Aníkena ñaimoʼã Jehová ndaikatumoʼãiha ñanepytyvõ

1. ¿Mbaʼéichapa Moisés ohechauka vaʼekue ojeroviaha Jehováre?

LÍVRO de Hebréospe oñeñeʼẽ unos kuánto Ñandejára siérvo ojerovia vaʼekuére Jehováre. Umíva apytépe oĩ vaʼekue Moisés. Haʼe ningo ijerovia mbarete vaʼekue (Heb. 3:​2-5; 11:​23-25). Moisés ohechauka vaʼekue upéva oipytyvõrõ guare umi israelítape osẽ hag̃ua Egíptogui. Haʼe ndokyhyjéi vaʼekue Faraóngui ni ijehérsitogui. Upéva rangue ojerovia vaʼekue Jehováre ha oipytyvõ umi israelítape ohasa hag̃ua pe Mar Rojo ha upéi ogia chupekuéra pe desiértope (Heb. 11:​27-29). La majoría umi israelita oñepyrũ opensa Jehová ndaikatumoʼãiha okuida hesekuéra. Péro Moisés nopensái vaʼekue upéicha, síno osegi ojerovia Jehováre. ¿Ojavýpa raʼe Moisés okonfiárõ guare Jehováre? Nahániri. Pe desiértope ndaipóri vaʼekue mbaʼevete, péro Jehová omeʼẽ vaʼekue umi israelítape tembiʼu ha y oikove hag̃ua (Éx. 15:​22-25; Sal. 78:​23-25).a

2. ¿Mbaʼérepa Ñandejára oporandu vaʼekue Moiséspe la jatopáva Números 11:​23-pe? (Números 11:​21-23).

² Jahechaháicha Moisés ojerovia mbarete vaʼekue. Péro un áñorupi Jehová onohẽ rire umi israelítape Egíptogui, Moisés oñeporandu Jehovápa ikatúta omeʼẽ chupekuéra soʼo opromete haguéicha. Haʼekuéra ningo hetaiterei vaʼekue. Upévare Moisés ndaikatúi vaʼekue oñeimahina mbaʼéichapa Jehová omeʼẽmbáta chupekuéra tembiʼu okaru hag̃ua hyg̃uatãha meve. Upémarõ Jehová oporandu Moiséspe: “¿Nde piko reimoʼã Jehová ndaikatumoʼãiha mbaʼe ojapo upéva?” (elee Números 11:​21-23). Ko téxtope idióma hebréope heʼi “Jehová po”, upéva ojepuru oñeñeʼẽ hag̃ua Ñandejára espíritu sántore térã pe podér haʼe oipurúva ojapo hag̃ua ivolunta.

3. ¿Mbaʼérepa iñimportánte vaʼerã ñandéve g̃uarã la oiko vaʼekue Moisés ha umi israelítare?

³ ¿Ndépa avei reñeporandúmava Jehovápa ikatu omeʼẽ ndéve ha ne famíliape umi mbaʼe peikotevẽva? Jahechamína mbaʼérepa Moisés ha umi israelita opensa vaʼekue Jehová ndaikatumoʼãiha omeʼẽ chupekuéra umi mbaʼe oikotevẽva. Avei jahecháta unos kuánto téxto bíblico omombaretétava ñande jerovia ani hag̃ua jaduda Jehová siémpre ñanepytyvõtaha.

¿MBAʼÉPA ÑAAPRENDE LA OIKO VAʼEKUÉGUI MOISÉS HA UMI ISRAELÍTARE?

4. ¿Mbaʼérepa heta israelita oñepyrũ oduda Jehová omeʼẽtapa chupekuéra la oikotevẽva?

⁴ ¿Mbaʼérepa umi israelita oñepyrũ vaʼekue oduda? Jarekomína enkuénta mbaʼe situasiónpepa oĩ vaʼekue hikuái. Umi israelita osẽ kuri Egíptogui, ha avei osẽ “hendivekuéra heta extranhéro”. Haʼekuéra un tiémporema okorre oikóvo kuri pe desiértore og̃uahẽ hag̃ua pe Tiérra Prometídape (Éx. 12:38; Deut. 8:15). Umi extranhéro ikueráima hoʼu hague pe maná ha heta israelita oñepyrũ avei ojeplagea (Núm. 11:​4-6). Haʼekuéra oñepyrũ ohechagaʼu umi tembiʼu hoʼu vaʼekue Egíptope. Upéi pe puévlo oho kuri ojeplagea Moiséspe. Upévare provávlemente haʼe oñepyrũ opensa haʼe omeʼẽ vaʼerãha chupekuéra pe tembiʼu ha ndoikuaái moõguipa onohẽta upéva (Núm. 11:​13, 14).

5, 6. Umi extranhéro opensa lája ova vaʼekue umi israelítare, ¿mbaʼépa ñaaprende upévagui?

⁵ Umi extranhéro ohechauka vaʼekue nomombaʼeiha umi mbaʼe Jehová omeʼẽva chupekuéra, ha upéi umi israelita avei oñepyrũma opensa haʼekuéraicha. Upéva ikatu oiko avei ñanderehe. Ñande jerére oĩramo umi persóna ndoagradeséiva la orekóva ikatu avei jaju ndajavyʼavéi umi mbaʼe Jehová omeʼẽvare ñandéve. Ikatu ñañepyrũ jahechagaʼu umi mbaʼe jareko vaʼekue yma térã ñaenvidia la ótro orekóva. Péro javyʼaitereivéta ñañekontentáramo umi mbaʼe jarekóvare, tahaʼe haʼéva la ñane situasión.

⁶ Umi israelita tekotevẽ kuri imanduʼa la Jehová opromete vaʼekuére chupekuéra. Haʼe heʼi haʼekuéra orekotaha hetaiterei mbaʼe og̃uahẽ rire pe Tiérra Prometídape, ha ndahaʼéi oviaha aja pe desiértore. Ñande avei koʼág̃a ndovaléi jajesarekoiterei umi mbaʼe ndajarekóivare ko múndo añáme. Upéva rangue ñapensa vaʼerã umi mbaʼe Jehová oprometévare omeʼẽtaha ñandéve pe múndo pyahúpe. Avei ikatu jajepyʼamongeta umi téxto bíblico ikatúvare ñanepytyvõ jajeroviave hag̃ua Jehováre.

7. ¿Mbaʼérepa ñaĩ segúro Jehová siémpre ñanepytyvõtaha?

⁷ Ikatu oime reikuaase gueteri mbaʼérepa Jehová oporandu raʼe Moiséspe: “¿Nde piko reimoʼã Jehová ndaikatumoʼãiha mbaʼe ojapo upéva?”. Ikatu oime Jehová oipota raʼe Moisés opensa koʼã mokõi mbaʼére: 1) Ipoderóso rupi ndaiporiha mbaʼeve Ñandejára ikatuʼỹva ojapo ha 2) ikatuha oipuru ipodér umi lugár oĩva mombyryvehápe jepe. Jehová ikatu vaʼekue omeʼẽ hetaiterei soʼo umi israelítape oĩramo jepe hikuái pe desiérto ruguápe. Haʼe “oipuru ipo ipoderosoitéva, ipodér ningo tuichaiterei ha ndaijojahái”. Péicha Jehová ohechauka vaʼekue ikatuha oipuru ipodér ipuévlo rehehápe tahaʼe haʼéva pe lugár oĩháme hikuái (Sal. 136:​11, 12). Upéicharõ jahasa jave umi situasión ijetuʼúvare, ikatu ñaĩ segúro Jehová ñanepytyvõtaha káda únope ñaĩ ñaĩháme (Sal. 138:​6, 7).

8. ¿Mbaʼépa ikatu ñanepytyvõ ani hag̃ua oiko ñanderehe la oiko vaʼekue umi israelítare pe desiértope? (Ehecha pe taʼanga).

⁸ Jehová ojapo la opromete vaʼekue ha omeʼẽ umi héntepe heta kodornís. Péro umi israelita ndoagradeséi Jehovápe pe milágro ojapo vaʼekuére. Upéva rangue heta oĩ ohechauka vaʼekue itaryryiha pe tembiʼúre. Haʼekuéra ombaʼapo voi un día imédiore ombyaty hag̃ua umi kodornís. Jehová katu ohechávo upéva “orrenegaiterei hesekuéra”, ha okastiga “umi hénte iñembyahyirekoite vaʼekuépe” (Núm. 11:​31-34). Ñande ikatu ñaaprende peteĩ mbaʼe iñimportánteva ko ehémplogui. Tekotevẽ ñañatende pono jaiko jaipota potave umi mbaʼe. Tahaʼe ñandepláta térã ñanemboriahu, la iñimportantevéva ñandéve g̃uarã siémpre haʼe vaʼerã ñambyaty “tesóro yvágape”. Upearã jasegi vaʼerã ñañemoag̃uive Jehová ha Jesúsre (Mat. 6:​19, 20; Luc. 16:9). Upéicha jajapóramo Jehová siémpre omeʼẽta ñandéve la ñaikotevẽva.

9. ¿Mbaʼépa jaikuaa Jehová ojapotaha ñanderehehápe?

⁹ Koʼág̃a avei Jehová oipytyvõ ipuévlope. ¿Upévapa heʼise núnka nañaikotevẽmoʼãiha pláta térã tembiʼu? Nahániri.b Péro jaikuaa porã Jehová núnka nañanderejareimoʼãiha. Haʼe ñanepytyvõta opaichagua situasión ijetuʼúvape. ¿Péro mbaʼéichapa ikatu jahechauka jajeroviaha Jehová omeʼẽtaha ñandéve la ñaikotevẽva? Jahechamína mokõi situasión ikatúva jahasa: 1) Jareko jave provléma ekonómiko, ha 2) ñapensa jave umi mbaʼe ñaikotevẽtavare ñandeeda vove.

JAREKO JAVE PROVLÉMA EKONÓMIKO

10. ¿Mbaʼeichagua provléma ekonómikopa ikatu oñepresenta?

¹⁰ Hiʼag̃uivévo ohóvo pe fin jaikuaa oĩtaha hetave provléma ekonómiko, pórke umi goviérno ikatu okambia, oĩ gérra, desástre naturál térã ikatu ou jey peteĩ pandémia. Peteĩ tesapirĩme japerdekuaa ñande traváho, umi mbaʼe jarekóva, ñande róga ha amás día ikatu ijetuʼuve jahupyty umi mbaʼe ñaikotevẽva. Ikatu oime jaheka vaʼerã traváho, térã ñapensa voi javávo ñane famíliandi ótro lugárpe ñamantene hag̃ua chupekuéra. ¿Péro mbaʼéichapa ikatu jadesidi porã ha péicha jahechauka jajeroviaha Jehováre?

11. ¿Mbaʼépa ikatu ñanepytyvõ jareko jave provléma ekonómiko? (Lucas 12:​29-31).

¹¹ La iñimportantevéva hína ñamombeʼupaite Jehovápe la ñandepyʼapýva (Prov. 16:3). Ikatu jajerure chupe tañanemoarandu jadesidi porã hag̃ua ha tañanembopyʼaguapy ani hag̃ua jajepyʼapyeterei ñane situasiónre (elee Lucas 12:​29-31). Jasegíkena jajerure Jehovápe ajúda javyʼáma hag̃ua umi mbaʼe jarekóvare (1 Tim. 6:​7, 8). Avei iporãta jahekáramo umi puvlikasión omeʼẽva konsého ideprovéchotava ñandéve jareko jave provléma ekonómiko. Hetaitereípema oipytyvõ umi informasión oĩva jw.org-pe umichagua situasiónpe.

12. ¿Mbaʼe mbaʼépa ikatu ñañeporandu jadesidi hag̃ua la okonvenivétava ñane famíliape?

¹² Oĩ ováva mombyry ifamíliagui ombaʼapo hag̃ua, péro upéi kon el tiémpo oñemeʼẽ enkuénta odesidi vai hague. Upévare rejagarráta jave peteĩ traváho aníkena repensa pe reganátavarente, síno repensa vaʼerã pe redesidívapa oipytyvõta ne famíliape oñemoag̃ui hag̃ua Jehováre (Luc. 14:28). Iporãta reñeporandúramo: “¿Mbaʼépa ikatu oiko che matrimóniope avárõ mombyry che rembiayhúgui? ¿Ikatútapa asegi aha rreuniónpe, apredika ha ahasa tiémpo umi ermanokuérandi?”. Oimérõ ne família iporãta reñeporandúramo ko mbaʼe iñimportantetéva: “Naiméirõ che famíliandi, ¿ikatútapa ‘amongakuaa, akorrehi ha añemoñeʼẽ chupekuéra Jehová heʼiháicha’?” (Efes. 6:4). Edesidítarõ peteĩ mbaʼe, ejegiákena la Jehová oipotávare ha ani ejegia la heʼívare umi persóna térã ne hénte ndojapóiva la Biblia heʼíva.c Jahechamína la ojapo vaʼekue peteĩ ermáno hérava Toni oikóva Asia Occidentálpe. Tónipe ojeofrese unos kuánto traváho ojepaga porãitereitahápe chupe. Péro oho vaʼerã ombaʼapo ótro paíspe. Upéi Toni oñemboʼe, oñeʼẽ hembirekóndi upe témare ha odesidínte ndoaseptamoʼãiha umi traváho. Upéva rangue ohecha hikuái mbaʼépa ikatu ojapo menove ogasta hag̃ua. Toni imanduʼávo la ojapo vaʼekuére heʼi: “Adesidi rupi upéicha, ikatúma aipytyvõ hetaiterei persónape oikuaa hag̃ua Jehovápe, ha che família avei ikyreʼỹeterei Jehová servísiope. Ore roaprende la rojapóramo Mateo 6:33 heʼíva, Jehová siémpre oñangarekotaha orerehe”.

ÑAPENSA JAVE LA ÑAIKOTEVẼTAVARE ÑANDEEDA VOVE

13. ¿Mbaʼépa ikatu jajapo koʼág̃a jareko hag̃ua la ñaikotevẽva ñandeeda vove?

¹³ Tekotevẽ avei jahechauka jajeroviaha Jehováre jakalkula jave mbaʼéichapa jaikóta ñandeeda vove. La Biblia ñanemokyreʼỹ ñambaʼapo jejopy hag̃ua ikatu hag̃uáicha jareko la ñaikotevẽtava amo gotyove (Prov. 6:​6-11). Ñande posivilida omeʼẽramo, iporã voi ñañongatúramo michĩmi pláta ñane renonderãme g̃uarã, pórke legálmente pe pláta ikatu hína ñandeprotehe (Ecl. 7:12). Péro ndajahejái vaʼerã umi mbaʼerepy ou iñimportanteterei ñandéve g̃uarã.

14. ¿Mbaʼéichapa Hebreos 13:5 ikatu ñanepytyvõ ani hag̃ua jajepyʼapyeterei?

¹⁴ Jesús omombeʼu vaʼekue peteĩ istória ohechaukáva ivyroha peteĩ persóna oikónteva oñongatu pláta, “péro imboriahúva Ñandejára renondépe” (Luc. 12:​16-21). Legálmente avave ndoikuaái la henonderã (Prov. 23:​4, 5; Sant. 4:​13-15). Avei Jesús heʼi vaʼekue umi osegiséva chupe oĩ vaʼerãha preparádo oheja hag̃uáicha opa mbaʼe orekóva (Luc. 14:33). Umi apóstol tiémpope umi kristiáno oikóva Judéape oĩ vaʼekue oheja hag̃uáicha entéro mbaʼe orekóva ha ojapo upéva vyʼápe (Heb. 10:34). Koʼág̃a avei heta ñane ermáno operde umi mbaʼe orekóva noñentremetéi haguére polítikare (Apoc. 13:​16, 17). ¿Mbaʼépa oipytyvõ chupekuéra ojapo hag̃ua upéva? Haʼekuéra ojerovia la Jehová promésare. Haʼe heʼi ñandéve: “Núnka ndorohejamoʼãi ha núnka nderepytamoʼãi neaño” (elee Hebreos 13:5). Ñande avei ñañehaʼãmbaite jajapo la ikatumíva jakalkula hag̃ua umi mbaʼe ñaikotevẽtava amo gotyove. Péro oiko sapyʼárõ peteĩ mbaʼe nañahaʼarõiva, ndajadudái Jehová oĩtaha ñande ykére.

15. ¿Mbaʼéichapa opensa vaʼerã umi tuakuéra ojeroviáva Jehováre? (Ehecha pe taʼanga).

¹⁵ Heta lugárpe umi túa orekoseterei voi la mitã ikatu hag̃uáicha ifamília okakuaávo ogana pláta ha okuida hesekuéra ijeda rire. Péro la Biblia heʼi tuakuéra omeʼẽ vaʼerãha ifamíliape umi mbaʼe oikotevẽva (2 Cor. 12:14). Jaikuaa ningo umi tuakuéra amáske ijeda oikotevẽtaha ifamília oipytyvõ chupekuéra heta hendáicha. Ha oĩ voi la ovyʼaitereíva oipytyvõvo upéicha ituakuérape (1 Tim. 5:4). Péro umi túa ojeroviáva Jehováre oikuaa ovyʼaitereivetaha oipytyvõramo ifamíliape oservi hag̃ua Jehovápe. Haʼekuéra oikuaa la iñimportantevéva ndahaʼeiha omongakuaa ifamíliape orresivínte hag̃ua pláta ijeda rire (3 Juan 4).

16. ¿Mbaʼéichapa tuakuéra ikatu oprepara ifamíliape oñemantene hag̃ua ijupe? (Efesios 4:28).

¹⁶ Ne ehémplo rupive emboʼe vaʼerã ne famíliape ojerovia hag̃ua Jehováre ha avei eprepara chupe oñemantene hag̃ua ijupe amo gotyove. Imitã aja emboʼékena chupe iñimportanteha ñambaʼapo jejopy (Prov. 29:21; elee Efesios 4:28). Okakuaávo ohóvo eipytyvõ chupe oñehaʼãmbaite hag̃ua eskuéla térã koléhiope. Primerorã tuakuéra oanalisa vaʼerã umi konsého oĩva la Bíbliape ha upéi oipytyvõ vaʼerã ifamíliape odesidi hag̃ua mbaʼépa la ostudiátava. ¿Mbaʼépa la ohupyty vaʼerã tuakuéra? Haʼekuéra oprepara vaʼerã ifamíliape oñemantene hag̃ua ijupe, ikatu hag̃uáicha avei ifamília itiémpo opredikave hag̃ua térã ojapo hag̃ua iprekursorádo.

17. ¿Mbaʼéguipa ikatu ñaĩ segúro?

¹⁷ Ñande jaikuaa porã Jehová orekoha pe deséo ha pe podér omeʼẽ hag̃ua ñandéve umi mbaʼe ñaikotevẽva. Hiʼag̃uívo ohóvo pe fin tekotevẽta jajeroviave Jehováre. Péro toiko la oikóva aníkena jaduda Jehová oipurutaha ipodér omeʼẽ hag̃ua ñandéve ñane remikotevẽ. Jehová ningo ipoderosoiterei, upévare ikatu ñaĩ segúro haʼe ñanepytyvõtaha ñaime ñaimehápe.