty sesión
    Emoñepyrũ sesión
    • guarani
    • Ekomparti
    • Configuración
    • Copyright © 2025 Watch Tower Bible and Tract Society of Pennsylvania
    • Ojejeruréva reipuru hag̃ua
    • Política de privacidad
    • Privacidad
    • JW.ORG
    • Emoñepyrũ sesión
    Ekomparti